សម្ដេចធិបតី៖ ការចូលរួមដ៏ច្រើនកុះករក្នុងដំណើរថ្មើជើងបង្ហាញពីស្មារតីស្នេហាជាតិ និងទឹកដីរបស់ពលរដ្ឋខ្មែរ

សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា មានប្រសាសន៍បញ្ជាក់ថា ការចូលរួមដ៏ច្រើនកុះករក្នុងដំណើរថ្មើជើង ដើម្បីគាំទ្ររាជរដ្ឋាភិបាល និងកងកម្លាំងជួរមុខ នៅព្រឹកនេះ គឺបង្ហាញអំពីស្មារតីស្នេហាជាតិ ស្នេហាទឹកដីរបស់ប្រជាពលរដ្ឋខ្មែរ និងផ្ដល់នូវកម្លាំងចិត្តដ៏ខ្លាំងដល់រាជរដ្ឋាភិបាល និងកងកម្លាំងជួរមុខ ដែលកំពុងបំពេញភារកិច្ចការពារបូរណភាពទឹកដី និងឧត្តមប្រយោជន៍របស់ជាតិ និងប្រជាជនខ្មែរយើង។

សម្ដេចនាយករដ្ឋមន្រ្ដីមានប្រសាសន៍បែបនេះ ក្នុងឱកាសថ្លែងសារពិ ជូនចំពោះមហាជនក្នុងឱកាសរៀបចំពីធីដំណើរថ្មើរជើងរួមគ្នា (Solidarity March) នៅព្រឹកថ្ងៃទី១៨ ខែមិថុនា ឆ្នាំ២០២៥នេះ។

សម្ដេចធិបតីបានវាយតម្លៃខ្ពស់ ចំពោះសហភាពសហព័ន្ធយុវជនកម្ពុជា ដែលបានផ្ដួចផ្ដើមគំនិត និងរៀបចំនូវព្រឹត្តិការណ៍នេះឡើងនៅក្នុងកាលៈទេសៈដ៏សំខាន់នេះ ខណៈការជួបជុំគ្នារបស់បងប្អូនជនរួមជាតិនៅព្រឹកនេះ គឺជានិម្មិតរូបនៃឯករាជ្យ និងអធិបតេយ្យជាតិខ្មែរ។

ក្នុងឱកាសនោះ សម្ដេចធិបតី បានគូសបញ្ជាក់ថា ដំណើរថ្មើជើងរួមគ្នាដែលបងប្អូនជនរួមជាតិនៅព្រឹកនេះ គឺពិតជាមានអត្ថន័យយ៉ាងជ្រាលជ្រៅ និងផ្ដល់នូវកម្លាំងចិត្តគាំទ្រយ៉ាងសំខាន់ដល់រាជរដ្ឋាភិបាល ជាពិសេសដល់កងកម្លាំងជួរមុខ ក្នុងការបន្តបំពេញបេសកកម្មការពារ ឯករាជ្យជាតិ អធិបតេយ្យ និងបូរណភាពទឹកដីនៃព្រះរាជាណាចក្រកម្ពុជា នៅក្នុងពេលព្រមគ្នានៃការបន្តថែរក្សាសន្ដិភាព ស្ថិរភាព និងវឌ្ឍនភាពសង្គមលើគ្រប់វិស័យ៕ អត្ថបទ៖ វ៉ន ដារ៉ា