អភិបាលខេត្តប៉ៃលិនជូនដំណើរពលករខ្មែរមកពីថៃទៅស្រុកកំណើតដោយរថយន្តក្រុងឥតគិតថ្លៃ

ប៉ៃលិន៖ ថ្ងៃទី១៨ ខែមិថុនា នេះ លោកជំទាវបណ្ឌិត បាន ស្រីមុំ អភិបាលបាលខេត្តប៉ៃលិន បានអញ្ជើញ ជូនដំណើរពលករខ្មែរដែលវិលមកពីប្រទេសថៃតាមច្រកទ្វារព្រំដែនអន្តរជាតិព្រំ ខេត្តប៉ៃលិន ត្រលប់ទៅ ស្រុកកំណើតវិញ តាមរយៈរថយន្តក្រុងរបស់រដ្ឋបាលខេត្ត ដោយឥតគិតថ្លៃ។

លោកជំទាវ បានមានប្រសាសន៍ថា នៅច្រកទ្វារព្រំដែនអន្តរជាតិព្រំ ខេត្តប៉ៃលិន គឺមានពលករខ្មែរ បានធ្វើដំណើរឆ្លងព្រំដែនត្រលប់មកកម្ពុជាវិញជាបណ្តើរៗ ដោយរដ្ឋបាលខេត្ត បានសហការជាមួយក្រុម ការងារក្រសួងការងារ និងបណ្តុះបណ្តាលវិជ្ជាជីវៈ បានរៀបចំទីតាំងត្រៀមទទួលពួកគេ នៅក្បែរព្រំដែន ដើម្បីសម្រួលទាំងការស្នាក់នៅបណ្ដោះអាសន្ន ការហូបចុក ការថែទាំព្យាបាលសុខភាព និងជូនដំណើរទៅ ស្រុកកំណើតវិញដោយឥតគិតថ្លៃ ព្រមទាំងជួយរកការងារជូនផងដែរ។

លោកជំទាវ បានមានប្រសាសន៍ផ្តាំផ្ញើ និងជូនដំណឹងដល់ពលករខ្មែរ ដែលមានបំណងវិលត្រឡប់ មកស្រុកកំណើតវិញតាមច្រកទ្វារព្រំដែនអន្តរជាតិព្រំ ខេត្តប៉ៃលិន ឬក្នុងករណីកំពុងស្ថិតនៅក្នុងប្រទេសថៃ ជួបបញ្ហាមិនទាន់បើកប្រាក់ខែ និងគ្មានមធ្យាបាយធ្វើដំណើរមកដល់ព្រំដែនកម្ពុជា តែមានបំណងចង់វិល ត្រឡប់មកស្រុកកំណើតវិញ សូមទំនាក់ទំនងតាមរយៈលេខទូរស័ព្ទ 0975 79 78 78 / 088 369 6666 ក្រុមការងារនឹងរង់ចាំជួយសម្របសម្រួលជូន២៤ម៉ោង/២៤ម៉ោង ៕