ឯកឧត្តម គីម វីរៈ ដឹកនាំប្រតិភូទស្សនកិច្ចស្វែងយល់ពីការកាត់បន្ថយហានិភ័យនៅប្រទេសអ៉ីតាលី

ភ្នំពេញ៖ តបតាមការអញ្ជើញរបស់មជ្ឈមណ្ឌល-អាហា ឯកឧត្តម គីម វីរៈ អគ្គលេខាធិការ នៃគណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម.) និងជាប្រធាន ACDM បានដឹកនាំប្រតិភូ ចូលរួមកម្មវិធីទស្សនកិច្ចសិក្សាអាស៊ាន នៅទីក្រុងរ៉ូម ប្រទេសអុីតាលី ចាប់ពីថ្ងៃទី ១៧ ដល់ថ្ងៃទី២០ ខែមិថុនា ឆ្នាំ ២០២៥ ។

ដំណើរទស្សនកិច្ចសិក្សាអាស៊ានទៅកាន់ប្រទេសអុីតាលីត្រូវបានរៀបចំឡើងដោយមជ្ឈមណ្ឌល AHA សហការជាមួយមជ្ឈមណ្ឌលការពារជនស៊ីវិលអុីតាលី សម្រាប់ការស្រាវជ្រាវលើការកាត់បន្ថយហានិភ័យ (CI3R) ដែលផ្តល់មូលនិធិដោយរដ្ឋាភិបាលនៃប្រទេសអុីតាលី និងដោយមានការគាំទ្រពីកម្មវិធីរួមបញ្ចូលគ្នាក្នុងការពង្រឹងសមត្ថភាពរបស់មជ្ឈមណ្ឌល AHA និងគម្រោងយន្តការឆ្លើយតបបន្ទាន់អាស៊ាន (EU-SAHA) ដែលផ្តល់មូលនិធិដោយសហភាពអឺរ៉ុប។

ដំណើរទស្សនកិច្ចសិក្សាអាស៊ាន ខាងលើនេះមានគោលបំណងផ្តល់ឱកាសដល់បណ្តាប្រទេសជាសមាជិកទាំងអស់ទទួលបានបទពិសោធន៍ពីការអនុវត្តល្អៗ ក្នុងការប្រើប្រាស់បច្ចេកវិទ្យានុវានុវត្តន៍ និងយន្តការសម្របសម្រួលស្ថាប័នក្នុងការកាត់បន្ថយហានិភ័យគ្រោះមហន្តរាយ។

ឆ្លៀតក្នុងទស្សនកិច្ចនោះ ឯកឧត្តម គីម វីរៈ បានដឹកនាំប្រតិភូចុះទស្សនកិច្ចនៅមជ្ឈមណ្ឌលមុខងារកណ្តាល (CFC) ជាទីតាំងនៅនាយកដ្ឋានការពារជនស៊ីវិល ក្នុងគោលបំណងស្វែងយល់ពីប្រវត្តិ និងប្រតិបត្តិការ រួមទាំងភារកិច្ចចម្បងក្នុងដំណើរការនៃការជូនដំណឹង ក្នុងករណីមានព្រឹត្តិការណ៍ឧតុនិយម ជលសាស្ត្រ និងធារាសាស្ត្រ ដែលអាចបង្កើតស្ថានភាពហានិភ័យ។

សូមជម្រាបជូនថា ប្រតិភូប្រទេសអាស៊ានទាំងអស់ក៏ត្រូវបានអញ្ជើញចូលរួមទស្សនកិច្ចនៅតាមវិទ្យាស្ថានពាក់ព័ន្ធទៅនឹងការងារគ្រប់គ្រងគ្រោះមហន្តរាយ មួយចំនួនរបស់ប្រទេសអុីតាលីផងដែរ។