រដ្ឋាភិបាលថៃ ត្រូវបានរង្គោះរង្គើ ដោយសារការដកខ្លួនចេញរបស់បក្សភូមចៃថៃ ពីគណបក្សចម្រុះដ៏ធំ

គណបក្ស ភូមចៃថៃ (Bhumjaithai) បានប្រកាសដកខ្លួនចេញពីរដ្ឋាភិបាលចម្រុះ ដោយអំពាវនាវឱ្យនាយករដ្ឋមន្ត្រីលោកស្រី Paetongtarn Shinawatra ទទួលខុសត្រូវចំពោះវីដេអូឃ្លីប ដែលពាក់ព័ន្ធនឹងការសន្ទនាជាមួយប្រធានព្រឹទ្ធសភាកម្ពុជា សម្ដេចតេជោ ហ៊ុន សែន ។

យោងតាមសេចក្តីថ្លែងការណ៍កាលពីថ្ងៃពុធសប្ដាហ៍នេះ គណបក្សនេះ បានចង្អុលបង្ហាញថា ការសន្ទនាតាមទូរស័ព្ទរវាងលោកស្រី Paetongtarn និងសម្ដេចអគ្គមហាសេនាបតីតេជោ ហ៊ុន សែន បានប៉ះពាល់ដល់អធិបតេយ្យភាព បូរណភាពទឹកដី ផលប្រយោជន៍ជាតិ និងយោធារបស់ប្រទេសថៃ ដូចដែលសាធារណជនបានដឹងរួចហើយ។គណបក្ស ភូមចៃថៃ បាននិយាយថា គណៈកម្មាធិការប្រតិបត្តិរបស់ខ្លួនបានកោះប្រជុំដើម្បីពិភាក្សាអំពីបញ្ហានេះ ហើយបានសម្រេចចិត្តដកខ្លួនចេញពីរដ្ឋាភិបាលចម្រុះនេះ។

សេចក្តីថ្លែងការណ៍បាននិយាយថា “ក្រុមរដ្ឋមន្រ្តីមកពីគណបក្ស Bhumjaithai បានដាក់លិខិតលាលែងពីតំណែងរបស់ពួកគេទៅកាន់នាយករដ្ឋមន្រ្តី ដែលមានសុពលភាពចាប់ពីថ្ងៃទី១៩ ខែមិថុនាឆ្នាំ ២០២៥ “នេះ ។គណបក្សនេះក៏បានអំពាវនាវឲ្យនាយករដ្ឋមន្ត្រីទទួលខុសត្រូវចំពោះការខូចខាតកិត្តិយស សេចក្តីថ្លៃថ្នូរជាតិ ប្រជាជន និងយោធារបស់ប្រទេសថៃ។

គណបក្ស Bhumjaithai បានបញ្ជាក់ពីការត្រៀមខ្លួនធ្វើការជាមួយប្រជាជនថៃ គាំទ្រយោធា និងជួយមន្ត្រីក្នុងការរក្សាអធិបតេយ្យភាព បូរណភាពទឹកដី និងផលប្រយោជន៍ជាតិរបស់ប្រទេសថៃ តាមគ្រប់មធ្យោបាយដែលអាចធ្វើទៅបាន។

គួររម្លឹកថាការដកខ្លួនរបស់គណបក្ស ភូមចៃថៃ ពាក់ព័ន្ធនឹងផែនការរុះរើគណៈរដ្ឋមន្ត្រីដោយគណបក្សភឿថៃ ទាមទារយកក្រសួងមហាផ្ទៃដែលបច្ចុប្បន្នស្ថិតក្នុងដៃរបស់មេដឹកនាំគណបក្សភូមចៃថៃ លោក អានុទិន ឆានវ៉រ៉ាគុណ ប៉ុន្តែជាការដោះដូរ គណបក្សភូមិចៃថៃ ទាមទារតំណែងក្រសួងពីរ ត្រឡប់មកវិញ ដោយការទាមទារនេះ ត្រូវបានទាត់ចោលដោយគណបក្សភឿថៃ និង ទុកឱកាស៤៨ម៉ោង ក្នុងការសម្រេចចិត្ត ។ កាលពីរាត្រីថ្ងៃពុធយប់មិញ ជារយៈពេល៤៨ម៉ោង ដែលគណបក្សភូមចៃថៃ ត្រូវដកខ្លួនចេញតាមការតាំងចិត្តដោយសារតែខ្លួនមិនបានតំណែងក្រសួងពីរ ជាការដោះដូរក្រសួងមហាផ្ទៃ ដែលស្ថិតក្នុងកូតារបស់ខ្លួន ៕