នាយករដ្ឋមន្ត្រីថៃ ប្រឈមនឹងសម្ពាធឱ្យលាលែងពីតំណែង ជុំវិញភាពច្របូកច្របល់នយោបាយផ្ទៃក្នុង

នាយករដ្ឋមន្រ្តីថៃ លោកស្រី ផែថងថាន ស៊ីណាវ៉ាត់ (Paetongtarn Shinawatra) បានប្រឈមមុខនឹងសម្ពាធឱ្យចុះចេញពីតំណែងនៅថ្ងៃព្រហស្បតិ៍ (១៩ មិថុនា) នេះ បន្ទាប់ពីលេចធ្លាយកិច្ចសន្ទនាតាមទូរស័ព្ទមួយ ដែលលោកស្រីបានធ្វើឡើងជាមួយអតីតប្រមុខដឹកនាំប្រទេសកម្ពុជា គឺសម្ដេចអគ្គមហាសេនាបតីតេជោ ហ៊ុន សែន និងភាពច្របូកច្របល់នយោបាយក្នុងប្រទេស ដែលបង្កការខឹងសម្បារយ៉ាងទូលំទូលាយក្នុងសង្គមថៃ និងធ្វើឱ្យដៃគូចម្រុះដ៏សំខាន់មួយឱ្យលាឈប់ពីរដ្ឋាភិបាលចម្រុះ។

រដ្ឋាភិបាលចម្រុះ ដែលដឹកនាំដោយគណបក្សភឿថៃ (Pheu Tha) កំពុងឈានទៅដល់ការដួលរលំ ដោយបានរុញច្រានព្រះរាជាណាចក្រមួយនេះចូលទៅក្នុងជុំនៃអស្ថិរភាពនយោបាយជាថ្មី ខណៈខ្លួនកំពុងស្វះស្វែងរកការជំរុញសេដ្ឋកិច្ចដែលកំពុងធ្លាក់ចុះ និងបញ្ចៀសការយកពន្ធពាណិជ្ជកម្មដ៏ច្រើនពីប្រធានាធិបតីអាមេរិក Donald Trump។

បក្សអភិរក្សនិយម ភូមចៃថៃ (Bhumjaithai) ដែលជាគណបក្សធំទីពីរនៅក្នុងក្រុមចម្រុះ ជាមួយសមាជិកសភា ៦៩រូប បានដកខ្លួនចេញពីរដ្ឋាភិបាលចម្រុះកាលពីថ្ងៃពុធ។ អ្នកនាំពាក្យរដ្ឋាភិបាលរបស់លោកស្រី Paetongtarn មិនបានឆ្លើយតបនឹងសំណើសុំអត្ថាធិប្បាយលើការដកខ្លួនចេញនេះទេ។

ការរង្គោះរង្គើនេះកើតឡើងស្របពេលមានភាពរកាំរកូសកាន់តែខ្លាំងឡើងក្នុងក្រុមចម្រុះនៃរដ្ឋាភិបាលថៃ។ ការចាកចេញរបស់បក្ស ភូមចៃថៃ បានទុកឱ្យក្រុមចម្រុះដែលកំពុងកាន់អំណាច នៅសល់អាសនៈតែប៉ុន្មានកៅអីប៉ុណ្ណោះលើសំឡេង ២៤៨ ដែលត្រូវការ សម្រាប់សំឡេងភាគច្រើនក្នុងសភា ហើយការបោះឆ្នោតមុនអាណត្តិមួយមើលទៅអាចទៅរួច – ត្រឹមតែពីរឆ្នាំប៉ុណ្ណោះបន្ទាប់ពីការបោះឆ្នោតចុងក្រោយក្នុងខែឧសភា ឆ្នាំ២០២៣៕