សហជីពបង្ហាញការជឿជាក់លើការដឹកនាំរបស់រាជរដ្ឋាភិបាល និង​អំពាវ​នាវ​ឱ្យ​បន្ត​រួម​គ្នាជា​ធ្លុ​ង​មួយ​ដើម្បី​ជាតិរុងរឿង

តំណាងកម្មករនិយោជិតរាប់ពាន់នាក់ ភាគីសហជីព បានបង្ហាញ​ជំនឿ​ជឿ​ជាក់​លើ​ការ​ដឹកនាំ​របស់​រាជ​រដ្ឋាភិបាលកម្ពុជា និងបានអំពាវនាវប្រជាពលរដ្ឋ និងពលករខ្មែររស់នៅ និងធ្វើការនៅ​ប្រទេស​ថៃ ​ដែលសម្រេចចិត្តធ្វើមាតុភូមិនិវត្តន៍ពីប្រទេសថៃវិញ គឺរាជរដ្ឋាភិបាលកម្ពុជាបានត្រៀមរួចរាល់ ដើម្បី​ជួយ​រកការងារធ្វើ និងត្រៀមផ្តល់ការបណ្តុះបណ្តាលបច្ចេកទេស និងវិជ្ជាជីវៈ ដោយ​ឥត​គិត​ថ្លៃ ដើម្បីឆ្លើយតបតម្រូវការទីផ្សារការងារ។

លោក គឹម ចាន់សំណាង ប្រធានសភាសម្ព័ន្ធសហជីពជាតិកម្ពុជា (NACC) នៅព្រឹកថ្ងៃទី១៩ ខែ​មិថុនា​នេះ បានមានប្រសាសន៍ប្រាប់ព័ត៍មាន ប៊ីធីវី ឱ្យដឹងថា ឆ្លងកាត់បទពិសោធន៍ជាយូរឆ្នាំ ទាំង​ការ​រស់​នៅ និងប្រកបកិច្ចការងារជាច្រើននៅក្នុងប្រទេសកម្ពុជា លោកបានមើលនិងយល់ឃើញថា ប្រជា​ពលរដ្ឋគ្រប់ៗរូប គឺចង់រស់នៅដូចពេលបច្ចុប្បន្ននេះ ដូចជាការ​រស់​នៅ​ដោយ​មាន​សេរីភាព​ពេញ ​និងគ្មានភ្លើងសង្រ្គាមកើតឡើង ពីព្រោះដូចហើយថា ទំរាំឈានជើងមកដល់ដូចសព្វថ្ងៃនេះ គឺ​កម្ពុជា​បានឆ្លងកាត់ច្រើនក្នុងសម័យសង្រ្គាម និងរបប​ប្រល័យ​ពូជ​សាសន៍​ប៉ុលពត​ដ៏​ឃោឃៅ​យ៉ុង​ខ្នង​។

លោកបានរៀបរាប់ថា គិតរហូតមកដល់ពេលនេះ ជាក់ស្តែងតាមរយៈរូបភាពដែលលោក និង​កម្មករ-កម្មការិនី បានចូលរួមក្នុងដំណើរថ្មើរជើង “Solidarity March” នៅថ្ងៃទី១៨ មិថុនា​ម្សិល​មិញ​នេះ ​ក៏បានបង្ហាញឱ្យដឹងទៀតថា ប្រជាជនខ្មែគ្រប់មជ្ឈដ្ឋាន គឺមាន​ការ​ជឿជាក់​លើ​រាជ​រដ្ឋាភិបាល និងកងទ័ពជួរមុខក្នុងការការពារបូរណភាពទឹកដីនៃព្រះរាជាណាចក្រកម្ពុជា ដែល​បង្ហាញ​យ៉ាង​ច្បាស់ពីការស្នេហាជាតិ។

អ្នកស្រី នីម ថាវី សហភាពសិទ្ធិកម្មករកម្ពុជា បានឱ្យ ប៊ីធីវី ដឹងដែរថា តាម​រយៈ​រូប​ភាព​ដំណើរ​ថ្មើរ​ជើង​នេះ បានសង្កេតឃើញថា ក្រៅពីអ្នកចូលរួមផ្ទាល់ព្រឹត្តិការណ៍នេះ ក៏ទទួលបាន​ការ​គាំទ្រ​ខ្លាំង​ដូច​គ្នា​ពី​មហាជនទូទៅ និងកម្មករ កម្មការិនីបណ្តារោងចក្រនៅលើបណ្តាញសង្គម តាម​រយៈ​ការ​បង្ហោះ ​និងការប្តូរប្រូហ្វាល់នានា។ បន្ថែមពីនេះ អ្នកស្រី បានអំពាវនាវដល់ប្រជាពលរដ្ឋ និង​ពលករ​ដែល​ធ្វើការនិងរស់នៅប្រទេសថៃទាំងអស់ កុំមានការភិតភ័យ សូម​ត្រឡប់​មក​ប្រទេស​កម្ពុជា​វិញ ព្រោះប្រទេស​កម្ពុជា​មាន​ការងារ​ជា​ច្រើន​កំពុង​រង់ចាំ​ត្រឡប់​មក​ស្រុក​កំណើត​វិញ​ផង​ដែរ​។

កម្មវិធីការធ្វើដំណើរថ្មើរជើង ជាគំនិតផ្តួចផ្តើមរបស់ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋ​មន្ត្រី​ក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា ដែល​បាន​ធ្វើ​ឡើង​នៅ​ព្រឹក​ថ្ងៃ​ទី១៨ ខែមិថុនា ឆ្នាំ២០២៥ នៅរាជធានីភ្នំពេញ ដោយមានប្រជាជន​ខ្មែរមក​ពី​គ្រប់​មជ្ឈ​ដ្ឋាន​ចូលរួមជាង ១៥ម៉ឺននាក់ ដើម្បីបង្ហាញការគាំទ្រដល់រាជរដ្ឋាភិបាល និង​កង​កម្លាំង​ជួរ​មុខ​។ ក្នុងឱកាសនេះ ឯកឧត្តម ហ៊ុន ម៉ានី បានលើកឡើងថា នៅពេល​ដែល​ប្រទេស​កម្ពុជា​រង​ការ​គំរាម​កំហែង ប្រជាជនខ្មែរមិននៅស្ងៀមឡើយ គឺរួមគ្នាជាកម្លាំងគាំទ្ររាជរដ្ឋាភិបាល និង​កង​កម្លាំង​ជាតិ ក្នុងការការពារបូរណភាពទឹកដី៕ អត្ថបទ៖ ឈិត បូរ៉ាវី