កម្ពុជាស្នើដល់អឺរ៉ុបពង្រីកគាំទ្របរិវត្តកម្មឧស្សាហកម្ម និងការចាកចេញពីប្រទេសអភិវឌ្ឍន៍តិចតួច

រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ស្នើដល់សហភាពអឺរ៉ុប ផ្តោត​យុទ្ធសាស្រ្ត​គាំទ្រដល់កម្ពុជាឱ្យកាន់ តែស៊ីជម្រៅ ទាំងក្នុងកម្មវិធីបច្ចុប្បន្ននិងអនាគត ខណៈ​ដែល​កម្ពុជា​​​កំពុងត្រៀមចាកចេញពីឋានៈជាប្រទេសអភិវឌ្ឍន៍តិចតួចនៅចុង ឆ្នាំ២០២៩។

ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅក្នុង​កិច្ច​ប្រជុំ​បច្ចេកទេស ជាមួយ គណៈប្រតិភូសហភាពអឺរ៉ុប ដែលដឹកនាំដោយលោក Koen Everaert នៅថ្ងៃទី១៧ ខែមិថុនា ឆ្នាំ២០២៥ នេះ, ឯកឧត្តមរដ្ឋមន្ត្រី បានស្នើឱ្យសហភាពអឺរ៉ុប ផ្តោត​យុទ្ធសាស្រ្តគាំទ្រកម្ពុជាឱ្យកាន់តែស៊ីជម្រៅ ទាំងក្នុងកម្មវិធីបច្ចុប្បន្ន និងកម្មវិធី​អនាគត​របស់​ខ្លួន ដើម្បីបន្ស៊ីយុទ្ធសាស្ត្រអឺរ៉ុបរួម ជាមួយនឹងយុទ្ធសាស្ត្របញ្ចកោណរបស់រាជរដ្ឋាភិបាល សំដៅ​ដោះ​ស្រាយ​គម្លាតអភិវឌ្ឍន៍សំខាន់ៗ ខណៈ ដែលកម្ពុជា​កំពុង​ត្រៀម​ចាក​ចេញ​ពី​ឋានៈ​ជា​ប្រទេស​អភិវឌ្ឍន៍​តិចតួចនៅចុងឆ្នាំ២០២៩ និងក៏បានអំពាវនាវឱ្យសហភាពអឺរ៉ុប គាំទ្រ កម្ពុជាបន្ថែម ក្នុង​វិស័យ​ដែលជាគន្លឹះសម្រាប់ឧស្សាហូបនីយកម្ម ពិសេសពាក់ព័ន្ធនឹងលក្ខខណ្ឌតម្រូវទីផ្សារ និង​បទ​ប្បញ្ញត្តិបច្ចេកទេស ដោយផ្តោតលើកការអភិវឌ្ឍហេដ្ឋារចនាសម្ព័ន្ធគុណភាពជាតិ ការជំរុញ​ផលិត​ភាព ភា​ពប្រកួតប្រជែង និងសមត្ថភាពជាដើម។

ជុំវិញការស្នើរបស់ឯកឧត្តមរដ្ឋមន្ត្រី គឺចង់ឱ្យ Team Europe មិនត្រឹម​តែ​បន្ត​កម្ម​វិធី​គាំទ្រ​ដែល​កំពុង​ដំណើរ​ការប៉ុណ្ណោះទេ គឺ សូមពិនិត្យមើលឱ្យកាន់តែស៊ីជម្រៅ និងចំគន្លឹះនៃបញ្ហា – ថា​តើ​មាន​​អ្វី​ផ្សេងទៀតដែលយើងត្រូវធ្វើនាពេលនេះ? ដើម្បីឱ្យ ២០២៩ កម្ពុជាអាចស​ម្រេច​ជោគ​ជ័យ​។ បញ្ហានេះ, ដំណើរអភិវឌ្ឍន៍របស់កម្ពុជានឹងត្រូវឈានទៅមុខមួយជំហានម្តងៗ ដោយ​ជំហាន​បន្ទាប់​ នឹងផ្តោតលើការបង្កើតតម្លៃបន្ថែម តាមរយៈការកែច្នៃផលិតផលកសិកម្ម និងឧស្សាហូប​នីយក​ម្ម​ មុននឹងឈានដល់ដំណាក់កាល កំណើនដែលផ្អែក លើសេវាកម្ម។

គណៈប្រតិភូសហភាពអឺរ៉ុបបានជម្រាបជូន អំពីយុទ្ធសាស្ត្រអឺរ៉ុបរួម កម្មវិធី Global Gateway និង​គំនិត​ផ្តួចផ្តើមអឺរ៉ុបរួម-ដំណាក់កាលទី២ ដែលគ្រោងវិនិយោគប្រមាណ ៥០០ លានអឺរ៉ូ លើ​កម្ម​វិធី​ចំនួន ២៥ រហូតដល់ឆ្នាំ២០២៧។ គណៈប្រតិភូក៏បាន រំលេចនូវគម្រោង និង​សមិទ្ធផល​ជោគ​ជ័យ​សំខាន់​ៗ ដែលបង្ហាញពីការប្តេជ្ញាចិត្តរបស់សហភាពអឺរ៉ុប ក្នុងការជំរុញកិច្ចសហប្រតិបត្តិការ និង​ការអភិវឌ្ឍប្រកបដោយចីរភាពនៅកម្ពុជា។

សូមបញ្ជាក់ថា គម្រោងសំខាន់មួយរបស់ Team Europe ដែលបានរំលេចក្នុងកិច្ចប្រជុំនេះ គឺ​គម្រោង​សាងសង់រោងចក្រប្រព្រឹត្តិកម្ម ទឹកស្អាតបាក់ខែង ក្រោមកម្មវិធី Global Gateway ដែល​គាំទ្រ​ដោយរដ្ឋាភិបាលបារាំង តាមរយៈទីភ្នាក់ងារអភិវឌ្ឍន៍បារាំង (AFD) ។ ជាមួយនឹង​ការ​វិនិយោគ​រួម របស់សហភាពអឺរ៉ុបជាង ៦០០ លានអឺរ៉ូ សម្រាប់ដំណាក់កាលទាំង៣, គម្រោង​នេះ​នឹងបង្កើនសមត្ថភាព ផលិតទឹកស្អាតរបស់រដ្ឋាករទឹកស្វយ័តក្រុងភ្នំពេញទ្វេដង ពី ០,៦ លាន ទៅ ១,២ លានម៉ែត្រគូបក្នុងមួយថ្ងៃ ដោយពង្រីក និងកែលម្អ បណ្តាញប្រវែងជាង ៥ ពាន់គីឡូម៉ែត្រ និង​ភ្ជាប់បណ្តាញទឹកស្អាតដល់គ្រួសារជាង ៥០ម៉ឺនតំណ រួមទាំងសម្រាប់តំបន់ឧស្សាហកម្ម៕

អត្ថបទ៖ សុន រ៉ាឌី