នគរបាលប្រឆាំងការជួញដូរមនុស្ស ​ចុះបង្ក្រាបទីតាំងម៉ាស្សាមួយកន្លែង បង្កប់សេវាផ្លូវភេទ ឃាត់ខ្លួនថៅកែហាងម្នាក់ និងនារីរងគ្រោះ៥នាក់

ភ្នំពេញ៖ កម្លាំងនគរបាលប្រឆាំងការជួញដូរមនុស្ស និងការពារអនីតិជន សហការជាមួយកម្លាំងនគរបាលខណ្ឌកំបូល បានឆ្មក់ចុះបង្ក្រាបទីតាំងម៉ាស្សាសុខភាពមួយកន្លែង បង្កប់បម្រើសេវាផ្លូវភេទឃាត់ខ្លួនថៅកែហាងម្នាក់ និងនារីរងគ្រោះចំនួន០៥នាក់។

ប្រតិបត្តិការនេះបានធ្វើឡើងនៅយប់ថ្ងៃទី១៩ ខែមិថុនា ឆ្នាំ ២០២៥ ដោយមានចង្អុលបង្ហាញពី ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរងនិងជាស្នងការនគរបាលរាជធានីភ្នំពេញ មានការដឹកនាំបញ្ជា ពីលោកឧត្តមសេនីយ៍ទោ ចាន់ កិត្តិខុម ស្នងការរង ផែនការងារប្រឆាំងការជួញដូរមនុស្ស និងការពារអនីតិជន និងការងារយេនឌ័រ និងលោកស្រីឧត្តមសេនីយ៍ត្រី ឆេង សារ៉េត ស្នងការរង ទទួលដឹកនាំការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលរាជាធានីភ្នំពេញ និងសម្របសម្រួល លោកស្រី ផាត់ សុគន្ធា ព្រះរាជអាជ្ញារងអមសាលាដំបូងរាជធានីភ្នំពេញ។

ប្រតិបត្តិការនេះ ដឹកនាំបង្ក្រាបផ្ទាល់ពីលោក វរសេនីយ៍ទោ លេង មារ៉ា នាយរងការិយាល័យប្រឆាំងការជួញដូរមនុស្សនិងការពារអនីតិជន ធ្វើការស្រាវជ្រាវ និងបង្ក្រាបឃាត់ខ្លួនមនុស្សចំនួន០៦នាក់ នៅចំណុចស្ថិតនៅផ្ទះលេខ១៣៩-១៤១ តាមបណ្ដោយផ្លូវលេខ៨m ភូមិស្ងួនពេជ្រ សង្កាត់កន្ទោក ខណ្ឌកំពូល រាជធានីភ្នំពេញ។

តាមប្រភពព័ត៌មាន បានឲ្យដឹងថា ក្រោយទទួលបានសេចក្ដីរាយការណ៍កម្លាំងជំនាញបានធ្វើការងារស្រាវជ្រាវសើបអង្កេត ពាក់ព័ន្ធនឹងករណីនេះ ដោយឆ្មក់ចុះបង្ក្រាបជាក់ស្ដែងតែម្ដង។ ក្នុងរង្វង់ប្រតិបត្តិការនេះកម្លាំងជំនាញបានឃាត់ខ្លួនមនុស្សចំនួន០៦នាក់ ក្នុងនោះស្ត្រីម្នាក់ជាថៅកែហាងម៉ាស្សា និងនារីរងគ្រោះចំនួន០៥នាក់ និងវត្ថុតាងមួយចំនួនរួមមានស្រោមអនាម័យប្រើប្រាស់រួច និងមិនទាន់ប្រើប្រាស់។

តាមមន្ត្រីនគរបាលជំនាញ បានបញ្ជាក់ថា ក្រោយពីសួរនាំថៅកែហាងម៉ាស្សារួចបានសារភាពថា ក្នុងការរួមភេទមួយលើក គឺតម្លៃពី២០ដុល្លារទៅ៣០ដុល្លារ។ចំពោះជនបរទេសវិញ គឺមួយលើកតម្លៃ៥០ដុល្លារ។ ក្នុងករណីភ្ញៀវចង់ដេកមួយយប់ពេញ ក្នុងតម្លៃ១០០ដុល្លារ ទៅ ១៥០ ដុល្លារ។ សូមបញ្ជាក់ថាលុយដែលទទួលបាននារីរងគ្រោះត្រូវបានចែកគ្នាជាមួយនឹងថៅកែហាង។

ក្រោយប្រតិបត្តិការកម្លាំងនគរបាលជំនាញបានធ្វើការឃាត់ខ្លួនស្រ្តីមេការ ដើម្បីធ្វើការសាកសួរ និងកសាងសំណុំរឿងចាត់ការតាមនីតិវិធីច្បាប់។ ចំណែកឯនារីរងគ្រោះទាំង០៥(ភេទទី៣ម្នាក់)ត្រូវបានកម្លាំងនគរបាលបញ្ជូនទៅមន្ទីរសង្គមកិច្ចរាជធានីភ្នំពេញ៕ អត្ថបទ៖ កុម្ភៈ