ឯកឧត្តម វង្សី វិស្សុត៖ កម្ពុជាត្រៀមខ្លួនជានិច្ច ដើម្បីស្វាគមន៍ និងគាំទ្រ​ដល់​វិនិយោគិន​ និង​ធុរកិច្ចជន

ឯកឧត្តម វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី នៅ​ព្រឹក​ថ្ងៃ​នេះបានប្រកាសអញ្ជើញវិនិយោគិនដែលមានបំណងចង់វិនិយោគនៅកម្ពុជា និងបាន​បញ្ជាក់​ទៀត​ថា កម្ពុជាត្រៀមខ្លួនជានិច្ច ដើម្បីស្វាគមន៍ និងគាំទ្រដល់វិនិយោគិន និងធុរជន ដើម្បី​រីក​លូត​លាស់​ជាមួយគ្នាទៅថ្ងៃអនាគត។

ក្នុងឱកាសអញ្ញើញចូលរួមបើក វេទិកាជំរុញការវិនិយោគកម្ពុជា-អន្តរជាតិ នៅព្រឹកថ្ងៃទី២០ ខែ​មិថុនា​ ឆ្នាំ២០២៥នេះ ឯកឧត្តម ឧបនាយករដ្ឋមន្រ្តី បានមានប្រសាសន៍ថា ការរៀបចំ​វេទិកា​នា​ពេល​នេះ ពិតជាសបញ្ជាក់ឱ្យឃើញថា វិស័យឯកជនគឺជាដៃគូមិនអាចខ្វះបានរបស់រាជរដ្ឋាភិបាល និង​ជា​កម្លាំងចលករដ៏សំខាន់ដែលរួមចំណែកដល់ការរីកលូតលាស់សង្គម សេដ្ឋកិច្ចជាតិ តាម​រយៈ​​ការបង្កើតឱកាសក្នុងការជួបជុំ ផ្គូរផ្គង ជំរុញការកសាងបណ្តាញទំនាក់ទំនង និងផ្តល់​កាលា​នុវត្ត​ភាព សម្រាប់បណ្តាវិនិយោគិនជាតិ និងអន្តរជាតិ ជាពិសេសផ្សព្វផ្សាយ និងទាក់ទាញ​ការ​វិនិយោគ​នៅ​កម្ពុជា​ថ្មីៗបន្ថែមទៀត ព្រមទាំងការកសាងភាពជាដៃគូ យុទ្ធសាស្រ្ត ការចែក​រំលែក​ចំណេះ​ដឹង​ និងបទពិសោធន៍ និងការគិតគូរដោះស្រាយបញ្ហាប្រឈមរួមគ្នា។

ជាមួយនេះ ឯកឧត្តម វង្សី វិស្សុត បានស្នើវិនិយោគិន និងធុរជន​ទាំង​អស់​ទុក​ចិត្ត​លើ​ការ​ដឹកនាំ​របស់​រាជ​រដ្ឋាភិបាលកម្ពុជា ក្នុងការដោះស្រាយបញ្ហាប្រឈមនានាទាំងក្នុងនិងក្រៅប្រទេស ខណៈ​ដែល​ប្រមុខ​ថ្នាក់ដឹកនាំ ក៏ដូចជារាជរដ្ឋាភិបាលទាំងមូលខិតខំប្រឹងប្រែងណាស់ ធ្វើយ៉ាងណា​ធានា​និរន្តរភាព​នៃ​សកម្មភាពសេដ្ឋកិច្ច និងពាណិជ្ជកម្ម ក៏ដូចជាធានាបរិយាកាសធុរកិច្ច ដែលមាន​ភាព​អនុ​គ្រោះសម្រាប់ធុរកិច្ច និងអាជីវកម្មគ្រប់ប្រភេទ។

អ្នកឧកញ៉ា លី ឃុនថៃ ប្រធានសមាគមសហព័ន្ធអ្នកវិនិយោគកម្ពុជា បានមាន​ប្រសាសន៍​ឱ្យ​ដឹង​ថា វេទិកានេះរៀបចំឡើង ដើម្បីលើកកម្ពស់ សម្របសម្រួល និងកៀរគរវិនិយោគមកកាន់កម្ពុជា ព្រម​ទាំង​ចូលរួមក្នុងការងារសង្គម និងសកម្មភាពសប្បុរសធម៌ផ្សេងៗជាច្រើន សម្រាប់ជា​ប្រយោជន៍​ដល់​ការអភិវឌ្ឍសង្គម សេដ្ឋកិច្ចកម្ពុជា។ ជាពិសេស ដើម្បីឱ្យភ្ញៀវអន្តរជាតិ មាន​ឱកាស​សិក្សា ស្វែងយល់ពីកម្ពុជា និងអាចចាប់យកឱកាសយ៉ាងទូលំទូលាយនៅក្នុងទីផ្សារកម្ពុជា។

នៅក្នុងអង្គពិធីនេះ អ្នកឧកញ៉ា បានជំរាបជូនវិនិយោគិនជ្រាបទៀតថា ប្រទេសកម្ពុជាបច្ចុប្បន្ន នៅ​តែ​បន្ត​រក្សាបានសន្តិភាពពេញលេញ ស្ថិរភាពនិយោបាយ សុវត្ថិភាព និងសន្តិសុខ ជា​ពិសេស​មាន​ភាព​រីក​ចម្រើនលើគ្រប់វិស័យទាំងអស់ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋម​ន្រ្តី​នៃកម្ពុជា។

តាមរយៈការរៀបចំវេទិកាជំរុញការវិនិយោគកម្ពុជា-អន្តរជាតិ រាជរដ្ឋាភិបាលកម្ពុជា និង​សមាគម​សហព័ន្ធ​អ្នកវិនិយោគកម្ពុជា សង្ឃឹមថា នឹងក្លាយជាសក្ខីភាពមួយទៀត ចំពោះ​ការ​ប្តេជ្ញា​ចិត្ត​ក្នុងការបង្កើនសហថាមភាព និងពង្រឹងកិច្ចខិតខំប្រែងប្រែងរួមគ្នាជាមួយវិស័យឯកជន ក្នុងការ​អភិវឌ្ឍ​សង្គម សេដ្ឋកិច្ចជាតិ៕ អត្ថបទ៖ ឈិត បូរ៉ាវី