រយៈពេលមួយថ្ងៃកន្លះ ប្រជាពលរដ្ឋបរិច្ចាគឈាម ចំនួន១៥៥៥សាក់

ក្នុង​រយៈពេលមួយថ្ងៃកន្លះ ប្រជាពលរដ្ឋបរិច្ចាគឈាម បានចំនួន ១៥៥៥សាក់ ក្រោមប្រធានបទ “យើង​រួម​គ្នាបរិច្ចាគឈាម ដើម្បីសង្គ្រោះជីវិត ” ក្រោមកិច្ចសហការ​រវាងរដ្ឋបាលខេត្ត សហ​ភាព​សហព័ន្ធ​យុវជនកម្ពុជា ក្រុមបាល់ទាត់ពិធីករកីឡាកម្ពុជា (MC Sport) និងមជ្ឈមណ្ឌលជាតិ​ផ្តល់​ឈាម​បាន​រៀប​ចំកម្មវិធីបរិច្ចាគឈាម ក្រោមប្រធានបទ ” យើងរួមគ្នាបរិច្ចាគឈាម ដើម្បី​សង្គ្រោះ​ជីវិត” នៅសួនច្បារខាងជើងព្រះអង្គចេកព្រះអង្គចម រយៈពេលមួយថ្ងៃកន្លះ ចាប់ពីថ្ងៃទី១៩ មួយ​ថ្ងៃ​ពេញ និងថ្ងៃទី២០មួយព្រឹក មានបងប្អូនប្រជាពលរដ្ឋស្ម័គ្រចិត្តចូលរួមបរិច្ចាគឈាមចំនួន ១៨១៤​នាក់ និងអ្នកបរិច្ចាគ ១៤០៥ប្លោក/នាក់ ព្រមទាំងបានចងក្រងក្រុមស្ម័គ្រចិត្ត បានចំនួន ៦៥​ក្រុម មានអ្នកស្ម័គ្រចិត្តសរុប ១២៧៥នាក់។

ឯកឧត្ដម ប្រាក់ សោភ័ណ អភិបាលខេត្ដសៀមរាប មានប្រសាសន៍ថា ក្នុង​នាម​រដ្ឋបាល​ខេត្ត​សូម​ថ្លែង​អំណរគុណដ៏ជ្រាលជ្រៅចំពោះមន្ត្រីរាជការ កងកម្លាំងទាំងបីប្រភេទ ថ្នាក់ដឹកនាំ និងមន្ត្រី​មន្ទីរ​-អង្គភាព ក្រុមគ្រូពេទ្យ បងប្អូនប្រជាពលរដ្ឋ ក្រុមការងារយុវជនសហភាពសហព័ន្ធយុវជនកម្ពុជា ដែល​បានផ្តល់ឈាមដើម្បីជួយសង្គ្រោះជីវិតបងប្អូនប្រជាពលរដ្ឋ។ ម្យ៉ាងទៀត ក៏សូម​ថ្លែង​អំណរ​គុណ​ចំពោះ​កង​កម្លាំង ក្រុមការងារពិធីករកីឡា និងបងប្អូនសហភាព​សហព័ន្ធ​យុវជ​ន​កម្ពុជា​ខេ​ត្ត​សៀមរាប​ដែល​បានជួយសម្របសម្រួលក្នុងព្រឹត្តិការណ៍ផ្តល់ឈាម និងសម្របសម្រួល​ដល់​បង​ប្អូនដែល​បាន​មកផ្តល់ឈាមក្នុងរយៈពេលមួយថ្ងៃកន្លះនេះ។

សូមបញ្ជាក់ថា ព្រឹត្តិការណ៍បរិច្ចាគឈាម ក្នុងខេត្តសៀមរាបក្រោមប្រធានបទ «យើងរួមគ្នាបរិច្ចាគដើម្បីសង្គ្រោះជីវិត» ក៏មានការអញ្ជើញចូលរួមពីសំណាក់ ឯកឧត្តម ឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ អមដំណើរដោយ ឯកឧត្តម ប្រាក់ សោភ័ណ អភិបាលខេត្តសៀមរាប ផងដែរ។ឯកឧត្តមឧបនាយករដ្ឋមន្ត្រី ហ៊ុន ម៉ានី បានថ្លែងអំណរគុណយ៉ាងជ្រាលជ្រៅចំពោះបងប្អូនអ្នកស្ម័គ្រចិត្ត អាជ្ញាធរ និងស្ថាប័នពាក់ព័ន្ធ ក្នុងនោះរួមមាន រដ្ឋបាល ខេត្តសៀមរាប មជ្ឈមណ្ឌលជាតិផ្តល់ឈាម សហភាពសហព័ន្ធយុវជនកម្ពុជា និងវិស័យ ឯកជន ជាពិសេស ចូលរួមចំណែកយ៉ាងសស្រាក់សស្រាំធ្វើឱ្យកម្មវិធីនេះប្រព្រឹត្តទៅបាន ដោយជោគជ័យ សមតាមគោលបំណងដែលបានដាក់ចេញ ព្រោះថា ឈាមរបស់យើងពិតជាវត្ថុដ៏មានតម្លៃបំផុត សម្រាប់ជួយជីវិតមនុស្ស។

កម្មវិធីបរិច្ចាគឈាមនេះ ត្រូវបានរៀបចំឡើងដោយរដ្ឋបាលខេត្តសៀមរាប ក្រោមប្រធានបទ «យើងរួមគ្នាបរិច្ចាគឈាមដើម្បីសង្គ្រោះជីវិត» ក្នុងគោលបំណងដើម្បីបង្ហាញពីទឹកចិត្ត ការស្រលាញ់ ការចេះជួយសង្គ្រោះអាយុជីវិតទៅកាន់អ្នកជំងឺដែលត្រូវការឈាមជាចាំបាច់។ជាមួយគ្នានេះ កម្មវិធីបរិច្ចាគឈាម គឺជាការចូលរួមបង្កើតទម្លាប់ និងវប្បធម៌បរិច្ចាគឈាមដោយស្ម័គ្រចិត្ត ដើម្បីជំរុញ និងលើកកម្ពស់ឱ្យយុវជន ព្រមទាំងប្រជាជនទូទៅឱ្យចូលរួមជាមួយសេវាកម្មជាតិផ្ដល់ឈាម ទូទាំងប្រទេស។ ក្រៅពីការបរិច្ចាគឈាម នាល្ងាចថ្ងៃទី២០ ក៏មានកម្មវិធីទាត់បាល់មិត្តភាព រវាងក្រុមបាល់ទាត់រដ្ឋបាលខេត្តសៀមរាប ជាមួយក្រុមបាល់ទាត់ពិធីករកីឡាកម្ពុជា ដើម្បីលើកកម្ពស់សុខភាព រឹតចំណងមិត្តភាព សាមគ្គីភាព ភារតភាពក្នុងនាមជាមហាគ្រួសារខ្មែរតែមួយ និងកិច្ចសហប្រតិបត្តិការល្អ ស្របតាមទិសស្លោក «កីឡារស់ក្នុងសន្តិភាព» នៅតារាងបាល់ទាត់ SRU ក្រវ៉ាត់ក្រុងក្រោលសេះផងដែរ៕