ព្រះសង្ឃ និងក្រុមការងារធនាគារជាតិ​នាំយក​អំណោយ​ជូន​ពលរដ្ឋ​ស្នាក់​នៅ​បណ្តោះ​អាសន្ន​ពី​បញ្ហា​ព្រំដែន

ប្រតិភូមន្ត្រីសង្ឃជាន់ខ្ពស់កម្ពុជា និងក្រុមការងារធនាគារជាតិនៃកម្ពុជា បាននិមន្ត និង​អញ្ជើញ​សួរ​សុខទុក្ខ និងនាំយកអំណោយ ជូនប្រជាពលរដ្ឋ ផ្លាស់ទីចេញ​ពី​តំបន់​ប្រឈម និង​បញ្ហា​ព្រំដែន​កម្ពុជា​-ថៃ​ ដែលកំពុងស្នាក់នៅបណ្តោះអាសន្ន នៅក្នុងបរិវេណវត្តមួយ កន្លែង នៅស្រុកគូលែន ខេត្ត​ព្រះវិហារ។

ប្រតិភូមន្ត្រីសង្ឃជាន់ខ្ពស់កម្ពុជា ដឹកនាំដោយសម្តេចព្រះពោធិវង្ស ណយ ច្រឹក សម្តេច​ព្រះពុទ្ធ​ជ័យ​មុនី ឃឹម សន និងក្រុម ការងារធនាគារជាតិនៃកម្ពុជា ដឹកនាំដោយលោកជំទាវបណ្ឌិត ជា សិរី ទេសាភិបាលធនាគារជាតិនកម្ពុជា និងលោកជំទាវ ខៀវ ស៊ីណា ជាចាន់តូ នៅសៀល​ថ្ងៃ​ទី​២០ ខែមិថុនា ឆ្នាំ២០២៥ ម្សិលមិញនេះ បាននិងមន្ត និងចុះសួរសុខទុក្ខ និងនាំយក​អំណោយ​ជា​គ្រឿងឧបភោគបរិភោគ និងថវិកាមួយចំនួន ជូនប្រជាពលរដ្ឋប្រមាណ ១២៧០គ្រួសារ ដែល​បាន​ផ្លាស់​ទី​ចេញពីតំបន់ប្រឈមនឹងបញ្ហាព្រំដែនកម្ពុជា-ថៃ ដែលមកស្នាក់នៅបណ្តោះអាសន្ន ក្នុង​បរិវេណវត្ត ព្រះបរមរាជមហាពោធិបញ្ចសហស្សារាម ហៅវត្តពោធិ៍ ៥០០០ ដើម ក្នុង​ស្រុក​គូលែន​ ខេត្តព្រះវិហារ។

មានប្រសាសន៍ទៅកាន់ប្រជាពលរដ្ឋ, លោកជំទាវបណ្ឌិត ជា សិរី ថ្លែងថា ការសម្រេច​ចិត្ត​ចាក​ចេញ​ពី​តំបន់​ប្រឈមនឹងបញ្ហា ព្រំដែនកម្ពុជា-ថៃ របស់បងប្អូននាពេលនេះ គឺជាការលះបង់​ដ៏​ធំធេ​ង​ និងជាកម្លាំងដ៏មុតមាំមួយ នៅក្នុងការលើកទឹកចិត្ត និងការគាំទ្រ ដល់វីរៈកងទ័ព ជាប្ដី និង​ជា​កូន​ ជាចៅ នៅក្នុងភារៈកិច្ចការពារបូរណៈភាពទឹកដី។

លោកជំទាវបណ្ឌិត បន្តទៀតថា ពេលវេលានេះយើងត្រូវតែរួមសាមគ្គីគ្នា ធ្វើអ្វីៗ​គឺ​ដើម្បី​ជាតិ​មាតុ​ភូមិ ​និងសេចក្ដីសុខរបស់ ប្រជាជាតិទាំងមូល ហើយការសម្រេចចិត្តរបស់បងប្អូន កូនចៅ និ​ង​គ្រួសារ​ ដែលជាទ័ពជួរមុខនៅពេលនេះដែរ គឺជាការលះបង់ ដ៏ធំធេង ដែលយើងខ្ញុំ​នៅ​ជួរ​ក្រោយ​មិន​អាច​ភ្លេចបាន និងបន្តគាំទ្រអស់ពីកម្លាំងកាយចិត្តនូវវីរៈភាពមិនបំភ្លេចបានឡើយ។ ឆ្លៀតនៅ ក្នុង​ឱកាសនោះដែរ លោកជំទាវបណ្ឌិត ជា សិរី បានសំណូមពរដល់ប្រជាពលរដ្ឋ យក​ចិត្ត​លើ​បញ្ហា​ថែ​ទាំសុ​ខភាព ពិសេសលើបញ្ហា អនាម័យ ដើម្បីជៀសចេញពីជំងឺ​ដង្កាត់ផ្សេងៗ និង​មាន​សុខភា​ព​ល្អគ្រប់គ្រួសារ នាអំឡុងពេលស្នាក់បណ្តោះអាសន្ននេះ។

សូមបញ្ជាក់ថា ក្នុងចំណោមប្រជាជនជាងទាំងជាង១ពាន់គ្រួសារ ដែលបានផ្លាស់​ទី​​ចេញ​ពី​តំបន់​ប្រឈម​នឹង​បញ្ហាព្រំដែនកម្ពុជា-ថៃ មកស្នាក់នៅបណ្តោះអាសន្ន ក្នុងបរិវេណវត្ត ពោធិ៍​៥០០​០​ដើម​នេះ ភាគច្រើនជាគ្រួសារយោធិនដែលឈរជើងនៅខេត្តព្រះវិហារ៕ អត្ថបទ៖ សុន រ៉ាឌី