ព័ត៌មាន

រាជធានីភ្នំពេញរៀបចំការប្រឡងបាក់ឌុបសាកល្បងសម្រាប់សិស្សថ្នាក់ទី១២ ទូទាំងរាជធានី

មន្ទីរអប់រំ យុវជន និងកីឡា រាជធានីភ្នំពេញ បានរៀបចំការប្រឡងសញ្ញាបត្រមធ្យមសិក្សាទុតិយភូមិសាកល្បងសម្រាប់សិស្សថ្នាក់ទី១២ ទូទាំងរាជធានី។ ការប្រឡងសាកល្បងនេះ រៀបចំឡើងរយៈពេល២ថ្ងៃ គឺនៅថ្ងៃទី២៤ និងថ្ងៃទី២៥ ខែមិថុនា ឆ្នាំ២០២៥ ដោយសិស្សត្រូវប្រឡង ៧មុខវិជ្ជាដូចទៅនឹងការប្រឡងសញ្ញាបត្រមធ្យមសិក្សាទុតិយភូមិពិតប្រាកដ។

នាព្រឹកថ្ងៃទី ២៤ ខែមិថុនា ឆ្នាំ ២០២៥នេះ គ្រប់សាលាវិទ្យាល័យនៅរាជធានីភ្នំពេញ បានរៀបចំការប្រឡងបាក់ឌុបសាកល្បង ដោយដំណើរការគ្រប់យ៉ាងរៀបចំដូចទៅនឹងការប្រឡងថ្នាក់ជាតិពិតប្រាកដ។ សម្រាប់វិទ្យាល័យជាស៊ីមសាមគ្គី បានចាប់ផ្ដើមសកម្មភាពដំបូងនៅថ្ងៃប្រឡងទី១នេះ ពីការឆែកឆេរសំណៅឯកសារនៅច្រកចូល មុនតម្រូវឱ្យសិស្សចូលទៅក្នុងបន្ទប់ប្រឡង និងការកាត់វិញ្ញាសា ក្រោមការពិនិត្យផ្ទាល់ដោយសិស្ស និងលោកគ្រូ អ្នកគ្រូ ដែលទទួលខុសត្រូវត្រួតពិនិត្យដំណើរការប្រឡងនៅបន្ទប់នីមួយៗ។

លោកគ្រូ ផាន់ ណិល ជានាយកវិទ្យាល័យជាស៊ីមសាមគ្គីលើកឡើងថា ការប្រឡងសាកល្បងនាពេលនេះ ពិតជាសំខាន់។ ភាពសំខាន់គឺថា សាលានឹងអាចដឹងពីសមត្ថពិតប្រាកដរបស់សិស្ស មុនការប្រឡងថ្នាក់ជាតិពិតប្រាកដចូលមកដល់។ សាលានឹងរៀបចំថ្នាក់ពិសេសសម្រាប់បំប៉នចំពោះសិស្សដែលទទួលបានលទ្ធផលមិនល្អសម្រាប់ការប្រឡងសាកល្បងនាពេលនេះ។ គោលដៅ គឺធ្វើឱ្យពួកគេអាចពង្រឹងសមត្ថភាពឱ្យកាន់តែប្រសើរ សម្រាប់ការប្រឡងពិតប្រាកដនៅខែ សីហាខាងមុខ។

សម្រាប់សិស្ស ក៏បង្ហាញការមើលឃើញដែរថា ការប្រឡងសាកល្បងនាពេលនេះ ជាការប្រឡងសំខាន់ ព្រោះពួកគេនឹងអាចដឹងពីសមត្ថភាពរបស់ខ្លួន ដឹងពីមុខវិជ្ជាដែលខ្លួនអាចធ្វើបានល្អ ដឹងពីមុខវិជ្ជាដែលខ្លួនធ្វើមិនបានល្អ។ ការដឹងពីសមត្ថភាពមុនការប្រឡងនេះ គឺពួកគេនៅមានពេលវេលាសម្រាប់ពង្រឹងសមត្ថភាព រៀនសូត្របន្ថែម ដើម្បីការប្រឡងថ្នាក់ជាតិពិតប្រាកដ។

ការប្រឡងសញ្ញាបត្រមធ្យមសិក្សាទុតិយភូមិ ឆ្នាំ ២០២៥នេះ ក្រសួងអប់រំ យុវជន និងកីឡា បានបង្ខិតកាលបរិច្ឆេទការប្រឡងឱ្យដូចទៅនឹងសម័យប្រឡងដែលរៀបចំឡើង មុនមានវត្តមានជំងឺរាតត្បាតកូវីដ-១៩។ សម័យប្រឡងសញ្ញាបត្រមធ្យមសិក្សាទុតិយភូមិឆ្នាំ ២០២៥នេះ នឹងប្រព្រឹត្តិទៅរយៈពេល ២ថ្ងៃ គឺនៅថ្ងៃទី ១៨ ថ្ងៃទី ១៩ ខែសីហា ដែលសិស្សថ្នាក់វិទ្យាសាស្ត្រសង្គម និងសិស្សថ្នាក់វិទ្យាសាស្ត្រពិត ត្រូវប្រឡងលើ ៧មុខវិជ្ជា៕ អត្ថបទ៖ គឹមហុក