ព័ត៌មាន

ឯកឧត្តម រិន វីរៈ រដ្ឋលេខាធិការក្រសួងផែនការ អញ្ជើញជាអធិបតី បើកវគ្គបណ្តុះបណ្តាល ស្តីពីស្ថិតិប្រជាសាស្រ្ត ដល់មន្រ្តីមន្ទីរផែនការរាជធានី-ខេត្ត

មណ្ឌលគីរី៖ ព្រឹកថ្ងៃទី២៤ ខែមិថុនា ឆ្នាំ២០២៥ ឯកឧត្តម រិន វីរៈ ទីប្រឹក្សាផ្ទាល់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី រដ្ឋលេខាធិការក្រសួងផែនការ និងជាប្រធានក្រុមប្រឹក្សាភិបាលនៃវិទ្យាស្ថានជាតិស្ថិតិ បានអញ្ជើញជាអធិបតី ក្នុងពិធីបើកវគ្គបណ្តុះបណ្តាលស្តីពីស្ថិតិប្រជាសាស្រ្ត ដល់មន្រ្តីមន្ទីរផែនការ រាជធានី ខេត្ត ។

នៅក្នុងពិធីនោះដែរឯកឧត្តម រិន វីរៈ បានផ្ដាំផ្ញើដល់សិក្ខាកាមដែលបានចូលរួមវគ្គបណ្តុះបណ្តាលថ្ងៃនេះ សូមយកចិត្តទុកដាក់ខ្ពស់បំផុតក្នុងការសិក្សារៀនសូត្រ ដើម្បីយល់ដឹងពី ស្ថិតិប្រជាសាស្រ្តឱ្យបានស៊ីជម្រៅ និងច្បាស់លាស់ ក្នុងការពង្រឹង និងពង្រីកសមត្ថភាព ក្នុងការលើកកម្ពស់គុណភាពអង្គភាពមន្ទីរជំនាញលើការវិភាគទិន្នន័យ ស្ថិតិប្រជាសាស្រ្តឱ្យមានប្រសិទ្ធភាពនិងគុណភាព។

សូមបញ្ជាក់ថា វគ្គបណ្តុះបណ្តាលនេះ ក្នុងគោលបំណងដើម្បីពង្រឹងសមត្ថភាពមន្រ្តី ក៏ដូចជាលើកកម្ពស់ការយល់ដឹង អំពីទស្សនទានជាមូលដ្ឋានសំខាន់ៗរបស់ស្ថិតិប្រជាសាស្រ្ត មានជាអាទិ៍ ទំហំគ្រួសារ ការបែងចែករបាយប្រជាជនតាមតំបន់ភូមិសាស្រ្ត សមាសធាតុប្រជាជន (អាយុ ភេទ ជាតិព័ន្ធ និងចរឹតលក្ខណៈផ្សេងៗទៀត) ការផ្លាស់ប្តូរបម្រែបម្រួលប្រជាសាស្រ្ត កំណើត លទ្ធភាពមានកូន មរណភាព ចំណាកស្រុក ព្រមទាំងវិធីសាស្រ្តគណនាផងដែរ ៕