ច្រកព្រំដែនអន្តរជាតិដូង-បានឡែម បើកឱ្យសិស្សឆ្លងកាត់ និងពលករខ្មែរចាកចេញពីថៃ

បាត់ដំបង៖ នៅវេលាម៉ោង៩ព្រឹកថ្ងៃទី២៥ ខែមិថុនា ឆ្នាំ២០២៥នេះ ច្រកទ្វារព្រំដែនអន្តរជាតិដូង ស្រុកកំរៀង ខេត្តបាត់ដំបង និងច្រកទ្វារព្រំដែនអន្តរជាតិបានឡែម ខេត្តច័ន្ទបុរី ប្រទេសថៃ បានបើកដំណើរការច្រកច្រកថ្មើជើង ដើម្បីឱ្យពលករខ្មែរវិលត្រឡប់មកស្រុកកំណើតវិញ និងរៀបចំឱ្យមានរថយន្ត និងក្រុមម៉ូតូកង់បីសម្រាប់ជួយសម្រួលដល់ពលករដែលមានសំភារៈច្រើន។ចំពោះច្រកចរាចរណ៍ទំនិញបានបន្តបិទទាំងស្រុង។

ចំពោះស្ថានភាពច្រកទ្វារព្រំដែនអន្តរជាតិដូង-បានឡែម នៅព្រឹកនេះ មន្រ្តីប្រចាំការបានសម្របសម្រួលអនុញ្ញាតឱ្យសិស្សសាលាចេញ-ចូល នៅវេលាម៉ោង៧ព្រឹកដោយមានសិស្សចេញសរុប ១៩នាក់ ស្រី ១១នាក់ និងសិស្សចូលសរុប១៧នាក់ ស្រី០៩នាក់។

មន្ត្រីក្រសួងការងារ និងបណ្តុះបណ្តាលវិជ្ជាជីវៈ ដែលរួមមានទីភ្នាក់ងារជាតិមុខរបរ និងការងារ (NEA) បេឡាជាតិសន្តិសុខសង្គម (ប.ស.ស.) មន្ទីរការងារ និងបណ្តុះបណ្តាលវិជ្ជាជីវៈ និងមន្ត្រីពាក់ព័ន្ធគ្រប់ផ្នែកដែលប្រចាំការ នៅច្រកព្រំដែនអន្តរជាតិដូង និងមណ្ឌលសំចតច្រកដូង ក្នុងស្រុកកំរៀង ខេត្តបាត់ដំបង បានត្រៀមខ្លួនរួចជាស្រេចក្នុង ការផ្តល់ព័ត៌មានស្តីអំពីឱកាសការងារដ៏សម្បូរបែបការអប់រំបណ្តុះបណ្តាល បច្ចេកទេស និងវិជ្ជាជីវៈ និងអត្ថប្រយោជន៍ ប.ស.ស. ដែលជាការគិតគូររបស់រាជរដ្ឋាភិបាលកម្ពុជាដល់បងប្អូនប្រជាពលរដ្ឋ និងពលករខ្មែរ នៅប្រទេសថៃដែលមាន បំណងវិលត្រឡប់មកស្រុកកំណើតវិញ។

ដោយឡែកច្រកទ្វារព្រំដែនអន្តរជាតិ និងច្រកទ្វារតំបន់ព្រំដែនចំនួន៤ផ្សេង បានសម្របសម្រួលឱ្យសិស្សឆ្លងកាត់ ប៉ុន្តែសម្រាប់ការធ្វើដំណើរ និងការដោះដូរទំនិញត្រូវបានបិទទាំងស្រុង បន្ទាប់ពីភាគីថៃបិទច្រកទ្វារព្រំដែនជាឯកតោភាគី៕