អាជីវករក្នុងស្រុកជលគីរី គាំទ្រការសាងសង់ផ្សារ ដើម្បីមានកន្លែងលក់ដូរត្រឹមត្រូវ មានសោភ័ណភាព អនាម័យ

កំពង់ឆ្នាំង៖ អាជីវករក្នុងស្រុកជលគីរី ខេត្តកំពង់ឆ្នាំង នៅថ្ងៃទី២៥ ខែមិថុនា ឆ្នាំ២០២៥នេះ បានសំដែងនូវការគាំទ្រសប្បាយចិត្ត ពេលពួកគាត់បានឃើញរដ្ឋបាលស្រុកជលគីរី កំពុងសាងសង់ផ្សារថ្មីមួយកន្លែងនៅចំណុចផ្លូវប្រសព្វបែកជាបី ស្ថិតក្នុងភូមិព្រៃគ្រីជើង ឃុំព្រៃគ្រី ស្រុកជលគីរី ខេត្តកំពង់ឆ្នាំង ដែលពីមុននៅក្នុងស្រុកជលគីរី មិនដែលមានផ្សារលក់ដូរនោះឡើយ លក់តែតាមផ្លូវប៉ុណ្ណោះ។

អាជីវករបានអោយដឹងថា៖ ពេលដឹងថា លោក ដូវ គឹមស៊ីន អភិបាលស្រុកជលគីរី បានចាប់ផ្តើមសាងសង់ផ្សារស្រុកជលគីរី អាជីវករទាំងអស់ដែលធ្លាប់លក់ដូរនៅតាមដងផ្លូវ មុខផ្ទះ បានសប្បាយចិត្តគាំទ្រ១០០% ក្នុងការបង្កើតផ្សារនេះ។ ស្រុកជលគីរី តាំងពីមុនមកមិនទាន់មានផ្សារលក់ដូរនឹងគេនៅឡើយ ហើយការលក់ដូរវិញ នៅតាមផ្លូវតូចចង្អៀត ពិបាកអ្នកទិញចេញចូលទិញទំនិញពួកគាត់ ហើយពេលខ្លះក៏មានគ្រោះថ្នាក់ចរាចរផងដែរ។ ការសាងសង់ផ្សារស្រុកជលគីរីនេះ គឺនៅលើទីតាំងដីរដ្ឋ មានផ្លូវប្រសព្វ៣ផ្លូវ មានខ្យល់អាកាសល្អ និងមានប្រជាជនទៅមកមិនដាច់។

លោក ដូវ គឹមស៊ីន អភិបាលស្រុកជលគីរី បានថ្លែងថា៖ ក្រោយពីមានការប្រជុំយល់ព្រមពីបងប្អូនអាជីវករ អាជ្ញាធរភូមិឃុំស្រុក ជំនាញពាក់ព័ន្ធ និងមានការឯកភាពពីឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ក្នុងការអភិវឌ្ឍន័ និងសាងសង់ផ្សារថ្មីមួយជូនបងប្អូនអាជីវករងាយស្រួលក្នុងការលក់ដូរ ងាយស្រួលថែរក្សាអនាម័យបរិស្ថាន មានផាសុខភាព មានកន្លែងចតរថយន្តម៉ូតូត្រឹមត្រូវ ជួយបង្កើនជីវភាពប្រជាពលរដ្ឋ ជាពិសេសជៀសវាងបាននូវករណីគ្រោះថ្នាក់ចរាចរតាមដងផ្លូវ។ នៅក្នុងស្រុកជលគីរីតាំងពីចេញពីមុនមក មិនទាន់មានផ្សារលក់ដូរច្បាស់លាស់នៅឡើយ ដោយសារតែនៅស្រុកនេះ មានទីតាំងជាប់ទន្លេ បឹង និងនៅដាច់ស្រយាលពីគេ ម្លោះហើយការលក់ដូររបស់អាជីវករ គឺលក់នៅតាមផ្លូវសាធារណៈ មុខផ្ទះ ហើយតែងតែមានគ្រោះថ្នាក់ចរាចរណ៍ ពេលមានអគ្គិភ័យឆេះម្តងៗ ពិបាកឡានទឹកចេញចូលជួយពន្លត់។

សូមបញ្ជាក់ថា៖ ស្រុកជលគីរី ខេត្តកំពង់ឆ្នាំង ជាស្រុកមួយនៅតាមដងទន្លេសាប មានព្រំប្រទល់ជាប់ស្រុកបាធាយ ខេត្តកំពង់ចាម, បើសិនគេធ្វើដំណើរទៅស្រុកជលគីរី ត្រូវប្រើមធ្យោបាយកាណូតនៅរដូវទឹកឡើង និងផ្លូវបេតុងនៅរដូវប្រាំង ហើយប្រជាជនប្រកបមុខរបរធ្វើស្រែប្រាំង និងនេសាទ ។ ស្រុកនេះមិនមានផ្សារត្រឹមត្រូវនោះទេ ទើបតែបង្កើតផ្សារថ្មីមួយ នៅចំណុចបឹងពោធិ៍ ភូមិព្រៃគ្រីជើង ឃុំព្រៃគ្រី ប៉ុណ្ណោះ៕ កាំង ហុងវាស្នា