មេឃុំស្វាយ យា ណែនាំដល់ពលរដ្ឋ​មកពីប្រទេសថៃត្រូវទៅចុះឈ្មោះនៅសាលាឃុំ ឬមន្ទីរការងារខេត្តដើម្បីស្វែងរកការងារធ្វើ

​ស្វាយរៀង ៖ លោកសុខ សំអន មេឃុំស្វាយ យា ស្រុកស្វាយជ្រំ ខេត្តស្វាយរៀង នៅក្នុងពិធីសំណេះសំណាលសាកសួរសុខទុក្ខ ជាមួយបងប្អូន ពលរដ្ឋ និងពលករ វិលមកពីប្រទេសថៃ ដោយរងវិបត្តិនយោបាយរវាងកម្ពុជា និងថៃ នៅសាលាឃុំ ថ្ងៃទី ២៥ ខែមិថុនា ឆ្នាំ២០២៥ នេះបានណែនាំដល់ពលរដ្ឋ ពិសេសពលករទាំងអស់ត្រូវ​ទៅចុះឈ្មោះនៅសាលាឃុំ ឬមន្ទីរការងារខេត្ត ដើម្បីស្វែងរកការងារធ្វើបន្ត។

លោកបានបញ្ជាក់បន្ថែមថាខេត្តស្វាយរៀង នាបច្ចុប្បន្ន ក្រោមការដឹកនាំរបស់ប្រមុខរាជរដ្ឋាភិបាលសម្ដេចមហាបវរធិបតីហ៊ុន ម៉ាណែត នាយករដ្ឋមន្ត្រី នៃកម្ពុជាពិសេសតាមរយៈរដ្ឋបាលខេត្ត បានធ្វើការទាក់ទាញក្រុមអ្នកវិនិយោគចូលមកបង្កើតរោងចក្រ សហគ្រាស និងគ្រឹះស្ថានផ្សេងៗបង្កើតការងារផ្ដល់ឲ្យពលរដ្ឋចូលបម្រើការងាររាប់សិបកន្លែង បន្ថែមលើការងាររបស់កម្មករ កម្មការិនី ដែលបានបម្រើការងារហើយជាង១សែននាក់។​

តាមរបាយការណ៍ដែល btv ទទួលបានព័ត៌មានតាមបណ្តាស្រុក ក្រុងចំនួន៤ ក្នុងចំណោមស្រុកក្រុងទាំង ៨ របស់ខេត្តគិតមកដល់ត្រឹមថ្ងៃទី២៤ ខែមិថុនា ឆ្នាំ២០២៥នេះ ពលរដ្ឋ និងពលករខ្មែរវិលមកពីប្រទេសថៃ ដោយវិបត្តិនយោបាយកម្ពុជាថៃមានចំនួន២៦៩នាក់។​ ដោយ ៖ ភា សារិទ្ធ