ថ្ងៃនេះច្រកទ្វារព្រំដែនអន្តរជាតិចាំយាមបន្តបិទ ខណៈនឹងមានការសម្រប​សម្រួល​ពី​មន្រ្ដី​ព្រំដែន​បើ​ពលរដ្ឋ​ខ្មែរចង់ត្រឡប់ពីថៃវិញ

កោះកុង៖ ក្រុមមន្រ្តីប្រចាំការនៅព្រំដែនអន្តរជាតិចាំយាម បានឲ្យដឹងនៅថ្ងៃទី២៥ ខែមិថុនា ឆ្នាំ២០២៥ ថា ខាងភាគីថៃបន្តបានបិទច្រកព្រំដែនជាឯកតោភាគីដដែល ប៉ុន្តែខាងភាគី​ថៃ​នឹង​ធ្វើ​ការ​សម្រប​សម្រួល​ដល់ពលរដ្ឋខ្មែរដែលមានបំណងចាកចេញពីប្រទេសថៃចូលមកកម្ពុជាវិញ។ ចំណែកអ្នកជំងឺធ្ងន់ធ្ងរ និងសិស្សកូន​ប្រជាពលរដ្ឋ​ទាំង​សង​ខាង​អាច​ចេញ​​ចូល​ព្រំដែន​បាន​ទៅ​សាលា​រៀន និងសង្គ្រោះបន្ទាន់ទៅកាន់មន្ទីរពេទ្យនៅប្រទេសថៃ។

ចំណែក​ទំនិញពាណិជ្ជកម្មគ្រប់ប្រភេទ គឺមិនត្រូវអនុញ្ញាតឲ្យចរាចរចេញចូលនោះទេ។ សម្រាប់​ខាង​ភាគី​កម្ពុជា នៅតែបន្តបើកទ្វាររង់ចាំទទួលពលករដែលចាកចេញពីប្រទេសថៃមកកម្ពុជាវិញ និង​រង់ចាំទទួលពលករណាដែលមានបំណងចង់ចូលបម្រើការងាររោងចក្រ ក្នុង​តំបន់​សេដ្ឋកិច្ច​ពិសេស និងរោងចក្រក្នុងស្រុកស្រែអំបិល តាមការជូនដំណឹងរបស់រដ្ឋបាលខេត្តកោះកុង។

ជាមួយ​គ្នានេះក៏សង្កេតឃើញថា ពលករខ្មែរដែលធ្វើការនៅប្រទេសថៃ បានបន្តវិល​ត្រឡប់​មក​ស្រុក​កំណើត​វិញ តាមច្រកទ្វារព្រំដែនអន្តរជាតិចាំយាម នៅថ្ងៃទី ២៥ ខែមិថុនា ឆ្នាំ ២០២៥​នេះ​ផង​ដែរ៕ អត្ថបទ៖ ឈឹម មករា