ក្រុមហ៊ុនកូរ៉េ បានកំពុងចូលរួមចំណែកដល់ការអភិវឌ្ឍន៍ និងគាំទ្រដល់សេដ្ឋកិច្ចកម្ពុជា

ភ្នំពេញ ៖ កម្ពុជា-កូរ៉េ ជាប្រទេសដែលមានទំនាក់ទំនងល្អ និងបានពង្រឹង និងពង្រីក​នូវ​កិច្ច​សហ​ប្រតិបត្តិការ​លើ​គ្រប់​វិស័យ ជាពិសេសការវិនិយោគ ខណៈបច្ចុប្បន្នក្រុមហ៊ុនកូរ៉េជា​ច្រើន​ដែល​បណ្តាក់ទុន​​វិនិ​យោគ​​​នៅកម្ពុជា បាននឹងកំពុងចូលរួមចំណែកដល់ការអភិវឌ្ឍន៍ និងជួយគាំទ្រ ដល់​កំណើន​សេដ្ឋកិច្ច​ប្រទេសកម្ពុជា។

ឯកឧត្តម Park Jung-Wook ឯកអគ្គរដ្ឋទូត នៃសាធារណរដ្ឋកូរ៉េប្រចាំកម្ពុជា នៅ​ក្នុង​កិច្ច​សន្ទនា​លើក​ទី២ រវាងរដ្ឋ និងវិស័យ ឯកជន កម្ពុជា-កូរ៉េ ដែលធ្វើឡើងនៅក្រុមប្រឹក្សាអភិវឌ្ឍន៍កម្ពុជា ថ្ងៃ​ទី​២៥ ខែមិថុនា ឆ្នាំ២០២៥ នេះថា ឯកឧត្តមបានបង្ហាញនូវសេចក្ដីសោមនស្សរីករាយក្រៃលែង ដែល​បានសហការរៀបចំកិច្ចសន្ទនានេះ ក្នុងគោលដៅរួមគ្នាពិនិត្យ និងពិភាក្សា​អំពី​បរិយាកាស​វិនិយោគ​នៅ​កម្ពុជា ក៏ដូចជាចូលរួមចំណែកក្នុងការកែលម្អបរិស្ថានធុរកិច្ច សំដៅពង្រឹង និង​ពង្រីក​វត្ត​មាន​របស់សហគ្រាសកូរ៉េឱ្យមកបណ្តាក់ទុនវិនិយោគនៅលើទឹកដីកម្ពុជាបន្ថែមទៀត។

ឯកឧត្តមឯកអគ្គរដ្ឋទូត បន្តថា ជុំវិញឱកាសវិនិយោគវិញឃើញថា វិនិយោគិន​កូរ៉េ​បាន​ចូល​មក​កម្ពុជា​មាន​ជាបន្តបន្ទាប់ ដើម្បី សិក្សា និងស្វែងរកឱកាសវិនិយោគ ចំណែកក្រុមហ៊ុនកូរ៉េ​ដែល​បាន​និង​កំពុង​វិនិយោគនៅកម្ពុជា ដោយក្រុមហ៊ុនទាំងអស់នោះ បាន ចូលរួមចំណែក​ផ្តល់​លទ្ធភាព​ការងារ និងប្រាក់ចំណូលជូនប្រជាជនកម្ពុជា ជាពិសេសបាន​ចូល​រួម​ចំណែក​ដ​ល់​កំណើន​សេដ្ឋ​កិច្ចប្រទេសកម្ពុជាផងដែរ។ ដោយឡែកកិច្ចសន្ទនាលើកទី២ រវាងរដ្ឋនិងវិស័យឯកជន កម្ពុជា-កូរ៉េ​នេះ គឺជាការពង្រឹងនិងពង្រីក ដើម្បី ជំរុញកិច្ចសហប្រតិបត្តិការសេដ្ឋកិច្ច ពាណិជ្ជកម្ម និង​ការ​វិនិយោគ ព្រមទាំងធ្វើឱ្យប្រសើរឡើងនូវទំនាក់ទំនងសេដ្ឋកិច្ច បរិយាកាសវិនិយោគ និងកសាង​ជំនឿ​ទុក​ចិត្តពីសំណាក់សហគមន៍ធុរកិច្ចកូរ៉េ សំដៅជំរុញការវិនិយោគបន្ថែមទៀតមកកម្ពុជា។

ទាក់ទិនកិច្ចសន្ទនានេះដែរ ភាគីទាំងពីរ ដែលកម្ពុជាដឹកនាំដោយ ឯកឧត្តម ស៊ុន ចាន់ថុល ឧប​នាយក​រដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា និងភាគីកូរ៉េដឹកនាំដោយ ឯកឧត្តម Park Jung-Wook ឯកអគ្គរដ្ឋទូត នៃសាធារណរដ្ឋកូរ៉េប្រចាំកម្ពុជា បានពិភាក្សា​នូវ​រាល់​កង្វល់​របស់​វិនិយោគិនកូរ៉េ ព្រមទាំងបានដោះស្រាយបញ្ហាប្រឈមដែលនៅសេសសល់ ជូន​វិនិយោគិន​កូរ៉េ​បានយ៉ាងផុលផុសផងដែរ។

សូមបញ្ជាក់ថា ទាក់ទិនការធ្វើពាណិជ្ជកម្មទ្វេភាគីរវាងកម្ពុជា-កូរ៉េវិញ ឃើញថា នៅក្នុងរយៈ៥ ខែ ឆ្នាំ​២០២៥ ការធ្វើពាណិជ្ជកម្ម ប្រទេសទាំងពីរ មានទំហំទឹកប្រាក់ប្រមាណ ៣៦២ លាន​ដុល្លារ​អាមេរិក បានកើនឡើង ១១ ភាគរយ ធៀបនិងរយៈពេលដូចគ្នា ឆ្នាំ២០២៤ ដោយ​ក្នុងនោះ​កម្ពុជា​បាន​នាំចេញទំនិញ មានទឹកប្រាក់ជាង ១២៤ លានដុល្លារ ខណៈការនាំចូលពីកូរ៉េ មាន​ទឹក​ប្រាក់​ជាង​ ២៣៨ លានដុល្លារអាមេរិក៕ អត្ថបទ៖ សុន រ៉ាឌី