រោងចក្រសហគ្រាសជាច្រើនប្រកាសជ្រើសរើសកម្លាំងពលកម្មបន្ទាន់ និងលើកទឹកចិត្ត​ខ្ពស់​ដល់​ពលករ​ត្រឡប់ពីថៃ

យោងតាមសេចក្តីប្រកាសព័ត៌មាននានា ក៏ដូចជាដំណឹងជ្រើសរើសកម្មករនិយោជិត បណ្តា​ក្រុមហ៊ុន សហគ្រាស បានបង្ហាញត​ម្រូវ​ការ​កម្លាំង​ពលកម្ម​រាប់​រយ​ពាន់​កន្លែង​ដើម្បី​ឆ្លើយ​តប​តម្រូវ​ការ​នៃ​ការ​កើន​ឡើងរបស់អ្នកបញ្ជាទិញពីទីផ្សារអន្តរជាតិ ក្នុងនោះបណ្ដារោងចក្រ​បាន​ផ្ដល់​ការ​លើក​ទឹក​ចិត្ត​ខ្ពស់ចំពោះពលករដែលវិលត្រឡប់ពីថៃហើយចង់ស្វែងរកការងារធ្វើ។

ក្នុងបទសម្ភាសន៍រវាងព័ត៌មានប៊ីធីវីនៅព្រឹកថ្ងៃ​ទី២៦ខែមិថុនានេះ លោក លី គឹមស្រៀង ប្រធាន​រដ្ឋបាល​រោង​ចក្រកាត់ដេរស្បែកជើង ហ្គោលដេន ប្រស្ពើរ ស្ថិតនៅផ្លូវជាតិលេខ៤ ខណ្ឌកំបូល រាជ​ធានី​ភ្នំពេញ បានប្រាប់ឱ្យដឹងថា សព្វថ្ងៃនេះមិនថាតែក្នុងរោងចក្ររបស់លោកមួយប៉ុណ្ណោះទេ សូម្បី​រោង​ចក្រផ្សេងៗ​ទៀត ដែលជាសមាជិកក្នុងសមាគមវិស័យឧស្សាហកម្មកាត់ដេរ ក៏​បាន​ប្រកាស​ជា​ហូរ​ហែអំពីតម្រូវការកម្លាំងពលកម្ម ដូចជានៅខេត្តស្វាយរៀង កំពង់ចាម និង​ព្រះសីហនុ​ជា​ដើម ដោយសារោងចក្រមានការបញ្ជាទិញច្រើន ក៏ដូចជា​ការ​ពង្រីក​អគារ​បន្ថែម​ជា​ដើម​ ក្នុងនោះត្រូវការជំនាញផ្នែកដេរ ផ្នែកតុកាត់ ផ្នែកពិនិត្យគុណភាព និងអ្នក​បក​ប្រែ​ភាសា​ចិន​ជាដើ​ម​។

លោកប្រធានរដ្ឋបាលរូបនេះ បានបញ្ជាក់ថា ចំពោះប្រាក់ចំណូលប្រចាំខែ កម្មករនិយោជិត នឹង​អាច​ទទួល​បានចាប់ពីជាង ២០០ដុល្លារឡើងទៅ ឬឈានរហូតដល់ ១ពាន់ដុល្លារ ក្នុងមួយខែ ទៅ​តាម​ជំនាញ និងមុខតំណែង។ លោកបន្ថែមទៀតថា ក្រៅពីប្រាក់ឈ្នួលអប្បបរមាកម្មករនិយោជិត នឹង​ទទួលបានការបូកបន្ថែមជាមួយអត្ថប្រយោជន៍ផ្សេងៗ មានដូចជា ប្រាក់រង្វាន់ធ្វើការទៀងទាត់ ប្រាក់​ថ្លៃ​បាយ និងប្រាក់ស្នាក់នៅ និងធ្វើដំណើរជាដើម។

កម្មករ កម្មការិនី ដែលកំពុងបម្រើការងារក្នុងវិស័យរោងចក្រមិនក្រោមរយៈពេល១០ឆ្នាំមកនេះ បាន​រៀប​រាប់ឱ្យដឹងថា ការងារក្នុងវិស័យនេះធ្វើឱ្យពួកគាត់មានការរីកចម្រើនច្រើន ទាំង​ការ​ងារ​ និង​ការ​រស់នៅដូចសព្វថ្ងៃនេះ ដោយសារមានប្រាក់ចំណូលទៀងទាត់ និងការងារ​ធ្វើ​ជា​ប់​ជា​ប្រចាំ​។ ពួកគាត់បានលើកឡើងស្រដៀងគ្នាទៀតថា ក្រៅពីប្រាក់ឈ្នួលដែលបើកទៀងទាត់នេះដែរ ក៏​ទទួល​បាន​ការយកចិត្តទុកដាក់ខ្ពស់ពីសំណាក់រាជរដ្ឋាភិបាល និងថៅកែរោងចក្រ ដែលតែង​តែ​ដំឡើង​ប្រាក់​ឈ្នួលអប្បបរមាជារៀងរាល់ឆ្នាំ និងការផ្តល់នូវរបបសន្តិសុខសង្គម ជា​ពិសេស​នៅពេ​ល​មាន​បញ្ហាសុខភាព គឺមិនអស់ប្រាក់នោះទេក្នុងការពិនិត្យ និងព្យាបាលជំងឺ តាមរយៈប័ណ្ណ ប.ស.ស. ។

ជាមួយគ្នានេះ ខណៈដែលកម្ដៅវិវាទព្រំដែន រវាងកម្ពុជា-ថៃ និង​ឈាន​ដល់​ការ​បិទ​ច្រក​ព្រំដែន​ជា​ឯក​តោ​ភាគី​របស់ភាគីថៃបន្ថែមទៀតនោះ កម្មករ កម្មការិនី បានអំពាវនាវទៅដល់ពលករខ្មែរ ដែល​បាន​វិលត្រឡប់ពីប្រទេសថៃវិញ ក៏ដូចជាមានបំណងវិលត្រឡប់ពីប្រទេសថៃ អាច​ធ្វើ​ការ​នៅ​ក្នុ​ង​ស្រុក​វិញបាន ព្រោះថា បានរស់នៅជួបជុំគ្រួសារ ហើយប្រាក់ឈ្នួលក៏មិនខុសគ្នាច្រើនដែរ។

យោង​តាម​ក្រសួងការងារ និងបណ្តុះបណ្តាលវិជ្ជាជីវៈ គិតត្រឹមថ្ងៃទី២០ ខែមិថុនា ឆ្នាំ២០២៥ កម្ពុជា​មានឱកាសការងារប្រមាណជាង ២៥ម៉ឺនកន្លែង ពីក្រុមហ៊ុន សហគ្រាស និង​រោង​ចក្រ​ទូទាំង​ប្រទេសហើយទីភ្នាក់ងារជាតិមុខរបរ និងការងារ (NEA) កំពុងតែបន្ត​ប្រមូល​នូវ​ឱកាស​ការងារ​ពី​បណ្តា​ក្រុមហ៊ុនតូច-ធំ សហគ្រាស និងរោចក្រ ចាស់ ថ្មីបន្ថែមទៀត​សម្រាប់​ត្រៀម​ជូន​បង​ប្អូនប្រជា​ពលរដ្ឋជាពិសេសពលករខ្មែរ៕ អត្ថបទ៖ ឈិត បូរ៉ាវី