សម្ដេចតេជោ៖ ថៃគួរអនុវត្តនយោបាយឈ្នះ-ឈ្នះជាមួយកម្ពុជា ដូចជំនាន់លោក ប្រាយុទ្ធ ច័ន្ទអូចា

ក្នុងឱកាសសំណេះសំណាលជាមួយសមាជិកក្រុមប្រឹក្សាខេត្ត ក្រុង ស្រុក ឃុំ សង្កាត់ ពីខេត្តព្រះវិហារព្រឹកនេះដែរ សម្ដេចតេជោ ហ៊ុន សែន បានថ្លែងថា ថៃកំពុងលេងល្បែងនយោបាយចាញ់-ចាញ់ ជាមួយកម្ពុជា ដែលនាំឱ្យស្ថានភាពទ្វេភាគីទៅជាលំបាកកាន់តែខ្លាំងឡើងពីមួយថ្ងៃទៅមួយថ្ងៃ ខណៈថៃដែលធ្លាប់នាំចេញទំនិញមកកម្ពុជា ជាង៥ពាន់លានដុល្លារ ក៏ត្រូវខាតបង់ ឯកម្ពុជាដែលនាំចេញទំនិញទៅថៃជាង១ពាន់លានដុល្លារក៏ខាតបង់។ ប៉ុន្តែបើពិនិត្យមើលទំហំពាណិជ្ជកម្មនេះថៃអាចខាតបង់ច្រើនជាងកម្ពុជា។

សម្ដេចតេជោបានរម្លឹកថា ថៃគួរតែលេងនយោបាយឈ្នះ-ឈ្នះទាំងអស់គ្នា ជាមួយកម្ពុជា ដូចគ្រាដែលលោក ប្រាយុទ្ធ ច័ន្ធអូចា ដឹកនាំប្រទេសថៃ ចាប់តាំងពីឆ្នាំ២០១៤ ដល់ឆ្នាំ២០២៣។ បើតាមសម្ដេច ជំនាន់ក្រោមការដឹកនាំរបស់លោក ប្រាយុទ្ធនេះ គឺស្ថានភាពភាគីទាំងពីរ មានសន្តិភាព និងស្ថិរភាព ទំនាក់ទំនងល្អច្រើន។

សម្ដេចតេជោ បានលើកឡើងថា លោកស្រី មេដឹកនាំថៃបច្ចុប្បន្ន អាងអីតែការគំរាម ប៉ុន្តែសម័យបច្ចុប្បន្ននេះ មិនអាចគំរាមមើលងាយកម្ពុជាបានទេ រាប់ទាំងការគំរាមផ្នែកយោធាផងដែរ។ នេះជាការបញ្ជាក់របស់សម្ដេច ហ៊ុន សែន ដែលបានបន្ថែមថា កម្ពុជា មិនអាចឱ្យនរណាម្នាក់ មើលងាយបានឡើយ៕