គិតត្រឹមថ្ងៃទី២៨ខែមិថុនានេះ ប្រជាពលរដ្ឋខ្មែរនៅថៃ បន្តវិលត្រឡប់ចូលស្រុកកំណើតវិញ ដោយទឹកមុខសប្បាយរីករាយ

ភ្នំពេញ៖ ឯកឧត្តមរដ្ឋមន្ត្រី ឌិត ទីណា និងជាប្រធានក្រុមការងារចុះជួយមូលដ្ឋានខេត្តបន្ចាយមានជ័យ និងឯកឧត្តម អុំ រាត្រី អភិបាល នៃគណៈអភិបាលខេត្តបន្ចាយមានជ័យ ព្រមទាំងថ្នាក់ដឹកនាំតាមស្ថាប័នពាក់ព័ន្ធ បានអញ្ជើញចុះមកត្រួតពិនិត្យស្ថាភាពជាក់ស្តែងទូទៅនៅច្រកទ្វារអន្តរជាតិប៉ោយប៉ែត នៅរសៀលថ្ងៃទី២៨ ខែមិថុនានេះ។

យោងតាមក្រុមការងារចុះជួយមូលដ្ឋានខេត្តបន្ចាយមានជ័យ បានឱ្យដឹងថា ឯកឧត្តមរដ្ឋមន្រ្តី និងឯកឧត្តមអភិបាលខេត្តបន្ទាយមានជ័យ បានទទួលស្វាគមន៍បងប្អូនពលករខ្មែរ ដែលនៅបន្តចាកចេញពីថៃវិលចូលស្រុកកំណើតវិញ។

មន្រ្តីនៅច្រកទ្វារអន្តរជាតិប៉ោយប៉ែត បានបញ្ជាក់ថា អាជ្ញាធរកម្ពុជាទទួលបងប្អូនខ្មែរទាំងអស់ ឲ្យតែភាគីថៃបើកទ្វារអនុញ្ញាតឲ្យពួកគាត់វិលមកវិញ។

ប្រភពដដែលនេះ បានបញ្ជាក់ឱ្យដឹងទៀតថា គិតត្រឹមថ្ងៃទី២៨ ខែមិថុនា ឆ្នាំ២០២៥នេះ នៅ​មានបងប្អូនខ្មែរជាពលករ ចាកចេញពីថៃវិលចូលស្រុកវិញជាបន្តបន្ទាប់ ហើយសម្រាប់​ជនជាតិថៃ ដែលធ្វើការនៅទីក្រុងប៉ោយប៉ែត ចង់វិលទៅថៃវិញ អាជ្ញាធរកម្ពុជាបើកទ្វារជូនដូចគ្នា៕