ពលករខ្មែរដែលត្រឡប់មកពីប្រទេសថៃ សម្តែងការអរគុណដល់រាជរដ្ឋាភិបាល ដែលបានផ្ដល់ឱកាសការងារដល់ពួកគាត់

ពលករខ្មែរជាច្រើននាក់ដែលទើបត្រឡប់មកពីប្រទេសថៃ បានសម្តែងការអរគុណដល់រាជរដ្ឋាភិបាលកម្ពុជា ដែលបានផ្ដល់ឱកាសការងារភ្លាមៗដល់ពួកគាត់។ ខណៈមួយចំនួនបានជាប់ការងារថ្មីនៅក្នុងវិស័យរោងចក្រ និងមួយចំនួនផ្សេងទៀតបានចុះឈ្មោះដើម្បីរៀនជំនាញបច្ចេកទេស និងវិជ្ជាជីវៈ (ធីវ៉េត) ដើម្បីឆ្លើយតបតម្រូវការទីផ្សារការងារ។

ឯកឧត្តម ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ប្រាប់ព័ត៍មាន ប៊ីធីវី ឱ្យដឹងថា រហូតមកដល់ពេលនេះ ក្រសួងការងារ និងបណ្ដុះបណ្ដាលវិជ្ជាជីវៈ ដែលរួមមាន ទីភ្នាក់ងារជាតិមុខរបរ និងការងារ (NEA) បេឡាជាតិសន្តិសុខសង្គម (ប.ស.ស.) មន្ទីរការងារ និងបណ្តុះបណ្តាលវិជ្ជាជីវៈ និងអង្គភាពពាក់ព័ន្ធនៅបណ្តាច្រកព្រំដែនកម្ពុជា-ថៃ បានបំពេញតួនាទីយ៉ាងល្អប្រសើរ ក្នុងការផ្ដល់ព័ត៌មានស្ដីអំពីឱកាសការងារ ការអប់រំបណ្ដុះបណ្ដាលបច្ចេកទេសនិងវិជ្ជាជីវៈ និងអត្ថប្រយោជន៍របស់ ប.ស.ស. ដល់បងប្អូនប្រជាពលរដ្ឋ ជាពិសេសពលករខ្មែរដែលបានវិលត្រឡប់មកស្រុកកំណើតវិញ។

ឯកឧត្តមអ្នកនាំពាក្យ បានអំពាវនាវដល់ប្រជាពលរដ្ឋខ្មែរនៅក្រៅប្រទេស ពិសេសប្រទេសថៃ សូមវិលមកកាន់កម្ពុជាវិញ ប្រសិនបើគេមិនឱ្យតម្លៃ។ ឯកឧត្តម បានបន្តទៀតថា ការស្នើមកកាន់​កម្ពុជា​វិញនេះ មានន័យថា វិលមកស្រុកកំណើតវិញ វិលមកជួយប្រទេសជាតិវិញ ដោយសារបងប្អូន​កំពុងតែពេញកម្លាំង កំពុងតែមានជំនាញបច្ចេកទេស១០-២០ឆ្នាំហើយ សូម យកចំណេះជំនាញ​ទាំងអស់នេះវិលមកស្រុកកំណើតវិញ កសាងប្រទេសជាតិយើងវិញ ខណៈប្រាក់បៀវត្សរ៍​ក៏ប្រហាក់ប្រហែលគ្នា ហើយនៅកម្ពុជាមានការគាំពារខាងផ្នែកសុខភាពច្រើនជាង មាន​ប្រាក់សោធន និងមានប្រាក់គ្រោះថ្នាក់ការងារ។មួយវិញទៀត នេះក៏ជាឱកាសក្នុងការបង្កើតកម្លាំង​សេដ្ឋកិច្ចកម្ពុជាផងដែរ។

ក្រុមពលករខ្មែរដែលទើបត្រឡប់មកពីប្រទេសថៃ ដែលទទួលបានឱកាសការងារថ្មីនៅរោងចក្រ​ផ្សេងៗគ្នា តាមរយៈទីភ្នាក់ងារជាតិមុខរបរ និងការងារ (NEA) បានអំពាវនាវទៅដល់​ពលករខ្មែរ​ដែលទើបត្រឡប់មកពីប្រទេសថៃ ហើយចង់ទទួលបាន​ការងារ​ធ្វើ សូមទាក់ទងរកការងារតាម NEA ដែលមានការងារថ្មីៗជាច្រើនកន្លែង ពីក្រុមហ៊ុនតូច-ធំ សហគ្រាស និងរោងចក្រទូទាំងប្រទេស។

ក្រសួងការងារ និងបណ្តុះបណ្តាលវិជ្ជាជីវៈបានបញ្ជាក់ថា ចំពោះបងប្អូនពលករដែល​ចង់បាន​ឱកាសការងារធ្វើ សូមទំនាក់ទំនងទៅកាន់ទីភ្នាក់ងារជាតិមុខរបរ និងកា (NEA) ឬទាក់ទងសួរ​ព័ត៌មានដោយផ្ទាល់តាមរយៈលេខទូរសព្ទ Hotline 1297 ឬ 077 23 23 78 / 016 78 66 55 (Telegram) និងទំព័រ Facebook (neakhmer)៕ អត្ថបទ៖ ឈិត បូរ៉ាវី