កម្ពុជានឹងអនុវត្តគម្រោងទាក់ទាញទេសចរណ៍តំបន់ប្រាសាទសំបូរព្រៃគុក ជាតំបន់ទេសចរណ៍គំរូ

កម្ពុជានិងអនុវត្តគម្រោងលើកកម្ពស់ភាពទាក់ទាញទេសចរណ៍តំបន់ប្រាសាទសំបូរព្រៃគុក និង​តំបន់​ជុំវិញ ជាតំបន់ទេសចរណ៍គំរូ និងជាគោលដៅទេសចរណ៍ដ៏លេចធ្លោ សម្រាប់ខេត្តកំពង់ធំ ដើម្បី​ទាក់ទាញភ្ញៀវទេសចរឱ្យចូលទស្សនាកម្សាន្ត នៅគោលដៅអន្តរខេត្តនេះ មុន​នឹង​ទៅ​ដល់​បណ្តា​ខេត្ត​ដែល​នៅជុំវិញ។

ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្រ្តីទទួលបន្ទុក ទីស្តីការគណៈរដ្ឋមន្ត្រី និង​ជា​ប្រធាន​ក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ ក្នុងកិច្ចប្រជុំក្រុមការងារសិក្សា និង​អនុវត្ត​គម្រោងលើកកម្ពស់ភាពទាក់ទាញទេសចរណ៍ តំបន់ប្រាសាទសំបូរ ព្រៃគុក និងតំបន់ជុំវិញ នៅ​ថ្ងៃ​ទី២៧ ខែមិថុនា ឆ្នាំ២០២៥ នេះថា បានណែនាំដល់ក្រុមការងារ ក្នុងការរៀប​ចំ​គម្រោង​ខា​ង​លើ ដោយផ្ដោតសំខាន់លើផលិតផលទេសចរណ៍ធនធានមនុស្ស ហេដ្ឋារចនាសម្ព័ន្ធ ថែម​ទាំង​ត្រូវ​គិត​គូរពីការវិនិយោគរកប្រាក់ចំណូល ដើម្បីបែងចែកផល ដែលទទួលបាន​ដល់​ប្រជា​ពលរដ្ឋ​សហគមន៍​ក្នុង​គោលដៅធានានូវបរិយាបន្ន និងចីរភាពនៃការអភិវឌ្ឍន៍។

ឯកឧត្តមឧបនាយករដ្ឋមន្ត្រី បានផ្តល់អនុសាសន៍ជាទស្សនទាន នៃការកែសម្រួលឡើងវិញ ដោយ​ផ្ដោត​លើ​ចំណុច​ស្នូលប្រាសាទសំបូរព្រៃគុក ចំណែកផែនការរៀបចំតំបន់ជុំវិញ ត្រូវគិតគូរ​អាទិភា​ព​ចំណុច​ដែល​ហុច​ផលរហ័ស និងប្រើប្រាស់ថវិកាតិចជាអាទិភាពបន្ទាប់ ដែលជាផែនការ​រយៈ​ពេល​វែង​ ដែលត្រូវសិក្សាឱ្យបានលម្អិត ព្រមទាំងរកដៃគូនិងវិស័យឯកជនចូលរួមវិនិយោគផងដែរ។ ជាមួយគ្នានេះ ក្រុមការងារសិក្សា និងអនុវត្ត​គម្រោង​លើក​កម្ពស់​ភាព​ទាក់​ទាញ​ទេសចរណ៍​តំបន់​ប្រាសាទ​សំបូរ​ព្រៃគុក និងតំបន់ជុំវិញ ត្រូវគិតគូរកែសម្រួល Brand Name ឬ Motto ដែល​មាន​លក្ខណៈ​ពិសេស និងសមស្របសម្រាប់យុទ្ធនាការផ្សព្វផ្សាយ, មាតិកា, យន្តការផ្សព្វផ្សាយ ព្រម​ទាំង​សហការជាមួយក្រសួង ស្ថាប័នពាក់ព័ន្ធ ដើម្បីរៀបចំ​គម្រោង​អភិវឌ្ឍ​ជំនាញ​ទេស​ចរណ៍​ទៅ​តាម​កម្រិត ជាពិសេសការបណ្តុះ បណ្ដាលជំនាញបដិសណ្ឋារកិច្ច និងម្ហូបអាហារ។

ឯកឧត្តមឧបនាយករដ្ឋមន្ត្រីប្រចាំការ និងជា​ប្រធាន​ក្រុម​ការងារ​រាជ​រដ្ឋាភិបាល​ចុះ​មូល​ដ្ឋាន​ខេត្ត​កំពង់​ធំ ​ក៏បានផ្ដល់នូវការណែនាំ ដល់រដ្ឋបាលខេត្ត និងអាជ្ញាធរជាតិសំបូរព្រៃគុក ត្រូវស្នើសុំ​កិច្ច​សហការ​ជាមួយក្រសួង-ស្ថាប័នពាក់ព័ន្ធ ដើម្បីកសាងមូលដ្ឋាន នៃភាពទាក់ ទាញទេសចរណ៍ ដោយ​ផ្ដោតសំខាន់ជារួមលើ ផ្លូវថ្នល់ ទឹកស្អាត អគ្គិសនីនិង អ៊ិនធឺណិត ដែលជាត​ម្រូវ​ការ​ចាំ​បាច់​របស់​ភ្ញៀវទេសចរ មិនថាភ្ញៀវជាតិ ឬអន្តរជាតិ។ ទន្ទឹមនេះ ក៏ត្រូវគិតគូរ​រៀប​ចំ​មជ្ឈ​មណ្ឌល​ព័ត៌មាន សម្រាប់បង្ហាញវីដេអូពីប្រវត្តិសំខាន់ៗ ទាក់ទងនឹងប្រវត្តិសាស្ត្រចេនឡា និងប្រាសាទ ក៏​ដូច​ជា​តំបន់ជុំវិញ ជូនភ្ញៀវទេសចរ មុននឹងចូលទស្សនាប្រាសាទ និងរៀបចំកន្លែងចំណត និង​សេវា​ផ្សេងៗទៀតឱ្យបានល្អប្រសើរបន្ថែមទៀត។

ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ បានស្នើដល់ក្រុមការងារ លើការ​រៀបចំ​យន្ត​ការ​ប្រតិបត្តិ​ ដើម្បីអនុវត្តគម្រោង ខាងលើ និងការរៀបចំ​នូវ​វិធានការ​គន្លឹះ​ជា​ចង្កោម​មុន​ក្រោយ​ និង​ផែន​ការ​សកម្មភាព ដើម្បីឱ្យទទួលបានលទ្ធផលជាក់ស្ដែង៕ អត្ថបទ៖ សុន រ៉ាឌី