ក្រសួងប្រៃសណីយ៍ ថ្កោលទោស​ដាច់​អហង្ការចំពោះជនអគតិ​យករូបវីដេអូ​សំណេះសំណាល​របស់​​សម្ដេចតេជោ​​ទៅកាត់តជាមួយសំឡេងក្លែងបន្លំដោយប្រើប្រាស់បញ្ញាសិប្បនិម្មិត

ក្រសួងប្រៃសណីយ៍និងទូរគមនាគមន៍ (ក.ប.ទ.) ចេញញ្ញត្តិ​ថ្កោល​ទោស​យ៉ាង​ដាច់​អហង្ការ​ចំពោះ​ជន​អគ​តិដែលបានយករូបវីដេអូនៃការសំណេះសំណាលរបស់ សម្ដេច​អគ្គ​មហា​សេនា​បតី​តេជោ ​ប្រធានព្រឹទ្ធសភា ជាមួយមន្ត្រីរាជការខេត្តព្រះវិហារកាលពីថ្ងៃទី២៧ ខែមិថុនា ឆ្នាំ២០២៥ ទៅ​កាត់​តជាមួយសំឡេងក្លែងបន្លំដោយប្រើប្រាស់បញ្ញាសិប្បនិម្មិត។

តាមរយៈញ្ញត្តិថ្កោលទោសដែលចេញផ្សាយនាថ្ងៃទី២៩ខែមិថុនាម្សិលមិញ ក.ប.ទ.បានលើកឡើងថា ​ការ​​បង្កើត​វីដេអូ​ក្លែង​បន្លំ​បែប​នេះ ជាការ​បង្កើត​ព័ត៌មាន​មិន​ពិត​ និង​ជា​អំពើ​ទុច្ចរិត​ដែល​មិ​ន​គួរ​អនុញ្ញាត​ឱ្យ​កើត​មាន​លើ​បណ្ដាញ​សង្គមឌីជីលគ្រប់ប្រភេទ ហើយជនបង្កត្រូវ​ទទួល​ខុស​ត្រូវ​ចំពោះ​មុខ​ច្បាប់​ជា​ធរមាន។

កន្លងមក ក.ប.ទ. ធ្លាប់បានជូនដំណឹង​ឱ្យ​សាធារណ​ជន​ទាំង​អស់​ប្រុង​ប្រយ័ត្ន​អំពី​ករ​ណី​ឆបោក​ដោយ​ប្រើ​ប្រាស់​បញ្ញាសិប្បនិម្មិតក្លែងបន្លំជាសំឡេងសមាជិកក្រុមគ្រួសារឬមិត្តភក្ដិ។ ដូចគ្នានេះ ក.ប.ទ. សូមអំពាវនាវដល់សាធារណជនទាំងអស់់មេត្តាបង្កើនការប្រុងប្រយ័ត្នខ្ពស់ចំពោះវីដេអូ សំឡេង និងរូបភាពទាំងឡាយដែលមានសភាពខុសប្រក្រតី ហើយត្រូវ​ផ្ទៀង​ផ្ទាត់​ដំណឹង​ដែល​ទទួល​បាន​ជា​មួយនឹងប្រភពផ្លូវការរបស់ក្រសួង ស្ថាប័នរដ្ឋ និងស្ថាប័នសារព័ត៌មានផ្លូវការ។

ទន្ទឹមនេះ ក.ប.ទ. បាន​អំពាវនាវដល់គ្រប់ថ្នាលទំនាក់ទំនងឌីជីថល និងអ្នកបង្កើតមាតិកាឌីជីថល ចូល​រួមលុបបំបាត់វីដេអូក្លែងបន្លំនេះ និងគ្រប់ព័ត៌មានក្លែងក្លាយ និងចាត់វិធាន​ការ​ម៉ឺងម៉ាត់​ចំពោះ​ជ​​នដែ​លបានប្រព្រឹត្ត៕