ច្រកព្រំដែនអន្តរជាតិចាំយាម ស្ថានភាព​ស្ងប់ស្ងាត់ ខណៈភាគីទាំងពីរ បានសម្រួលឲ្យមានការចាកចេញនូវប្រជាពលរដ្ឋរៀងៗខ្លួន

កោះកុង៖ តាមការផ្ដល់ព័ត៌មានពីមន្ត្រីព័ត៌មានប្រចាំការនៅច្រកព្រំដែនអន្តរជាតិចាំយាម បានឱ្យដឹងថា ស្ថានភាពច្រកអន្តរជាតិចាំយាមខេត្តកោះកុង នៅព្រឹកថ្ងៃទី ៣០ ខែមិថុនា ឆ្នាំ ២០២៥ ច្រកទ្វារអន្តរជាតិ ហាតឡេក ស្រុកខ្លងយ៉ៃ ខេត្តត្រាត នៅបន្តបិទជាឯកតោភាគី។ ចំណែកឯខាងភាគីកម្ពុជា ច្រកព្រំដែនអន្តរជាតិចាំយាម នៅតែអនុវត្តតាមគោលការណ៍​របស់​រាជរដ្ឋាភិបាល គឺមិនអនុញ្ញាតឲ្យមានការនាំចូលនូវទំនិញគ្រប់ប្រភេទមកកម្ពុជាឡើយ។ ប៉ុន្តែភាគីទាំងពីរបានសម្របសម្រួលឲ្យមានការចាកចេញពីប្រទេសប្រជាពលរដ្ឋ ពលកររៀងៗខ្លួន។

ក្រុមការងាររបស់រដ្ឋបាលខេត្តកោះកុង នៅតែបន្តទទួល​ពលករ​ខ្មែរ ​និង​សម្របសម្រួល​ដឹកជញ្ជូន​ទៅ​កាន់មណ្ឌលសុវត្ថិភាព ​ព្រមទាំង​ផ្ដល់​ការងារ​ដល់ពលករណាដែលមានបំណងចង់​បម្រើការងារ និងរោងចក្រនៅក្នុងខេត្តកោះកុង។ ទៀតសោត ក្រុមការងារនៃមន្ទីរសុខាភិបាលខេត្តកោះកុង នៅរង់ចាំពិនិត្យសុខភាពជូនពលករ ដែលបានចាកចេញពីប្រទេសថៃ ដោយមានការយក​ចិត្តទុកដាក់ខ្ពស់។ ស្ថានភាពសន្តិសុខ ​មានភាព​ស្ងប់ស្ងាត់ គ្មានអ្វីកើតឡើង​គួរឲ្យកត់​សម្គាល់នោះទេ។