រដ្ឋមន្ត្រីក្រសួងការងារចុះពិនិត្យស្ថានភាពពលករវិលមកពីថៃតាមច្រកប៉ៃលិន និងណែនាំពី​ឱកាស​ការងារ

ប៉ៃលិន៖ នៅព្រឹកថ្ងៃទី៣០ ខែមិថុនា ឆ្នាំ២០២៥ ឯកឧត្តម ហេង សួរ រដ្ឋមន្ត្រីក្រសួងការងារ និង​បណ្តុះ​បណ្តាលវិជ្ជាជីវៈ អមដោយក្រុមការងារ បានអញ្ជើញចុះទៅពិនិត្យមើលស្ថានភាពទូទៅ នៅ​ច្រក​ទ្វារ​ព្រំដែនអន្តរជាតិព្រំ ខេត្តប៉ៃលិន ឈមនិងច្រកទ្វារព្រំដែន បាផាកាត់ ស្រុកពោណាមរ៉ង ខេត្ត​ចាន់​បុរី ប្រទេសថៃ។ គោលបំណងសំខាន់ នៃការចុះពិនិត្យនេះ គឺដើម្បីស្វែងយល់ ដោយ​ផ្ទាល់​ពី​ស្ថានភាពពលករខ្មែរ ដែលចេញ-ចូលប្រទេសថៃ ក៏ដូចជាការផ្តល់ការណែនាំ និងស្តាប់​បញ្ហា​ប្រឈម​នានា ដែលពួកគាត(ពលករ) កំពុងជួបប្រទះ។

មានប្រសាសន៍ក្នុងឱកាសនេះ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះ​បណ្តាល​វិជ្ជា​ជីវៈ​ បានជួបសំណេះសំណាលផ្ទាល់ជាមួយពលករខ្មែរជាច្រើនរូប ព្រមទាំង​ពន្យល់​ណែនាំ​ដល់​ពលករ​ឱ្យ​ស្វែងរកការងារធ្វើក្នុងប្រទេស ពិសេសក្នុងវិស័យឧស្សាហកម្ម សំណង់ និងកសិកម្ម ដែល​កំពុង​ត្រូវការកម្លាំងពលកម្មជាច្រើន។

ឯកឧត្តមរដ្ឋមន្ត្រី ក៏បានពន្យល់ណែនាំយ៉ាងលម្អិតអំពីគោលនយោបាយ របស់រាជរដ្ឋាភិបាល ក្នុង​ការ​ជំរុញឱ្យពលរដ្ឋស្វែងរកការងារធ្វើក្នុងប្រទេស។ជាមួយគ្នានេះឯកឧត្តមរដ្ឋមន្ត្រី បានសង្កត់​ធ្ងន់​ថា ការធ្វើការងារ ក្នុងប្រទេស មានអត្ថប្រយោជន៍ជាច្រើនដូចជា៖ នៅជិតក្រុមគ្រួសារ អាច​មើល​ថែ​ទាំ​គ្រួសារ និងកូនចៅបានជាប់លាប់, កាត់បន្ថយការចំណាយលើការធ្វើដំណើរ និងការរស់​នៅ​ថ្លៃ​ៗ​នៅបរទេស, ទទួលបានការការពារ ស្ថិតក្រោមការការពារ ផ្នែកច្បាប់ និង​សិទ្ធិ​ការងារ​ពេញ​លេញរបស់កម្ពុជា។ ក្រៅពីនេះ ឯកឧត្តមបាន​ណែនាំ​ពលករ​ឱ្យ​ពិចារណាលើ​វគ្គ​បណ្តុះ​បណ្តាល​ជំនាញ​វិជ្ជា​ជីវៈ ដែលក្រសួងកំ ពុងផ្តល់ជូនដោយឥតគិតថ្លៃ ដើម្បីបង្កើនសមត្ថភាព និង​ទទួល​បាន​ការងារ ដែលមានប្រាក់ឈ្នួលខ្ពស់ នៅក្នុងប្រទេស។ រាជរដ្ឋាភិបាល តែងតែយក​ចិត្ត​ទុក​ដាក់​ចំពោះ​សុខុមាលភាព និងសុវត្ថិភាព របស់ពលករ គ្រប់រូប មិនថាបងប្អូន​កំពុង​ធ្វើ​ការ​នៅ​ទី​ណា​នោះ​ទេ៕