ក្រុមការងារចុះមូលដ្ឋាន សិស្ស និស្សិត ពលរដ្ឋនាំគ្នាដាំដើមឈើតាមដងផ្លូវជាង ៥គីឡូម៉ែត្រក្នុងឃុំត្រពាំងព្រីង

ត្បូងឃ្មុំ៖ ឯកឧត្តម ងួន ស្ដេចភក្តី ប្រធានក្រុមការងាររាជរដ្ឋាភិបាលចុះមូលដ្ឋានឃុំត្រពាំងព្រីង ស្រុកតំបែរ ខេត្តត្បូងឃ្មុំ ដឹក​នាំ​និស្សិត នៃ​ពុទ្ធិកសាកលវិទ្យាល័យសីហមុនីរាជា ទៅ​ចូល​រួម​ជា​មួយ​ក្រុម​ការងារ អាជ្ញាធរមូលដ្ឋាន និង​ប្រជាពលរដ្ឋ ដាំដើមក្ងោកជាង ៥០០ដើម នៅតាមដងផ្លូវជាង ៥គីឡូម៉ែត្រ នៅក្នុងឃុំ​ត្រពាំង​ព្រីង។

ក្នុងកម្មវិធីដាំដើមផ្កាក្ងោក ក្រោមប្រធានបទ “សន្តិភាពសម្រស់ជនបទបៃតង” នៅថ្ងៃទី៣០ ខែ​មិថុនា ឆ្នាំ២០២៥ ឯកឧត្តម ងួន ស្ដេចភក្តី មានប្រសាសន៍ថា សកម្ម ភាពដាំដើមឈើនេះ គឺ​ជា​ការ​ចូល​រួមចំណែកជាមួយរាជរដ្ឋាភិបាលកម្ពុជា ក្នុងការលើកកម្ពស់បរិស្ថាននៅកម្ពុជា ហើយ​ការ​ងារ​នេះជាសកម្មភាពមួយ ក្នុងចំណោមសកម្មភាពផ្សេងទៀត ដែលក្រុមការងារតែងតែធ្វើ ក្នុង​នោះ​ក៏​មាន​វិស័យអប់រំ និងសុខាភិបាលផងដែរ ។

ឯកឧត្តមបានបន្តថា សម្រាប់គោលបំណង នៃការដាំដើមក្ងោកនេះ គឺជា​ផ្នែក​មួយ​នៃ​ការ​លើក​សម្រស់​របស់​ទី​ជន​បទ ព្រោះដើមក្ងោកជារុក្ខជាតិមួយប្រភេទ ដែលមានផ្កាស្រស់ស្អាត និង​ជា​ទី​ទាក់​ទាញ​ដល់ភ្ញៀវទេសចរ​ទៅ​លេងកម្សាន្ត និងថតរូបជាអនុស្សាវរីយ៍ ។

ជា​មួយនេះ ឯកឧត្តមប្រធានក្រុមការងារ អំពាវនាវដល់អាជ្ញាធរ និងប្រជាពលរដ្ឋ​រស់​នៅ​ក្នុង​មូល​ដ្ឋាន​នេះ សូមចូលរួមថែទាំដើមក្ងោកដែលបានដាំនៅតាមដងផ្លូវនេះ ហើយក៏អំពាវ​នាវ​ដល់​ប្រជា​ពលរដ្ឋ​ផ្សេង​ៗ​ទៀត ចូលរួមថែរក្សាបរិស្ថាន និងចូលរួមដាំដើមឈើទាំងអស់គ្នា ។

គួរបញ្ជាក់ថា សកម្មភាពដាំដើមក្ងោកតាមដងផ្លូវនេះ គឺជាលើកទី២ហើយ ដែលក្រុមការងារ អាជ្ញាធរ ក្រុមការងារយុវជនសហភាពសហព័ន្ធយុវជនក្ពុជា (ស.ស.យ.ក) យុវជន​កាក​បាទ​ក្រហម​ ប្រចាំពុទ្ធិកសាកលវិទ្យាល័យព្រះសីហមុនីរាជា និងប្រជាពលរដ្ឋក្នុងភូមិទាំង១២ នៃ​ឃុំ​ត្រពាំង​ព្រីង រួមគ្នាដាំសរុបចំនួនសរុប១០០០ដើម អមសងខាងផ្លូវបេតុង ពីផ្លូវជាតិលេខ៧៣ ឆ្ពោះ​មក​សាលាឃុំត្រពាំងព្រីង។

គួរបញ្ជាក់ថា សម្រាប់ការងារលើកកម្ពស់បរិស្ថាននេះ ក្រុមការងារចុះមូលដ្ឋានឃុំ បានចំណាយ​ថវិកា​លើ​ការងារដាំដើមក្ងោកនេះចំនួនជាង ១៥លានរៀល ដើម្បីជាការលម្អសម្រស់ភូមិឃុំ និង​ផ្តល់​ជា​ម្លប់​បៃតង សម្រាប់សហគមន៍ឃុំត្រពាំងព្រីង តាមគោលនយោបាយអភិវឌ្ឍន៍មូលដ្ឋាន និង​ការពារបរិស្ថាន របស់រាជរដ្ឋាភិបាលកម្ពុជា ដឹកនាំដោយសម្តេចធិបតី ហ៊ុន ម៉ាណែត នាយក​រដ្ឋ​មន្ត្រី នៃព្រះរាជាណាចក្រកម្ពុជា ៕ អត្ថបទ បាន សុខរិទ្ធិ