អភិបាល​ខេត្ត​កំពង់​ឆ្នាំង៖ ខេត្តមានរោងចក្រសហគ្រាស៣២ និង​កន្លែង​ធ្វើ​ការ​ ១៨០០០​កន្លែង​សម្រាប់​ទទួល​បង​ប្អូន​ពលករ

កំពង់ឆ្នាំង៖ នៅថ្ងៃទី០១ ខែកក្កដា ឆ្នាំ២០២៥នេះ ឯកឧត្តម ស៊ុន សុវណ្ណារិទ្ធិ អភិបាល​ខេត្ត​កំពង់​ឆ្នាំង​ បានថ្លែងបញ្ជាក់ជូនបងប្អូនប្រជាពលរដ្ឋ និងពលករវិលត្រឡប់ពីប្រទេសថៃវិញថា ខេត្ត​កំពង់ឆ្នាំងពេលនេះ មានរោងចក្រសហគ្រាសប្រមាណ៣២ និង​កន្លែង​ធ្វើ​ការ​ជាង​ ១៨​០០០​កន្លែង ​រង់ចាំទទួលបងប្អូនពលករ។ មន្ទីរការងារ និងបណ្តុះបណ្តាលវិជ្ជាជីវៈខេត្តកំពង់ឆ្នាំង មានក្រុមការងារសម្រាប់​ទំនាក់ទំនងបងប្អូនពលករដល់គេហដ្ឋាន និងផ្តល់ការងារជូនតែម្តង។

ឯកឧត្តមអភិបាលខេត្តបានបន្តថា មកដល់ពេលនេះ ខេត្តកំពង់ឆ្នាំង ទើប​ទទួល​បង​ប្អូន​ពលករ​ខ្មែរ​ដែល​វិល​ត្រឡប់ពីប្រទេសថៃវិញបានប្រមាណជិត ៤០០នាក់ ហើយ​ពលករ​ដែល​ច្រើ​ន​ជាង​គេ​រស់​នៅ​ក្នុង​ស្រុក​កំពង់​លែង និងស្រុករលាប្អៀរ។ មន្ទីរការងារ និងបណ្តុះបណ្តាលវិជ្ជាជីវៈខេត្ត និង​អាជ្ញាធរ​ក្រុង​ស្រុក ឃុំភូមិ បានបែងចែកក្រុមការងារចុះជួបជាមួយបងប្អូនពលករ ហើយ​សម្ភាស​ពួក​គាត់​ក្នុងការរកការងារជូនពួកគាត់។ ក្នុងការសម្ភាសនោះ ខាងមន្ទីការងារ និង​បណ្តុះ​បណ្តាល​វិជ្ជា​ជីវៈ​មាន​ជំរើស៣ សម្រាប់គាត់ ទី១- បើសិនពលករចង់រកការងារក្នុងស្រុកខេត្ត នោះ​ក្រុម​ការងារ​ មន្ទីរ​ការងារនឹងសហការជាមួយខាងរោងចក្រសហគ្រាស ដើម្បី​ដាក់​គាត់​ទៅ​ទីតាំង​ណា​ដែល​គាត់​ចង់​ធ្វើ។ ២- បើពលករចង់មាន​អាជីព​មួយ​ពិតប្រាកដ​សម្រាប់​ធ្វើ​ការ​ងារ​នៅ​តាម​ក្រុម​ហ៊ុន​ ឬ​ការបើកកន្លែងរកស៊ីដោយខ្លួនឯង ក្រុមការងារមន្ទីរការងារ និងបណ្តុះបណ្តាលវិជ្ជាជីវៈ នឹង​ដាក់​ពួក​គាត់ទៅវិទ្យាស្ថានបណ្តុះបណ្តាលវិជ្ជាជីវៈតែម្តង។ ទី៣- តែបើពួកគា​ត់​​ចង់​រក​ស៊ី​ដោយ​ខ្លួន​ឯង​ នោះក្រុមការងារនឹងផ្តល់សិទ្ធិក្នុងការរកស៊ីផងដែរ។ ឯកឧត្តមអភិបាលខេត្តក៏បានសុំអោយពលករនៅតាមបណ្តាខេត្តជាប់ខេត្តកំពង់ឆ្នាំង ក៏​អាច​មក​ដាក់​ពាក្យ​ធ្វើការងារនៅក្នុងខេត្តបានផងដែរ។

រដ្ឋបាលខេត្តកំពង់ឆ្នាំង និងមន្ទីរការងារ បណ្តុះបណ្តាលវិជ្ជាជីវៈខេត្ត ក៏បា​ន​បង្កើត​ក្រុម​ការ​ងារ​ជា​មួយ​រដ្ឋបាលក្រុងស្រុកទាំង៨ ដើម្បីតាមដានបងប្អូនពលករដែលវិលពីប្រទេសថៃ ជារៀងរាល់ថ្ងៃ និង​បាន​ធ្វើការយ៉ាងល្អជាមួយបងប្អូន និងត្រៀម​អោយ​ពួក​គាត់​មានការងារ​ធ្វើ​ក្នុង​ពេល​ឆា​ប់​ៗ​នេះ​៕​ កាំង ហុងវាស្នា