ក្រុមការងារកសាងចលនាសមាជិកគណបក្សមូលដ្ឋានរាជធានី-ខេត្តចុះផ្តល់អំណោយជូនកងទ័ពជួរមុខនៅខេត្តព្រះវិហារ

ព្រះវិហារ៖ នាព្រឹកថ្ងៃទី១ ខែកក្កដា ឆ្នាំ២០២៥ ឯកឧត្តម យូ សិរីវុឌ្ឍ បេសកជនពិសេសរបស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងជាប្រធានក្រុមការងារកសាងចលនាសមាជិកគណបក្សមូលដ្ឋានរាជធានី-ខេត្ត និងឯកឧត្តម ភឺន ផល្លា បានដឹកនាំក្រុមការងារគណបក្សរាជធានី-ខេត្តទាំង២៥ ជាអតីតសមាជិក និងសកម្មជនគណបក្សប្រឆាំងដែលបានចូលរួមជីវភាពនយោបាយជាមួយគណបក្សប្រជាជនកម្ពុជា ចុះផ្តល់អំណោយជូនកងទ័ពជួរមុខនៅកងពលធំអន្តរាគមន៍លេខ៣ ខេត្តព្រះវិហារ។

ពិធីផ្តល់អំណោយនេះក្រោមអធិបតីភាពឯកឧត្តម នាយឧត្តមសេនីយ៍ ម៉ៅ សុផាន់ អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោក និងលោកឧត្តមសេនីយ៍ឯក ស្រី ឌឹក មេបញ្ជាការកងពលធំអន្តរាគមន៍លេខ៣ ព្រមទាំងនាយទាហាន និងពលទាហានជាច្រើនរូប។

នាឱកាសនោះ ឯកឧត្តម នាយឧត្តមសេនីយ៍ ម៉ៅ សុផាន់ បានថ្លែងអំណរគុណចំពោះការដឹកនាំរបស់ ឯកឧត្តម យូ សិរីវុឌ្ឍ ជាមួយក្រុមការងារកសាងចលនាសមាជិកគណបក្សមូលដ្ឋានរាជធានី-ខេត្ត ដែលបាននាំយកអំណោយទាំងថវិកា គ្រឿងឧបភោគបរិភោគ និងសម្ភារៈសម្រាប់ចែកជូនដល់កងទ័ពជួរមុខ។

តាងនាមនាយទាហាន និងពលទាហាន ឯកឧត្តម នាយឧត្តមសេនីយ៍ ម៉ៅ សុផាន់ បានបញ្ជាក់ថា អនុវត្តតាមបទបញ្ជាដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី, នាយទាហាន និងពលទាហានទាំងអស់បានត្រៀមវាយបក​ និងការពារបូរណភាពទឹកដី និងអធិបតេយ្យភាពឈ្លានពានឱ្យខាងតែបានគ្រប់ពេលវេលា។

នាឱកាសនោះ ឯកឧត្តម យូ សិរីវុឌ្ឍ ថ្លែងថា ការរៀបចំជួបជុំ និងផ្តល់អំណោយជូនកងទ័ពជួរមុខនាពេលនេះ មានគោលបំណងបង្ហាញពីស្មារតី និងសាមគ្គីភាពខ្មែរតែមួយ ពិសេសគឺបងប្អូនជាក្រុមការងារកសាងចលនាសមាជិកគណបក្សមូលដ្ឋានរាជធានី-ខេត្ត ដែលជាអតីតសមាជិក និងសកម្មជនគណបក្សប្រឆាំង។

ឯកឧត្តម យូ សិរីវុឌ្ឍ ថ្លែងបន្តថា ក្រុមការងារកសាងចលនាសមាជិកគណបក្សមូលដ្ឋានរាជធានី-ខេត្ត ដែលមានអតីតសមាជិក និងសកម្មជនគណបក្សប្រឆាំងមើលឃើញថា រាជរដ្ឋាភិបាលដឹកនាំដោយសម្តេចធិបតី ហ៊ុន ម៉ាណែត នាយករដ្ឋមន្រ្តី បានដាក់ចេញវិធានការម៉ឺងម៉ាត់បំផុតក្នុងការការពារអធិបតេយ្យភាព និងការឈ្លានពានពីប្រទេសថៃ ដូច្នេះហើយនេះជាពេលវេលារបស់ប្រជាពលរដ្ឋខ្មែរគ្រប់និន្នាការ ដើម្បីរួបរួមគ្នាជាកម្លាំងតែមួយគាំទ្រដល់កងទ័ពជួរមុខដែលកំពុងឈរជើងតាមបន្ទាត់ព្រំដែន។

ក្នុងឱកាសទិវាមច្ឆាជាតិ ១ កក្កដា សម្តេចធិបតី ហ៊ុន ម៉ាណែត នាយករដ្ឋមន្រ្តី បានប្រកាសយ៉ាងខ្លាំងៗថា កម្ពុជានៅតែបន្តដោះស្រាយបញ្ហាព្រំដែន ដោយសន្តិវិធី និងច្បាប់អន្តរជាតិដដែល ហើយកុំឃើញកម្ពុជាស្ងៀមស្ងាត់កុំគិតថាកម្ពុជាខ្លាចខ្លួនឲ្យសោះ កម្ពុជាមានលទ្ធភាពឆ្លើយតបគ្រប់ពេលវេលាទាំងអស់៕