ទិន្នផលត្រីឆមាសទី១ឆ្នាំ២០២៥ កើនឡើងជាង៣ពាន់តោន លើសឆមាសទី១ឆ្នាំ២០២៤ ដោយសារការបង្ក្រាបបទល្មើសនេសាទបានច្រើន

កំពង់ឆ្នាំង៖ នៅថ្ងៃទី០១ ខែកក្កដា ឆ្នាំ២០២៥នេះ លោក ងិន ហ៊ុន ប្រធានមន្ទីរកសិកម្ម រុក្ខាប្រម៉ាញ់ និងនេសាទខេត្តកំពង់ឆ្នាំង បានអោយដឹងថា ទិន្នផលត្រីក្នុងឆមាសទី១ឆ្នាំ២០២៥នេះទទួលបានជាង២៥ពាន់តោន កើនជាង៣ពាន់តោនលើសឆមាសទីឆ្នាំ២០២៤។ កត្តាដែលនាំអោយកើនឡើងនេះ ដោយសារមានការសហការបង្ក្រាបបទល្មើសនេសាទពីកម្លាំងកងទ័ព ជំនាញរដ្ឋបាលជលផល រួមនិងអាជ្ញាធរឃុំស្រុកខេត្ត។

លោក ងិន ហ៊ុន បានបន្តថា៖ ក្រោយពីមានបទបញ្ជាពីថ្នាក់ដឹកនាំ ក្នុងការបង្ក្រាបបទល្មើសនេសាទទ្រង់ទ្រាយធំនៅជុំវិញបឹងទន្លេសាប និងទន្លេសាប ដែលមានកម្លាំងរដ្ឋបាលជលផល ខ័ណ្ឌជលផល កម្លាំងកងទ័ព អាជ្ញាធរគ្រប់ជាន់ថ្នាក់ បានសហការគ្នាក្នុងការបង្ក្រាបបទល្មើសនេសាទទាំងនេះ រួមនិងបន្តការយាមកាមបន្ថែម នាំអោយទិន្នផលត្រីទឹកសាបនៅតាមដែនទន្លេសាបក្នុងខេត្តកំពង់ឆ្នាំង នេសាទបានប្រមាណជាង២៥ពាន់តោនក្នុងឆមាសទី១ឆ្នាំ២០២៥។ ទិន្នផលត្រីទឹកសាបក្នុងឆមាសទី១ឆ្នាំ២០២៥នេះ បានកើនឡើងជាង៣ពាន់តោន លើសឆ្នាំ២០២៤ ក្នុងឆមាសទី១។ ចាប់ពីដើមខែមិថុនា មកដល់ពេលនេះ បទល្មើសនេសាទធំៗជាច្រើនដែលបានបង្ក្រាបហើយនោះ មិនអោយមានបន្ត ឬបង្កើតឡើងវិញនោះឡើយ ហើយកម្លាំងរដ្ឋបាលជលផល និងកម្លាំងកងទ័ព តែងបន្តពិនិត្យជាប្រចាំនៅតាមទីតាំងដែលកើតបទល្មើសនេសាទកន្លងមក។

លោក ងិន ហ៊ុន បានអំពាវនាវដល់បងប្អូនប្រជានេសាទទាំងអស់ ជួយចូលរួមក្នុងការថែរក្សាពូជមច្ឆាជាតិយើងអោយគង់វង្សយូរអង្វែង ដោយបងប្អូនជួយថែរក្សានូវព្រៃលិចទឹក តំបន់ព្រៃលិចទឹក កុំប្រើប្រាស់សារធាតុគីមីច្រើនតាមតំបន់លិចទឹក កុំប្រើប្រាស់ឧបករណ៍ល្មើសដែលក្រសួងកសិកម្ម និងច្បាប់ស្តីពីជលផលបានហាមឃាត់។ ជួយផ្តល់ព័ត៌មានពីការប្រព្រឹត្តបទល្មើស ឬកន្លែងបង្កើតបទល្មើសដល់អាជ្ញាធរ កម្លាំងរដ្ឋបាលជលផល និងកម្លាំងកងទ័ព ដើម្បីកម្លាំងទាំងអស់ចេញបង្ក្រាបទាន់ពេលវេលា៕ កាំង ហុងវាស្នា