មញ្ជូសាសម្ដេច ជា ស៊ីម និងភរិយា ត្រូវបានដង្ហែពីភ្នំពេញមកតម្កល់ធ្វើបុណ្យ៣ថ្ងៃ នៅ​ស្រុក​កំណើត ស្រុកកំចាយមារ ខេត្តព្រៃវែង

មញ្ជូសាសម្ដេចអគ្គមហាធម្មពោធិសាល ជា ស៊ីម និងលោកជំទាវ ញ៉ែម សឿន ជាស៊ីម ត្រូវ​បាន​ក្រុម​គ្រួសារ និងសាច់ញាតិ ដង្ហែចេញពីចេតិយ វត្តមុនីប្រសិទ្ធីវង្ស រាជធានីភ្នំពេញ ឆ្ពោះ​ម​ក​កាន់​ស្រុក​កំចាយមារ ខេត្តព្រៃវែង នាព្រឹកថ្ងៃអង្គារ ៦កើត ខែអាសាឍ ឆ្នាំម្សាញ់ សប្ដស័ក ព.ស​២៥៦៩ ត្រូវនឹងថ្ងៃទី១ ខែកក្កដា ឆ្នាំ២០២៥។

ពិធីដង្ហែមញ្ជូសា សម្ដេច ជា ស៊ីម និងលោកជំទាវ បានប្រព្រឹត្តទៅនាម៉ោង៦ព្រឹក តម្រាយ​តាម​ផ្លូវ​ជាតិ​លេខ​៦A ឆ្លងស្ពានព្រែកតាមាក់ ឆ្ពោះមកដល់ទឹកដីឃុំក្របៅ ស្រុកកំចាយមារ នាម៉ោង៩ព្រឹក ដោយ​មានការអញ្ជើញដឹកនាំក្បួនដង្ហែ ពីលោកជំទាវ ញ៉ែម សាខន សម្ដេចក្រឡាហោម ឯកឧត្តម លោក​ជំទាវ លោក លោកស្រីជាសមាជិកក្រុមគ្រួសារ និងសាច់ញាតិជាច្រើនរូបទៀត។

នៅឃុំក្របៅ ទឹកដីកំណើត និងការតស៊ូ ក្រុមគ្រួសារបានរៀបចំពិធីបុណ្យពុទ្ធាភិសេក ឆ្លង​សារ​មន្ទីរ ពិស្ដារប្រាំពីរចប់ គម្រប់ខួប១០ឆ្នាំ និង១៦ឆ្នាំ ដើម្បីឧទ្ទិសកុសលជូន សម្ដេច​អគ្គ​មហា​ធម្ម​ពោធិ​សាល និងលោកជំទាវ បន្តរហូតថ្ងៃទី៣ ខែកក្កដា ឆ្នាំ២០២៥។ ក្នុងអំឡុងនៃពិធីបុណ្យ ក៏​មាន​កម្ម​វិធី​ជយតុរូបសំណាកសម្ដេចធម្មពោធិសាល តម្កល់ក្នុងបរិវេណ​សាកល​វិទ្យាល័យ​ជា​ស៊ីម​កំចាយ​មារ​ផងដែរ។

ពិធីបុណ្យនេះ ក៏នឹងមានការយាង និងអញ្ជើញចូលរួមពីឥស្សរជនជាតិកំពូលៗ ថ្នាក់ដឹកនាំ និង​សមាជិក​គណបក្សប្រជាជនកម្ពុជា ថ្នាក់ដឹកនាំ និងសមាជិកព្រឹទ្ធសភា រដ្ឋសភា រាជរដ្ឋាភិបាល និង​តុលាការ ថ្នាក់ដឹកនាំរដ្ឋបាលថ្នាក់ក្រោមជាតិ អង្គទូតនៃប្រទេសជាមិត្តប្រចាំនៅកម្ពុជា ព្រម​ទាំង​ភ្ញៀវកិត្តិយស និងមហាជនជាច្រើនរូបទៀត។

ក្នុងពិធីសំណេះសំណាលជាមួយមន្ត្រីរាជការនៃរដ្ឋបាលខេត្តព្រះវិហារកាលពីពេលថ្មីៗនេះ សម្ដេច​អគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភា បាន​មាន​ប្រសាសន៍ថា សម្ដេច និងឥស្សរជនជាតិកំពូលៗ រួមទាំងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងអញ្ជើញចូលរួមពិធីបុណ្យ សម្ដេច ជា ស៊ីម និងលោកជំទាវ នា​ថ្ងៃ​ទី២ ខែកក្កដា។

សម្ដេចតេជោ បានមានប្រសាសន៍ថា វត្តមាននៃការអញ្ជើញចូលរួមរបស់ថ្នាក់ដឹកនាំជាតិ និង​គណបក្ស​ប្រជាជនកម្ពុជា គឺជាការបង្ហាញឱ្យឃើញនូវស្មារតីសាមគ្គីរឹងមាំជាអមតៈ ដោយ​សម្ដេច​បាន​សង្កត់​ធ្ងន់​ទៀតថា ថ្នាក់ដឹកនាំគណបក្សប្រជាជនកម្ពុជាពុំដែលចោលគ្នានោះឡើយ ហើ​យ​ស្មារតី​នេះ ជាលំអានដ៏ឧត្តុង្គឧត្តមសម្រាប់ថ្នាក់ដឹកនាំជំនាន់ក្រោយៗ។

សូមបញ្ជាក់ថា សម្ដេចអគ្គមហាធម្មពោធិសាល ជា ស៊ីម បានទទួលអនិច្ចកម្ម កាលថ្ងៃទី៨ ខែ​មិថុនា ឆ្នាំ២០១៥ ក្នុងជន្មាយុ៨៣ឆ្នាំ ចំណែកលោកជំទាវ ញ៉ែម សឿន ជា ស៊ីម បាន​ទទួល​អនិច្ច​កម្ម​កាល​ពី​ថ្ងៃ​ទី៣ ខែកក្កដា ឆ្នាំ២០០៩។ សម្ដេចធម្មពោធិសាល ជា ស៊ីម ជា​សហ​ស្ថាបនិក​រណសិរ្ស​២ធ្នូ ដែលដឹកនាំការវាយផ្ដួលរំលំរបបខ្មែរក្រហមដោយជោគជ័យ នាថ្ងៃទី៧ ខែ​មករា ឆ្នាំ​១៩៧៩។

សម្ដេចធម្មពោធិសាល ជា ស៊ីម ធ្លាប់កាន់មុខតំណែង និង​តួនាទី​ជា​អនុ​ប្រធាន​រណសិរ្ស​សាមគ្គី​សង្គ្រោះ​ជា​​តិកម្ពុជា ជារដ្ឋមន្ត្រីក្រសួងមហាផ្ទៃ ជាប្រធានសភាប្រជាជន ជាប្រធានក្រុមប្រឹក្សារដ្ឋ ជា​អ្នក​តំណាងរាស្ត្រ ជាប្រធានរដ្ឋសភា ជាប្រធានព្រឹទ្ធសភា និង​ជា​ប្រធាន​គណបក្ស​ប្រជាជន​កម្ពុជា រហូតដល់ថ្ងៃទទួលអនិច្ចកម្ម។

សម្ដេចទទួលការប្រោសព្រះរាជប្រទាន គោរមងារពីព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាសម្តេចអគ្គមហាធម្មពោធិសាល កាល​ពី​អំឡុងឆ្នាំ២០០៧ និងតែងតាំងជានាយឧត្តមសេនីយ៍ផ្កាយមាស៥ កាលពីខែធ្នូ ឆ្នាំ​២០០៩ ជាមួយសម្ដេចអគ្គមហាពញាចក្រី ហេង សំរិន និងសម្ដេចអគ្គមហាសេនាបតីតេជោ ហ៊ុន សែន៕