ឧត្តមសេនីយ៍ឯក ជួន ណារិន្ទ ៖ នគរបាលត្រៀមលក្ខណៈខ្ពស់រួចរាល់ រងចាំតែបទបញ្ជារពីថ្នាក់ដឹកនាំ ក្នុងការទៅកម្ទេចខ្មាំងឈ្លានពានទឹកដីកម្ពុជា

ភ្នំពេញ ៖ លោកឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បញ្ជាក់ពីគោលជំហរមុខមាំសម្រាប់ចេញអន្តរាគមន៍ជាកម្លាំងជួរក្រោយ នៅឡើយរងចាំតែពេលមានបទបញ្ជារពីថ្នាក់ដឹកនាំប៉ុណ្ណោះ ក្នុងការទៅកម្ទេចខ្មាំងសត្រូវសៀម ដែលមានមហិច្ចតាឈ្លានពានដែនអធិបតេយ្យភាពទឹកដីរបស់កម្ពុជា ។

ការប្រកាសពីគោលជំហរមុខមាំ និងត្រៀមលក្ខណៈជាស្រេចរបស់លោកឧត្តមសេនីយ៍ស្នងការ ធ្វើឡើងនៅក្នុងពិធីសំណេះសំណាលជាមួយកងកម្លាំងនគរបាលទូទាំងរាជធានី និងត្រួតពិនិត្យយុទ្ធោបករណ៍ ក្រោមអធិបតីភាពឯកឧត្តមសន្តិបណ្ឌិត សុខ ផល រដ្ឋលេខាធិការក្រសួងមហាផ្ទៃ និងមានការចូលរួមពីកម្លាំងនគរបាលជាច្រើនពាន់នាក់ផងដែរ នៅព្រឹកថ្ងៃទី០១ ខែកក្កដា ឆ្នាំ២០២៥នេះ ។

លោកឧត្តមស្នងការ ក៏បានបង្ហាញការគាំទ្រចំពោះយន្តការសម្រេចរបស់ប្រមុខរាជរដ្ឋាភិបាលកម្ពុជា ដែលដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ទាំងការដោះស្រាយតាមរបៀបការទូត និងតាមរបៀបយន្តការច្បាប់អន្តរជាតិផង ជាមួយភាគីថៃដែលមានមហិច្ចតាឈ្លានពានទឹកដីកម្ពុជា ។

តាមនាងឱ្យកម្លាំងនគរបាលទូទាំងរាជធានីភ្នំពេញ លោកឧត្តមសេនីយ៍ស្នងការ បានប្តេជ្ញាខ្ពស់ និងមុខមាំបំផុត ចំពោះការចូលរួមការពារដែនអធិបតីភាពទឹកដីរបស់កម្ពុជា ពីជនឈ្លានពានទាំងឡាយណាដែលមានបំណងចង់បានទឹកដីរបស់កម្ពុជា ទោះក្នុងតម្លៃណាក៏ដោយ ក៏កម្លាំងនគរបាលទាំងអស់ ហ៊ានពលីកម្មដោយជីវិត ដើម្បីការពារជាតិ និងប្រជាជន ៕ លីហេង