នាយករដ្ឋមន្ត្រីសិង្ហបុរី និងលោកជំទាវអញ្ជើញបំពេញទស្សនកិច្ចផ្លូវការនៅកម្ពុជា ស្រប​ពេល​ខួប​៦០​ឆ្នាំ​ នៃទំនាក់ទំនង និងកិច្ចសហប្រតិបត្តិការប្រទសទាំងពីរ

ភ្នំពេញ៖ នៅព្រឹកថ្ងៃទី២ ខែកក្កដា ឆ្នាំ២០២៥នេះ តបតាមការ​អញ្ជើញ​របស់​សម្តេច​មហា​បវរ​ធិបតី​ ហ៊ុន ម៉ាណែត នាយករដ្ឋមន្ត្រីកម្ពុជា ឯកឧត្តម ឡរ៉េន វ៉ុង (Lawrence Wong) នាយករដ្ឋ​មន្ត្រី​ និងជារដ្ឋមន្ត្រីក្រសួងហិរញ្ញវត្ថុសិង្ហបុរី បានអញ្ជើញមកដល់ប្រទេសកម្ពុជា ដើម្បី​បំពេញ​ទស្សន​​កិច្ច​ផ្លូវការ​។ ដំណើរទស្សនកិច្ចផ្លូវការរយៈពេលមួយថ្ងៃនេះ ជា​ការ​បង្ហាញ​នូវ​ការ​ប្តេជ្ញា​ចិត្ត​ក្នុង​ការ​ពូនជ្រុំទំនាក់ទំនង និងកិច្ចសហប្រតិបត្តិការរវាងកម្ពុជា និងសិង្ហបុរី ដែល​មាន​អាយុ​គម្រប់​៦០​ឆ្នាំ​នៅឆ្នាំ២០២៥នេះ។

ឯកឧត្តម នាយករដ្ឋមន្ត្រីសិង្ហបុរី និងលោកជំទាវ ព្រមទាំងគណៈប្រតិភូជាន់ខ្ពស់ប្រទេសសិង្ហបុរី បាន​អញ្ជើញ​មក​ដល់​ព្រលានយន្តហោះអន្តរជាតិភ្នំពេញ ប្រទេសកម្ពុជា នៅវេលាម៉ោងប្រមាណ ៨​៖​៤០​នាទី។ ជាមួយដំណើរអញ្ជើញដល់របស់លោកនាយករដ្ឋមន្ត្រី ទទួលបានការ​ស្វាគមន៍​យ៉ាង​កក់​ក្តៅ​បំផុត​ពីមន្ត្រីជាន់ខ្ពស់របស់រាជរដ្ឋាភិបាលកម្ពុជាផងដែរ ក្នុងនោះរួមមានឯកឧត្តម ហែម វណ្ឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍, ឯកឧត្តម ឈិត កេតនា អនុប្រធានអចិន្ត្រៃយ៍ និងជាអគ្គលេខាធិកាគណៈកម្មាធិការជាតិរៀបចំបុណ្យជាតិ និង​អន្តរ​ជាតិ, ឯកឧត្តម អ៊ឹង រចនា រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ និង​ឯកឧត្តម សុខ ខឿន ឯកអគ្គរាជទូតកម្ពុជាប្រចាំប្រទេសសិង្ហបុរី។

ក្នុង​ដំណើរទស្សនកិច្ចផ្លូវការនៅកម្ពុជានៅព្រឹកនេះ ឯកឧត្តម ឡរ៉េន វ៉ុង បាន​អញ្ជើញ​ដាក់​កម្រង​ផ្កា​គោរពវិញ្ញាណក្ខន្ធនៅវិមានឯករាជ្យ និងថ្វាយកម្រងផ្កាគោរពព្រះវិញ្ញាណក្ខន្ធ ព្រះករុណា ព្រះ​បាទ​សម្តេច ព្រះនរោត្តម សីហនុ ព្រះបរមរតនកោដ្ឋ។

យោងតាមក្រសួងការបរទេសកម្ពុជា បានឱ្យដឹងថា ឯកឧត្តមនាយករដ្ឋមន្ត្រីសិង្ហបុរី ក៏នឹងមាន​ព្រះរាជ​សាវនាការជាមួយព្រះករុណាព្រះបាទ សម្តេច ព្រះបរមនាថ នរោត្តម សីហមុនី ព្រះ​មហាក្សត្រ នៃព្រះរាជាណាចក្រកម្ពុជា នៅព្រះបរមរាជវាំង, មានជំនួប​សម្តែង​ការ​គួរ​សម​ជា​មួយ​សម្តេច​តេជោ ហ៊ុន សែន ប្រធានព្រឹទ្ធសភានៃកម្ពុជា។

ឯកឧត្តម នាយករដ្ឋមន្រ្ដីសិង្ហបុរី ក៏នឹងមានជំនួបទ្វេភាគីជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅវិមានសន្តិភាព ដែលនាយករដ្ឋ​មន្ត្រី​ទាំង​ពីរ​នឹង​ធ្វើ​ការ​ពិភាក្សា​ស៊ី​ជម្រៅ​បន្ថែមទៀត លើទំនាក់ទំនងដ៏យូរអង្វែង និងកិច្ចសហប្រតិបត្តិការ ដែល​មាន​ផល​ប្រយោជន៍​ទៅវិញទៅមករវាងកម្ពុជា និងសិង្ហបុរី។

កម្ពុជា និងសិង្ហបុរី បានភ្ជាប់ទំនាក់ទំនងផ្លូវការនៅថ្ងៃទី១៥ ខែកញ្ញា ឆ្នាំ១៩៦៥។ ដំណើរ​ទស្សន​កិច្ច​របស់​ឯកឧត្តម ឡរ៉េន វ៉ុង កើតឡើងស្របពេលនៃការប្រារព្ធខួបលើកទី៦០ នៃការ​បង្កើត​ទំនាក់​ទំនង​ការទូតផ្លូវការរវាងកម្ពុជា និងសិង្ហបុរី ដែលជាការ​បង្ហាញ​ឱ្យ​ឃើញ​នូវ​ការ​យក​ចិត្ត​ទុក​ដាក់ និងការប្តេជ្ញាចិត្តពូនជ្រុំទំនាក់ទំនង និងកិច្ចសហប្រតិបត្តិការ​រវាង​ប្រទេស​ទាំង​ពីរ​ឱ្យ​កាន់​តែ​ល្អ​ប្រ​សើរ។

សូមបញ្ជាក់ថា កាលពីថ្ងៃទី១៨-១៩ ខែមិថុនា ឆ្នាំ២០២៤ កន្លងទៅ សម្តេចមហាបវរធិបតី ហ៊ុន ម៉ាណែត ក៏បានអញ្ជើញបំពេញទស្សនកិច្ចផ្លូវការនៅប្រទេសសិង្ហបុរីផងដែរ។ ដំណើរទស្សនកិច្ចនាពេលនោះក៏ទទួលបានលទ្ធផលល្អប្រសើរជាច្រើនដែលជាការបោះជំហានថ្មីមួយទៀតនៃទំនាក់ទំនងរវាងប្រទេសទាំងពីរ៕