ប្រមុខការពារជាតិកម្ពុជា ទាត់ចោលថាគ្មានកិច្ចជំនួបសន្ទនាជាមួយថៃ ដូចការលើកឡើងរបស់មន្រ្តីក្រសួងការពារជាតិថៃនោះឡើយ

នាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិកម្ពុជា បានចេញសេចក្តីឆ្លើយតប ដោយបដិសេធថា គ្មានកិច្ចជំនួបសន្ទនាណាមួយទាំងផ្លូវការ និងក្រៅផ្លូវការជាមួយភាគីថៃ ដើម្បីនិយាយអំពីបញ្ហាព្រំដែនរវាងកម្ពុជា និងថៃដូចការលើកឡើងរបស់អនុរដ្ឋលេខាធិការក្រសួងការពារជាតិថៃ នោះឡើយ។

តាមរយៈផេកហ្វេសបុកផ្លូវការរបស់នាយឧត្តមសេនីយ៍ ទៀ សីហា នៅរសៀលថ្ងៃទី៣ ខែកក្កដា ឆ្នាំ២០២៥នេះ ប្រមុខការពារជាតិកម្ពុជាបានលើកឡើងថា បន្ទាប់ពីស្ដាប់នូវកិច្ចសម្ភាសន៍ជាមួយអ្នកសារព័ត៌មាន របស់ឯកឧត្តម ណាត់ថាផន ណាក់ផានិក អនុរដ្ឋមន្ត្រីក្រសួងការពារជាតិថៃកាលពីថ្ងៃទី២ កក្កដា ២០២៥ រួចមក នាយឧត្តមសេនីយ៍សូមបញ្ជាក់ជូនថា៖ « ខ្ញុំមិនបានបើកកិច្ចសន្ទនាណាមួយ ជាមួយភាគីថៃទាំងផ្លូវការ ឬក្រៅផ្លូវការ ចាប់តាំងពីកិច្ចជំនួបជាមួយរដ្ឋមន្ត្រីក្រសួងការពារជាតិឯកឧត្តមភូមិថាំ នៅឯខេត្តស្រះកែវ ប្រទេសថៃ កាលពីថ្ងៃទី៥ ខែមិថុនា ឆ្នាំ២០២៥ នោះឡើយ។ ក្នុងនាមរដ្ឋមន្ត្រីក្រសួងការពារជាតិក៏ដូចជាកងយោធពលខេមរភូមិន្ទ គឺគោរពតាមបទបញ្ជារបស់សម្តេចនាយករដ្ឋមន្ត្រី ក៏ដូចជារាជរដ្ឋាភិបាលកម្ពុជា»។

នាយឧត្តមសេនីយ៍ ទៀ សីហា បានលើកឡើងទៀតថា« ខ្ញុំសូមអរគុណដល់ការលើកឡើងរបស់អនុរដ្ឋមន្ត្រីក្រសួងការពារជាតិថៃ ពាក់ព័ន្ធនឹងការគោរពសិទ្ធិគ្នាទៅវិញទៅមក ក៏ដូចជាការដឹងសុខទុក្ខរបស់ប្រជាជនកម្ពុជា និងប្រជាជនថៃ ដែលអាស្រ័យផលទៅលើច្រកព្រំដែនកម្ពុជា-ថៃ»។ ជាមួយគ្នានោះប្រមុខការពារជាតិកម្ពុជាក៏បានរំលឹក និងប្រាប់ដល់ភាគីថៃជាថ្មីម្ដងទៀតផងដែរ ទាក់ទងនឹងការបិទព្រំដែននោះ «គឺមិនមែនកម្ពុជា ជាអ្នកបិទច្រកព្រំដែននោះទេ គឺកងទ័ពថៃជាអ្នកបិទច្រក ឬកែសម្រួលពេលវេលានៃការបិទច្រកព្រំដែនដោយឯកតោភាគី។ អាស្រ័យហេតុនេះគឺមានតែភាគីថៃ ឬកងទ័ពថៃតែប៉ុណ្ណោះដែលអាចដោះស្រាយបញ្ហានេះដោយខ្លួនឯង និងមិនចាំបាច់ចរចាជាមួយភាគីកម្ពុជាឡើយ។ កូនសោគឺស្ថិតលើដៃរបស់កងទ័ពថៃតែមួយគត់»៕អត្ថបទបាន ចក់