ព័ត៌មាន

ស្រ្តីខ្មែរម្នាក់ឈឺពោះសម្រាលកូនភាគីថៃមិនយកចិត្តទុកដាក់ បញ្ជូនឱ្យដើរថ្មើរជើង តាមច្រកអន្តរជាតិប៉ោយប៉ែត ត្រូវក្រុមការងារប្រចាំការអន្តរគមន៍បញ្ជូនទៅមន្ទីរពេទ្យ សម្រាលកូនដោយជោគជ័យ

បន្ទាយមានជ័យ៖ កាលពីរសៀលថ្ងៃទី២ ខែកក្កដា ឆ្នាំ២០២៥ម្សិលមិញ ពលករខ្មែរម្នាក់ឈ្មោះ សេង កែវមុនី ឈឺពោះសម្រាលកូន នៅក្នុងទឹកដីប្រទេសថៃ ខណៈ ធ្វើដំណើរវិលត្រឡប់មកកម្ពុជាវិញ តែភាគីថៃមិនយកចិត្តទុកដាក់ បែរជាបញ្ជូនស្រ្តីខាងលើដើរដោយថ្មើជើង ឆ្លងស្ពានព្រំដែនច្រកអន្តរជាតិប៉ោយប៉ែត ចូលមកម្ពុជាវិញ សូម្បីតែរថយន្តសង្គ្រោះបន្ទាន់ក៏ភាគីថៃមិនបញ្ជូនស្រ្តីខាងលើមកភាគីកម្ពុជានោះទេ។

ស្ថានភាពបែបនេះក្រុមការងារ រួមនឹងសមត្ថកិច្ច គ្រូពេទ្យប្រចាំការនៅច្រកព្រំដែនអន្តរជាតិប៉ោយប៉ែត បានចេញអន្តរាគមជួយបញ្ជូនស្រ្តីមានផ្ទៃពោះខាងលើទៅមន្ទីរពេទ្យបង្អែកដីថ្មី និងសម្រាលកូនប្រកបដោយសុវត្ថិភាព។

លោក អោក ទីណា ប្រធានមន្ទីរពេទ្យបង្អែកប៉ោយប៉ែត បានប្រាប់ថា ស្ត្រីដែលឈឺពោះឆ្លងទន្លេម៉ោង១៤និ១០នាទី ថ្ងៃទី០២ ខែកក្កដា ឆ្នាំ ២០២៥ សម្រាលបានកូនប្រុស ទំងន់៣១៦៨ក្រាម ទាំងម្តាយ និងកូន មានសុខភាពល្អធម្មតា ក្រុមគ្រូពេទ្យអនុញ្ញាតឱ្យវិលទៅសំរាកនៅលំនៅឋានវិញ។

កម្ពុជានៅបន្តអនុវត្តកិច្ចការងារមនុស្សធម៌ទោះស្ថិតនៅក្នុងកាលៈទេសៈ បែបណាក៏ដោយ កម្ពុជាតែងតែយកចិត្តទុកដាក់ទៅល់គ្រប់ជាតិសាសន៍ មិនថាជនជាតិថៃឬជនជាតិណានោះទេបើទោះបីស្ថានភាពនៅតាមព្រំដែនរវាងកម្ពុជា-ថៃ កំពុងមានភាពតាន់តឹងក៏ដោយ។ ជាក់ស្តែងប៉ុន្មានថ្ងៃមុនមានស្ត្រីម្នាក់ជាជនជាតិថៃម្នាក់ឈឺពោះសម្រាកកូន ត្រូវបានក្រុមគ្រូពេទ្យនៅក្នុងក្រុងប៉ោយប៉ែត យកចិត្តទុកដាក់បញ្ចូនទៅមន្ទីរពេទ្យសម្រាលកូនដោយជោគជ័យ និងបានបញ្ជូនទៅដល់ទឹកដីប្រទេសថៃប្រកបដោយសុវត្ថិភាព។

ទង្វើរបស់ភាគីថៃដែលធ្វើទៅលើស្រ្តីមានផ្ទៃពោះខ្មែរម្នាក់ ត្រូវបានអន្តរជាតិមើលឃើញថា ជាទង្វើរំលោភលើសិទ្ធិមនុស្ស អមនុស្សធម៌ ហើយតែងលើកសរសើរខ្លួនឯង ឱ្យថាល្អ ទម្លាក់កំហុសមកលើកម្ពុជាទាំងដែលខ្លួនជាអ្នកបង្កបញ្ហានៅព្រំដែនរវាងកម្ពុជា-ថៃ និងបានធ្វើការបិទច្រកព្រំដែនជាមួយកម្ពុជា ជាឯកតោភាគី ដោយគ្មានការជូនដំណឹងមកកម្ពុជា៕ អត្ថបទ៖ ឃិន សារិទ្ធ