អាណាព្យាបាលព្យាយាមបណ្ដុះទម្លាប់អានសៀវភៅដល់កូនៗ ដោយទិញសៀវភៅជូនពួកគាត់

អាណាព្យាបាលមួយចំនួន បានយកចិត្តទុកដាក់ជាខ្លាំងចំពោះការរីកលូតលាស់របស់កូន ទាំង​កាយ​សម្បទា និងបញ្ញាស្មារតី។ ចាប់តាំងពីកូននៅតូចៗ ពួកគាត់ជាអាណាព្យាបាល បាន​ចាប់​ផ្ដើម​ទិញ​សៀវភៅ ឬជូនកូនៗឱ្យចូលរួមពិព័រណ៍សៀវភៅ រើសសៀវភៅដោយខ្លួនឯង ដើម្បី​បណ្ដុះ​ទម្លាប់​អាន​ជូនពួកគាត់។

ជារៀងរាល់ថ្ងៃ កំឡុងពេលដែលមានការរៀបចំពិព័រណ៍សៀវភៅ BIG BAD WOLF នៅ​ផ្សារ​រុង​រឿង​ ខណ្ឌជ្រោយចង្វា តាំងពីថ្ងៃទី ២៦ ខែមិថុនាមកនេះ តែងមាន​វត្ត​មាន​អាណា​ព្យាបាល​ជូន​កូន​តូច​មក​ចូលរួម ឬពេលខ្លះអាណាព្យាបាលមកតែឯង ដើម្បីទិញសៀវភៅ​ជូន​កូន​រប​ស់​ពួក​គាត់​។

ជាក់ស្ដែងកាលពីម្សិលម៉ិញនេះ ក៏មានវត្តមានអាណាព្យាបាលមួយចំនួន ក្រោយ​សម្រាក​ពី​ការ​ងារ​ក៏​បាន​មករកទិញសៀវភៅជូនកូនៗផងដែរ។ ខ្លះមកជាមួយកូន ខ្លះមកតែឯង ដោយក្នុង​គោល​ដៅ​រួម​គឺ បណ្ដុះទម្លាប់អានសម្រាប់កូនៗតាំងពីវ័យកុមារ។ ពួកគាត់ម្នាក់ៗផ្ដល់គុណតម្លៃជាខ្លាំង ទៅ​លើការអានសៀវភៅ។ ពួកគាត់ចង់ឃើញកូនៗ កាន់សៀវភៅអានរាល់ពេលទំនេរ ចង់​ឃើញ​កូន​ក្លាយ​ជា​ធនធានសំខាន់ ធនធានពោពេញដោយចំណេះដឹងសម្រាប់អនាគតកម្ពុជា។

ស្របពេលដែលពួកគាត់កំពុងជំរុញទម្លាប់ការអានដល់កូនៗ ពួក​គាត់​ក៏​ចង់​ឃើញ​អាណា​ព្យាបាល​ដទៃ​ទៀត​ ធ្វើរឿងដូចគ្នា។ ធ្វើជាគំរូដល់កូន ដោយចាប់ផ្ដើមដំបូង ពីការអាន​សៀវភៅ​ឱ្យ​កូន​ស្ដាប់​នៅ​ពេល​ពួកគាត់មិនទាន់ចេះអាន និងជំរុញឱ្យពួកគាត់អានដោយខ្លួនឯង នៅពេលពួក​គេ​មាន​សមត្ថ​ភាព​អានអក្សរ មិនថាជាភាសាខ្មែរ ឬភាសាបរទេស។

ជាការយកទឹកដាក់លើការជំរុញការអាន សម្រាប់ប្រជាពលរដ្ឋទូទៅទាំងអស់ កម្មវិធីពិ​ព័រណ៍​សៀវ​ភៅជា​ច្រើន ត្រូវបានរៀបចំ ជាបន្តបន្ទាប់ជារៀងរាល់ឆ្នាំ។ ក្នុងនោះមានពិព័រណ៍សៀវភៅថ្នាក់ជាតិ ដែល​រៀបចំឡើងជារៀងរាល់ឆ្នាំ ហើយក៏មានវត្តមានពិព័រណ៍សៀវភៅ Big Bad Wolf ដែល​តែង​ចូល​រួម​ក្នុងការលើកកម្ពស់ការអានសៀវភៅនៅកម្ពុជាផងដែរ។ ជាក់ស្ដែងសម្រាប់ឆ្នាំ ២០២៥នេះ ពិព័រណ៍សៀវភៅជាភាសាអង់គ្លេសមួយនេះ កំពុងរៀបចំនៅផ្សាររុងរឿង ខណ្ឌជ្រោយចង្វា ចាប់​តាំង​ពីថ្ងៃទី២៦ ខែមិថុនា រហូតដល់ថ្ងៃទី ៦ ខែកក្កដា ផងដែរ៕ អត្ថបទ៖ គឹម ហុក