ឯកឧត្តម ហេង សួរ នឹងដឹកនាំក្រុមហ៊ុនធំៗចុះទៅសម្ភាសន៍ផ្តល់ឱកាសការងារដល់ពលរដ្ឋ ចាប់ពីថ្ងៃទី៦ខែកក្កដានេះតទៅ

ឯកឧត្តម ហេង សួរ រដ្ឋមន្រ្តីក្រសួងការងារ និងបណ្ដុះបណ្ដាលវិជ្ជាជីវៈ គ្រោង​នឹង​ដឹក​នាំ​ក្រុម​ហ៊ុន​ធំ​ៗ​នៅ​ក្នុងប្រទេសកម្ពុជា ដើម្បីចុះទៅសម្ភាសន៍ជ្រើសរើសកម្លាំងពលកម្មនៅតាមភូមិ ស្រុក ក្នុង​ខេត្ត​ចំនួន៥ មានដូចជា ព្រៃវែង កំពង់ចាម បាត់ដំបង កំពង់ធំ និងបន្ទាយមានជ័យ ចាប់ពីថ្ងៃទី៦ ខែ​កក្កដាខាងមុខនេះតទៅ។

ឯកឧត្តម ស៊ុន មេសា អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ នៅព្រឹកថ្ងៃទី៣ ខែ​កក្កដា ឆ្នាំ២០២៥នេះ បានមានប្រសាសន៍ប្រាប់ព័ត៍មាន ប៊ីធីវី ឱ្យដឹងថា ចំពោះ​ការងារ​គ្រោង​ចុះ​ទៅ​ផ្សព្វ​ផ្សាយឱកាសការងារនេះ ឯកឧត្តមរដ្ឋមន្រ្តី ហេង សួរ នឹងដឹកនាំដោយផ្ទាល់ ដោយចាប់​ផ្តើម​ពី​ខេត្ត​ព្រៃវែងមុនគេ តាមរយៈរថយន្តការងារចល័តរបស់ទីភ្នាក់ងារជាតិមុខរបរ និងការងារ​(NEA)​ នៃក្រសួងការងារ និងបណ្ដុះបណ្ដាលវិជ្ជាជីវៈ ក្នុងគោល​បំណង​ដើម្បី​រំកិល​សេវា​ផ្ដល់​ឱ​កាស​ការងារជូនពលរដ្ឋដល់មុខផ្ទះតែម្ដង ព្រោះនៅតំបន់​ដាច់​ស្រយាល​មួយ​ចំនួន​មិន​ទទួល​បាន​ព័ត៌មាន​គ្រប់​ជ្រុងជ្រោយពីការស្វែងរកការងារ ឬពលរដ្ឋមិនដឹងទៅរកការងារនៅឯណា? ជា​ដើម​។ ដើម្បីដោះស្រាយចម្ងល់ទាំងនេះ ក្រសួងត្រូវតែបើកយុទ្ធនាការនេះឡើង ក្នុង​ការ​ឱកាស​ផ្ដល់​ការងារ​ធ្វើ​ដ៏សំបូរបែបទៅដល់ភូមិ ស្រុករបស់ប្រជាពលរដ្ឋតែម្ដង ជាពិសេសផ្សព្វផ្សាយ​ដល់​ឱ្យ​ដល់​បង​ប្អូនពលករដែលត្រឡប់មកពីប្រទេសថៃ។

ឯកឧត្តមអ្នក​នាំពាក្យ បានបញ្ជាក់បន្ថែមថា ក្រៅពីការងារផ្ស​ព្វ​ផ្សាយ​ជាប់​ជា​ប្រចាំ​របស់​ក្រសួង​ការ​ងារ មន្ទីរការងារ និង NEA ក្រសួងក៏បានសម្រេចបង្កើនការងារទាំងនេះបន្ថែមទៀត មានដូចជា ក្រុម​ហ៊ុនមកពីក្នុងតំបន់សេដ្ឋកិច្ចពិសេស, សមាគមវាយនភណ្ឌ សម្លៀកបំពាក់ ស្បែកជើង និង​ផលិត​ផលធ្វើដំណើរនៅកម្ពុជា និងរោងចក្រផ្សេងៗទៀត ដើម្បីឱ្យពលរដ្ឋ​មាន​ឱកាស​បាន​ជួប​ជា​មួយ​ម្ចាស់ ឬតំណាង រោងចក្រ សហគ្រាស ដើម្បីបានជួបនិងសម្ភាសន៍ការងារភ្លាមៗតែម្តង។

ពាក់​ព័ន្ធការគ្រោងចុះផ្សព្វផ្សាយឱកាសការងារខាងលើនេះ លោកជំទាវ កែវ មុំ ប្រធាន​សភា​មុខ​របរ និងមីក្រូសហគ្រាសកម្ពុជា និងជាប្រធាននំស្រួយ លីលី បង្ហាញការគាំទ្រពេញទំហឹង និង​បាន​លើក​ឡើង​ថា បច្ចុប្បន្នមានអ្នកវិនិយោគ និងវិនិយោគិនជាច្រើនបានចូលមកវិនិយោគនៅកម្ពុជា ដូច​ជា​នៅក្នុងតំបន់សេដ្ឋកិច្ចជាដើម ដូច្នេះតម្រូវការកម្លាំងពលកម្មគឺពិតជាមានច្រើន និង​ខ្វះ​ខាត​ច្រើន​មែន​ទែន។ លោកជំទាវ បានបន្តថា នៅពេលដែលមានអ្នកវិនិយោគចង់បើកក្រុមហ៊ុន ឬ​រោង​ចក្រ សហគ្រាសនៅកម្ពុជា សំណួរមុនដំបូងដែលសួរមុនគេ គឺថា នៅតំបន់​ដែលចង់​បើក​ទាំង​នោះ​តើ​មានកម្លាំងពលកម្មគ្រប់គ្រាន់ដែរឬទេ?

មិនខុសគ្នា​ខាង​លើ​នេះ ឯកឧត្តមបណ្ឌិត តាន់ មុនីវណ្ណ អនុប្រធានសភាពាណិជ្ជកម្មកម្ពុជា បាន​អំពាវ​នាវដល់ពលករខ្មែរដែលត្រឡប់មកពីប្រទេសថៃជាពិសេសថា សូមរៀប​ចំ​ខ្លួន​ឱ្យ​បាន​រួច​រាល់​ក្នុង​ការ​ឆ្លងដែនត្រឡប់មកស្រុកកំណើតវិញ ហើយរួសរាន់ទាក់ទងក្រសួងការងារ និងបណ្តុះ​បណ្តាល​វិជ្ជាជីវៈ ដើម្បីចុះឈ្មោះស្វែងរកការងារធ្វើ។ ឯកឧត្តមបណ្ឌិត បានបន្ថែមថា ក្នុងនោះ​ប្រសិន​បើ​បងប្អូនពលករអាចប្រមូលគ្នាជាក្រុមបាន គឺកាន់តែល្អថែមទៀត ដើម្បីងាយ​ស្រួល​ឱ្យ​ក្រសួង​ការងារ រៀបចំការងារជាក្រុម និងទាក់ទងទៅ​កាន់​បណ្តា​ក្រុមហ៊ុន​ដែល​មាន​តម្រូវ​ការ​ចាំ​បាច់ និងតាមជំនាញដែលខ្លួនមាន។

បើតាមក្រសួងការងារ និងបណ្ដុះបណ្ដាលវិជ្ជាជីវៈ កម្លាំងពលកម្ម​ដែល​កំពុង​មាន​តម្រូវ​ការ​ខ្ពស់​នា​ពេល​នេះ ​គឺការងារនៅក្នុងកសិដ្ឋាន រោងចក្រវាយនភ័ណ្ឌកាត់ដេរ ការងារក្នុងវិស័យឧស្សាហកម្ម វិស័យ​ទេសចរណ៍ វិស័យយានយន្តគ្រប់ប្រភេទ និងវិស័យសំខាន់ៗជាច្រើនទៀត ចំនួន​ប្រមាណ​ជាង ២៥ម៉ឺនកន្លែង៕ អត្ថបទ៖ ឈិត បូរ៉ាវី