មន្ត្រី អាជ្ញាធរមូលដ្ឋាននៅមជ្ឈមណ្ឌលប្រល័យពូជសាសន៍ជើងឯក ទូងស្គរ អបអរសារការចុះ «បូជនីយដ្ឋានចងចាំនៃកម្ពុជា៖ ពីទីតាំងឧក្រិដ្ឋកម្មមកជា មណ្ឌលផ្សះផ្សានិងសន្តិភាព» ក្នុង​បញ្ជី​បេតិក​ភណ្ឌពិភពលោក

នៅព្រឹកថ្ងៃទី១៣កក្កដានេះ បុគ្គលិកមន្ត្រី នៃមជ្ឈមណ្ឌលប្រល័យពូជសាសន៍ជើងឯក និង​ព្រះ​សង្ឃ​ អាជ្ញាធរមូលដ្ឋានជាច្រើនរូបនាំគ្នាប្រារព្ធពិ​ធីទូងស្គរ អបអរសារ មជ្ឈមណ្ឌល​ប្រល័យ​ពូជ​សាសន៍​ជើងឯក​ សារមន្ទីរឧក្រិដ្ឋកម្មប្រល័យពូជសាសន៍ទួលស្លែង និង​អតីតមន្ទីរឃុំឃាំង ម-១៣ បានចុះ «បូជនីយដ្ឋានចងចាំនៃកម្ពុជា៖ ពីទីតាំងឧក្រិដ្ឋកម្មមកជា មណ្ឌលផ្សះផ្សានិងសន្តិភាព» ក្នុ​ង​បញ្ជីបេតិកភណ្ឌពិភពលោក ថ្ងៃទី១១ ខែកក្កដា ឆ្នាំ២០២៥។

លោក អ៊ុច កុសល ប្រធានផ្នែកអប់រំផ្សព្វផ្សាយ នៃមជ្ឈមណ្ឌលប្រល័យពូជសាសន៍ថា តំណាង​ឲ្យ​ថ្នាក់​ដឹកនាំ និងបុគ្គល មន្ត្រីរាជការ នៃមជ្ឈមណ្ឌលប្រល័យពូជសាសន៍ជើងឯក នៅរាជធានី​ភ្នំពេញ​ គឺក្តីសប្បាយរីករាយខ្លាំង ដែលមជ្ឈមណ្ឌលមួយនេះ បានចុះ​«បូជនីយ​ដ្ឋាន​ចង​ចាំ​នៃ​កម្ពុជា​៖ ពីទីតាំងឧក្រិដ្ឋកម្មមកជា មណ្ឌលផ្សះផ្សានិងសន្តិភាព» ក្នុងបញ្ជីបេតិកភណ្ឌពិភពលោក រួម​គ្នាជាមួយសារមន្ទីរឧក្រិដ្ឋកម្មប្រល័យពូជសាសន៍ទួលស្លែង និង អតីតមន្ទីរឃុំឃាំង ម-១៣ ហើយ​តាមរយៈការចុះបញ្ជីនេះ នឹងជួយផ្សព្វផ្សាយកិត្តិនាមទៅលើឆាកអន្តរជាតិ ក៏ដូច​ជា​ការ​ធានា​បាន​នូវការអភិរក្ស និងអភិវឌ្ឍមជ្ឈមណ្ឌលនេះឲ្យមានការរីកចម្រើនស្ថិតស្ថេរ គង់វង្ស​តរៀង​ទៅ​។

ព្រះសង្ឃ និងពលរដ្ឋធ្លាប់ជាប់ឃុំក្នុងរបបប៉ុល ពត លើកឡើងថា ការដាក់​បូជនីយ​ដ្ឋាន​ចង​ចាំ​នៃ​កម្ពុជា​ តំណាងធំៗចំនួន៣ ចូលក្នុងបញ្ជីបេតិកភណ្ឌពិភពលោក ដោយអង្គការយូណេស្កូ នៅ​ទី​ក្រុង​បារីស ប្រទេសបារំាងនេះ នឹងបង្កើនការជួយថែរក្សា និងបន្សល់ទុកជាកេរមរតកប្រវត្តិសាស្ត នៃ​ការ​ចងចាំ សម្រាប់កូនចៅខ្មែរជំនាន់ក្រោយ និងមនុស្សជាតិទូទាំងពិភពលោក រាប់ពាន់​ឆ្នាំត​ទៅ​មុខ​ឲ្យយល់ដឹងពីវិនាសកម្ម អំពើឧក្រិដ្ឋកម្ម ការផ្សះផ្សាជាតិ ការស្វែងរកយុត្តិធម៌ជូនជនរងគ្រោះ ការ​អប់រំ ការកសាង និងការការពារសន្តិភាព។

សូមបញ្ជាក់ថា នៅថ្ងៃទី១១ ខែកក្កដា ឆ្នាំ២០២៥ គណៈកម្មាធិការបេតិកភណ្ឌពិភពលោក នៃ​អង្គ​ការ​យូណេស្កូ បានសម្រេចជាឯកច្ឆន្ទចុះ «បូជនីយដ្ឋានចងចាំនៃកម្ពុជា៖ ពី ទីតាំង​ឧក្រិដ្ឋ​កម្ម​មក​ជា​មណ្ឌល​ផ្សះផ្សា និងសន្តិភាព» ទៅក្នុងបញ្ជីបេតិកភណ្ឌពិភពលោក នាសម័យប្រជុំ​លើក​ទី​៤៧ នៅទីក្រុងប៉ារីស ប្រទេសបារាំង តាមសំណើរបស់រាជរដ្ឋាភិបាលកម្ពុជា ក្រោមគំ​និត​ផ្តួច​ផ្តើម​ប្រកប​ដោយ​ចក្ខុវិស័យវែងឆ្ងាយរបស់សម្ដេច អគ្គមហាសេនាបតីតេជោ ហ៊ុន សែន អតីត​នាយក​រដ្ឋ​មន្ត្រី ​បច្ចុប្បន្នជាប្រធានព្រឹទ្ធសភា៕ អត្ថបទ ស៊ុម សុខជា