ព័ត៌មាន
រដ្ឋបាលខេត្តព្រះវិហារ អបអរសាទរព្រឹត្តិការណ៍ជាប្រវត្តិសាស្ត្រនៃការចុះបញ្ជី “បូជនីយដ្ឋានចងចាំ នៃកម្ពុជា” ជាសម្បត្តិបេតិកភណ្ឌពិភពលោក
ដើម្បីអបអរសាទរជោគជ័យដ៏ធំធេងជាប្រវត្តិសាស្ត្រ កាលពីថ្ងៃទី១១ ខែកក្កដា ឆ្នាំ២០២៥ នាសម័យប្រជុំលើកទី៤៧ នៅទីក្រុងប៉ារីស ប្រទេសបារាំង ដែលអង្គការយូណេស្កូ បានសម្រេចចុះបញ្ជី “បូជនីយដ្ឋានចងចាំ នៃកម្ពុជា៖ ពីទីតាំងឧក្រិដ្ឋកម្មមកជាមណ្ឌលផ្សះផ្សា និងសន្តិភាព” ជាសម្បត្តិបេតិកភណ្ឌពិភពលោក នាព្រឹកថ្ងៃទី១៣ ខែកក្កដា ឆ្នាំ២០២៥នេះ រដ្ឋបាលខេត្តព្រះវិហារ បានរៀបចំពិធីអបអរសាទរ ដ៏មហោឡារិក ក្រោមអធិបតីភាព ឯកឧត្តម ប្រាក់ សុវណ្ណ ប្រធានក្រុមប្រឹក្សាខេត្ត និងឯកឧត្តម គីម រិទ្ធី អភិបាលខេត្ត ព្រមទាំងមានការចូលរួមពីថ្នាក់ដឹកនាំគ្រប់លំដាប់ថ្នាក់ កងកម្លាំងប្រដាប់អាវុធ មន្ដ្រីរាជការ លោកគ្រូ អ្នកគ្រូ សិស្សានុសិស្ស យុវជន និងយុវនារីយ៉ាងច្រេីនកុះករ នៅបរិវេណសួនច្បារមុខសាលាខេត្តព្រះវិហារ ។
ក្នុងឱកាសនោះ ឯកឧត្តម គីម រិទ្ធី អភិបាលខេត្ត បានសម្ដែងនូវអំណរសាទ និងថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាលកម្ពុជា ចំពោះកិច្ចខិតខំប្រឹងប្រែងសម្រេចបាននូវស្នាដៃជាប្រវត្តិសាស្ត្រនេះ។ ឯកឧត្តមបានបញ្ជាក់ថា ការចុះបញ្ជី “បូជនីយដ្ឋានចងចាំ នៃកម្ពុជា៖ ពីទីតាំងឧក្រិដ្ឋកម្មមកជាមណ្ឌលផ្សះផ្សា និងសន្តិភាព” ជាសម្បត្តិបេតិកភណ្ឌពិភពលោក គឺមិនត្រឹមតែជា មោទនភាពជាតិដ៏ធំធេង ប៉ុណ្ណោះទេ ប៉ុន្តែក៏ជាការទទួលស្គាល់ដ៏សំខាន់ពីសហគមន៍អន្តរជាតិ ចំពោះការលះបង់ និងការឈឺចាប់ដែលប្រជាជនកម្ពុជាបានឆ្លងកាត់ក្នុងរបបប្រល័យពូជសាសន៍។
ឯកឧត្តមបានសង្កត់ធ្ងន់ថា ព្រឹត្តិការណ៍នេះគឺជាការរំលឹកដ៏ជ្រាលជ្រៅដល់មនុស្សជំនាន់ក្រោយអំពី សារៈសំខាន់នៃសន្តិភាព និងការផ្សះផ្សាជាតិ។ យើងត្រូវចងចាំជានិច្ចថា សន្តិភាពដែលយើងកំពុងមានសព្វថ្ងៃ គឺបានមកដោយការលំបាក និងការលះបង់ដ៏ធំធេង ហើយការចងចាំនូវអតីតកាលដ៏ឈឺចាប់ គឺដើម្បីធានាថាសោកនាដកម្មបែបនេះនឹងមិនកើតឡើងជាថ្មីម្តងទៀតឡើយ។
ទន្ទឹមនេះ ឯកឧត្តមអភិបាលខេត្ត បានអំពាវនាវដល់ប្រជាពលរដ្ឋ លោកគ្រូ អ្នកគ្រូ ក៏ដូចជាសិស្សានុសិស្ស ទាំងអស់ ជួយផ្សព្វផ្សាយនូវព្រឹត្តិការណ៍ប្រវត្តិសាស្ត្រដ៏សំខាន់នេះឱ្យបានទូលំទូលាយ នៃការចុះបញ្ជីបូជនីយដ្ឋានចងចាំ នៃកម្ពុជា ដើម្បីបម្រើជាមេរៀនដ៏សំខាន់មួយសម្រាប់មនុស្សជាតិទាំងមូល អំពីផលវិបាកនៃការស្អប់ខ្ពើម និងសារៈសំខាន់នៃសាមគ្គីភាព និងការអភ័យទោស ព្រមទាំងយល់ដឹងអំពីអតីតកាល ពង្រឹងស្មារតីសន្តិភាព និងការរួបរួមរបស់យើងសម្រាប់ពេលអនាគត។
សូមបញ្ជាក់ថា ទីតាំងប្រវត្តិសាស្ត្រដែលបានចុះបញ្ជីជាសម្បត្តិបេតិកភណ្ឌពិភពរួមមាន៖ សារមន្ទីរឧក្រិដ្ឋកម្មប្រល័យពូជសាសន៍ទួលស្លែង (ស-២១), មជ្ឈមណ្ឌលប្រល័យពូជសាសន៍ជើងឯក (វាលពិឃាត) និងអតីតមន្ទីរឃុំឃាំង ម-១៣ (នៅខេត្តកំពង់ស្ពឺ/កំពង់ឆ្នាំង) ។ ទីតាំងទាំងបីនេះតំណាងឱ្យដំណាក់កាលផ្សេងៗគ្នានៃប្រព័ន្ធគាបសង្កត់របស់ខ្មែរក្រហម ហើយឥឡូវនេះត្រូវបានផ្លាស់ប្តូរទៅជាទីកន្លែងសម្រាប់រំលឹកដល់ជនរងគ្រោះ ការឆ្លុះបញ្ចាំងពីអតីតកាល និងការលើកកម្ពស់ការសិក្សា ដើម្បីលើកទឹកចិត្តដល់ការរស់នៅជាមួយគ្នាដោយសន្តិភាព និងការប្តេជ្ញាចិត្តរួមគ្នាក្នុងការទប់ស្កាត់អំពើឃោរឃៅបែបនេះនាពេលអនាគត។

-
កីឡា1 week ago
ក្នុងឱកាសខួប ៥ឆ្នាំ នៃកីឡដ្ឋានខេត្តកំពង់ស្ពឺ ឯកឧត្តម ហ៊ុន ម៉ានី បង្ហើបពីតម្រុយថ្មី
-
ព័ត៌មាន1 week ago
មន្ត្រីសង្ឃខេត្តសៀមរាប នាំយកជំនួយសប្បុរសជននៅអាមេរិក ជូនកងទ័ពជួរមុខ ក្នុងខេត្តឧត្តរមានជ័យ
-
ព័ត៌មាន5 days ago
ជនសង្ស័យ៤នាក់ ត្រូវបានកម្លាំងកងទ័ពចាប់ខ្លួនភ្លាមៗ ក្រោយពួកគេព្យាយាមដឹកកូនត្រីខុសច្បាប់ក្នុងរដូវបិទនេសាទទៅលក់បន្តអោយឈ្មួញ
-
ព័ត៌មាន23 hours ago
សភាពការណ៍ជួរមុខតាមបន្ទាត់ព្រំដែនខេត្តព្រះវិហារ ឧត្តរមានជ័យ និងបន្ទាយមានជ័យមានសភាពស្ងប់ស្ងាត់
-
ព័ត៌មាន1 week ago
ករណីគ្រោះថ្នាក់រថភ្លើងដឹកប្រេងក្រឡាប នៅក្រុងបាត់ដំបង ខេត្តបាត់ដំបង តែមិនបង្ករអោយមានអ្នករបួសនោះទេ
-
ព័ត៌មាន7 days ago
កម្ពុជាបន្តដាស់តឿនឲ្យថៃគោរពឲ្យបានខ្ជាប់ខ្ជួនបទឈប់បាញ់ និងបន្តទាមទារឲ្យដោះលែងទាហានខ្មែរទាំង១៨នាក់
-
ព័ត៌មាន1 week ago
ពលរដ្ឋខ្មែរនិងព្រះសង្ឃ ជាង ១០០០អង្គ/នាក់ ជួបជុំគ្នាបាតុកម្ម សុំឱ្យសហគមន៍អន្តរជាតិ អន្តរាគមន៍ឱ្យប្រទេសថៃ គោរពបទឈប់បាញ់ និងដោះលែងកងទ័ពកម្ពុជាដោយឥតលក្ខខណ្ឌ
-
ព័ត៌មាន3 days ago
កម្ពុជាជឿជាក់កិច្ចប្រជុំថ្នា RBCថ្ងៃនេះ នឹងទទួលបានលទ្ធផលល្អ រហូតដល់គោរពបាន នូវបទឈប់បាញ់ប្រកបដោយប្រសិទ្ធភាព