អាជ្ញាធរ និងពលរដ្ឋខេត្តកំពតចូលរួមអបអរការចុះ បូជនីយដ្ឋានចងចាំនៃកម្ពុជា ជាបេតិកភណ្ឌពិភពលោក

កំព​ត៖ នៅព្រឹកថ្ងៃទី១៣ ខែកក្កដា ឆ្នាំ២០២៥ នៅសាលាខេត្តកំពត ទីវត្តអារាម ស៊ូរាវ វិហារសាសនានាទូទាំងខេត្ត បានរៀបចំពីធីទូងស្គរ វាយគង ទះប៉ោត និងគោះត្រដោក ដើម្បីអប់អរសាទរការចុះ “បូជនីយដ្ឋានចងចាំនៃកម្ពុជា៖ ពីទីតាំងឧក្រិដ្ឋកម្មមក ជាមណ្ឌលផ្សះផ្សា និងសន្តិភាព” ជាបេតិកភណ្ឌពិភពលោក។

ប្រជាពលរដ្ឋ និងព្រះសង្ឃបានបង្ហាញអំពីមោទកភាពចំពោះថ្នាក់ដឹកនាំកម្ពុជាដែលបាននាំមកនូវមហាសមិទ្ធផលថ្មីមួយបន្ថែមទៀត ដែលបង្ហាញពីកិត្យានុភាពកម្ពុជានៅលើឆាកអន្តរជាតិ។ ការចុះបញ្ជីតំបន់ប្រល័យពូជសាសន៍ជាសម្បត្តិបេតិកភណ្ឌពិភាពលោក សម្រាប់ទុកជាកេរមរតកប្រវត្តិសាស្ត្រ នៃការចងចាំ សម្រាប់កូនចៅជំនាន់ក្រោយរាប់ពាន់ឆ្នាំតទៅមុខ។ មិនតែប៉ុណ្ណោះវាក៏ជាអំណោយយ៉ាងអស្ចារ្យមួយរបស់កម្ពុជា ជូនដល់មនុស្សជាតិទូទាំងពិភពលោក នូវគំរូនៃការចងចាំ ការផ្សះផ្សាជាតិ ការស្វែងរកយុត្តិធម៌ជូនជនរងគ្រោះ ការអប់រំ ការកសាង និងការការពារសន្តិភាព ផងដែរ។ ហើយថា ការស្វះស្វែងរកយុត្តិធម៌ ការផ្សះផ្សាជាតិ និងការកសាងសន្តិភាពរបស់ប្រជាជាតិនិងប្រជាជនខ្មែរ គឺជាគំរូមួយចំពោះ ពិភពលោកស្តីពីការតស៊ូដ៏យូរអង្វែងរបស់កម្ពុជា ក្នុងការផ្លាស់ប្តូរដោយជោគជ័យពីរបបប្រល័យពូជសាសន៍ មកជា ប្រទេសពោរពេញទៅដោយសុខសន្តិភាពនិងការអភិវឌ្ឍ ក្រោមពាក្យស្លោក “អរគុណសន្តិភាព”។

គូររម្លឹកថាបើតាមសារលិខិតរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាកម្ពុជា ថាមហាសមិទ្ធផលនេះ គឺជាកិត្យានុភាពដ៏ខ្ពស់ត្រដែតថ្មីមួយទៀតរបស់ជាតិយើងលើឆាកអន្តរជាតិ ដែល កើតចេញពីការបន្តវេននៃវីរជនខ្មែរជំនាន់ក្រោយៗ ស្មារតីសាមគ្គីរូបរួមជាតិ «ខ្មែរតែមួយ» ក្រោមម្លប់នៃសុខសន្តិភាព ដែលជាមូលដ្ឋាននៃការកសាងនិងការអភិវឌ្ឍជាតិលើគ្រប់វិស័យ រួមទាំងការអភិរក្ស ការអភិវឌ្ឍសម្បត្តិវប្បធម៌ និងការការពារសច្ចភាពប្រវត្តិសាស្ត្ររបស់ជាតិ៕