សម្ដេចធិបតី បន្តផ្ដល់លក្ខខណ្ឌចំនួន៣ដល់ថៃ ដើម្បីឈានទៅការបើកព្រំដែនប្រទេសទាំងពីរឡើងវិញ

ក្នុងឱកាសអញ្ជើញជាអធិបតីភាពដ៏ខ្ពង់ខ្ពស់សម្ពោធដាក់ឱ្យប្រើប្រាស់ជាផ្លូវការនូវសមិទ្ធផលនានា នៅមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំសែនរីករាយ និងអបអរសាទរខួបលើកទី៣២ ទិវាកងរាជអាវុធហត្ថ (១៤ កក្កដា ១៩៩៣ – ១៤ កក្កដា ២០២៥) ព្រឹកនេះ សម្ដេចធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានបន្តបើកផ្លូវផ្ដល់លក្ខខណ្ឌចំនួន៣ដល់ភាគីថៃ ដើម្បីឈានទៅការបើកព្រំដែនប្រទេសទាំងពីរឡើងវិញបាន។

ក្រោយមានការស្នើសុំក្រៅផ្លូវការជាបន្តបន្ទាប់មកកាន់កម្ពុជាពីមន្រ្ដីថៃ សម្តេចធិបតី ហ៊ុន ម៉ាណែត បានថ្លែងបញ្ជាក់ថា ការបើកច្រកព្រំដែនមិនលំបាកនោះទេ កូនសោស្ថិតលើដៃរបស់ថៃ។ សម្តេចបានផ្តល់លក្ខខណ្ឌចំនួនបី សម្រាប់ការបើកព្រំដែនប្រទេសទាំងពីរឡើងវិញ គឺទី១ ថៃត្រូវប្រកាសបើកមុនច្រកព្រំដែនមុន ហើយមិនបិទជាឯកតោភាគីជាថ្មី, ទី២ ថៃត្រូវបើកគ្រប់ច្រក មិនមែនបើកខ្លះ បិទខ្លះនោះទេ, និងទីបី៣ ថៃត្រូវបើកច្រកព្រំដែនឡើងវិញឱ្យដូចកាលពីមុនថ្ងៃទី៧ ខែមិថុនា។

សូមរម្លឹកថា ក្រោយពីយោធាថៃ បានបន្តបិទ-បើកច្រកព្រំដែនជាឯកតោភគីដោយមិនប្រាប់កម្ពុជា, កាលពីយប់ថ្ងៃទី២១ មិថុនា ឆ្នាំ២០២៥ សម្ដេចធិបតី ហ៊ុន ម៉ាណែត នាយករដ្ឋមន្ត្រី បានសម្រេចឱ្យបិទច្រកព្រំដែនកម្ពុជាជាអចិន្ត្រៃយ៍វិញ។ សម្ដេចបានបញ្ជាក់ថា កម្ពុជាមិនដែលមានបំណងចង់បង្កការលំបាកដល់ប្រជាពលរដ្ឋនៃប្រទេសទាំងពីរដែលរស់នៅ ឬធ្វើដំណើរឆ្លងកាត់ច្រកព្រំដែននោះទេ។ ប៉ុន្តែបើកងទ័ពថៃបានបន្តប្រើវិធីបែបនេះដើម្បីដាក់គំនាបមកលើកម្ពុជានោះគឺកម្ពុជាកំដរបានគ្រប់ពេលវេលា៕