អនុប្រធានទី១រដ្ឋសភា៖ កម្ពុជា និងឡាវ ជាអ្នកជិតខាង​ដ៏ល្អគាំទ្រ​គ្នា​ទៅវិញ​ទៅ​មក​គ្រប់​កាលៈ​ទេសៈ

ភ្នំពេញ៖ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា នាព្រឹកថ្ងៃទី១៧ ខែ​កក្កដា ឆ្នាំ២០២៥ បានអនុញ្ញាតិអោយឯកឧត្តម H.E .Phongsaysack INTHATH អនុរដ្ឋមន្ត្រី​ក្រសួង​ការងារ និងសុខមាលភាពសង្គម សាធារណៈរដ្ឋប្រជាធិបតេយ្យប្រជាមានិតឡាវ ចូល​ជួប​សម្តេង​ការ​គួរសម និងពិភាក្សាការងារ នៅវិមានរដ្ឋសភា។ កិច្ចពិភាក្សានេះមានការអញ្ជើញចូលរួម ឯកឧត្តម លោកជំទាវ សមាជិក សមាជិកាក្រុមមិត្តភាពសភាកម្ពុជា ឡាវ និងសមាជិក សមាជិការ​គណៈ​កម្មការ​ទី៨ នៃរដ្ឋសភា។

ឯកឧត្តម H.E .Phongsaysack INTHATH អនុរដ្ឋមន្ត្រីក្រសួងការងារ និងសុខមាលភាពសង្គម សាធារណៈរដ្ឋប្រជាធិបតេយ្យប្រជាមានិតឡាវ បានមានប្រសាន៍ថា ឯកឧត្តម និងសមាជិក​អញ្ជើញ​មក​បំពេញទស្សនកិច្ចផ្លូវការ និងមិត្តភាពនាពេលនេះគឺមានគោលមណងដើម្បីពិភាក្សា និង​ចែក​រំលែក​បទ​ពិសោធ​ទាក់​ទង​ការ​គ្រប់​គ្រង​គាំ​ពារ​សង្គម​រវាង​សាធារណៈ​រដ្ឋ​ប្រជាធិ​បតេយ្យ​ប្រជា​មានិត​ឡាវ និងព្រះរាជាណាចក្រកម្ពុជា។

ឯកឧត្តមកិត្តិសេដ្ឋាបណ្ឌិត ជាម យៀប បានស្វាគមន៍យ៉ាងកក់ក្តៅ និងវាយតម្លៃ​ខ្ពស់​ជូន​គណៈ​ប្រតិភូ​ឡាវ និងបានមានប្រសាសន៍ថា ឯកសូមគោរព ឯកឧត្តម លោកជំទាវ លោក លោកស្រី ដែល​ជាគណៈប្រតិភូឡាវជាបងប្អូនអញ្ជើញមកពីគណៈកម្មការជាតិ គាំពារ សង្គម តំណាង​មក​ពី​រដ្ឋ​សភា និងអង្គការសង្គមស៊ីវិលជាដៃគូ។

ឯកឧត្តមបានបន្តថា កម្ពុជាក្នុងនាមសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃ​ព្រះរា​ជា​ណា​ចក្រកម្ពុជា ឯកឧត្តមស្វាគមន៍ និងអបអរសាទរ​ជូន​ចំពោះ​វត្តមាន​គណៈ​ប្រតិភូ​ឡាវ​ ដែលបានមកធ្វើទស្សនៈកិច្ចនៅកម្ពុជា។ ឯកឧត្តមបន្ថែមថា ជាការពិតកម្ពុជា និងឡាវ គឺ​ជា​អ្នក​ជិត​ខាង​ដ៏ល្អ មិត្តជិតស្និទ្ធ បងប្អូន និងជាដៃគូយុទ្ធសាស្ត្រ ដោយផ្អែកលើការគោរពគ្នា និង​ជឿ​ទុក​ចិត្តគ្នា។ យើងតែងតែគាំទ្រគ្នាទៅវិញទៅមកនៅគ្រប់កាលៈទេសៈ។

ឯកឧត្តម​សូមជម្រាបជូនគណៈប្រតិភូទាំងអស់ជ្រាបថា រដ្ឋសភានីតិកាលទី៧ មានរយៈពេល៥ឆ្នាំ គឺ​ចាប់ពីឆ្នាំ២០២៣ ដល់ឆ្នាំ២០២៨ ក្នុងអាណត្តិនេះ រដ្ឋសភា គឺដឹក​នាំ​ដោយ​សម្តេច​មហា​រដ្ឋសភា​ធិការធិបតី ឃួន សុដារី ប្រធាន រដ្ឋសភា ដែលជាស្រ្តីទី១ ក្នុងប្រវត្តិសាស្រ្តកម្ពុជា ដែល​បាន​ទទួលនូវដំណែងដ៏ឧត្តុង្គឧត្តមនេះ។ រដ្ឋសភាបានបំពេញមុខងាររបស់ខ្លួនយ៉ាងសកម្មរួមមាន៖មុខងារនីតិកម្ម មុខងារតាម​ដាន​ការ​អនុវត្ត​ច្បាប់ និងមុខងារពង្រីក និងពង្រឹងការទូតសភា។

ក្រៅពីនេះ រដ្ឋសភា បានពង្រឹងការងារការទូតសភា តាមរយៈការ​បំពេញ​ទស្សន​កិច្ច​ជា​ផ្លូវ​ការ​ទ្វេ​ភាគី ឬពហុភាគីចូលរួមប្រជុំអន្តរជាតិ ជួបសវនការ និងពិភាក្សាការងារជាមួយអង្គទូត អង្គការ​ជាតិ​ អន្តរជាតិ ក្នុងគោលបំណងពង្រឹងចំណងមិត្តភាព និងកិច្ចសហប្រតិបត្តិការអន្តរជាតិ ទាំង​ក្នុង​ក្រប​ខ័ណ្ឌទ្វេភាគី និងពហុភាគី។

ឯកឧត្តម H.E .Phongsaysack INTHATH អនុរដ្ឋមន្រ្តីក្រសួងការងារ និងសុខមាកភាពសង្គម បាន​ថ្លែងអំណរគុណជូនឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា ដែល​បាន​ចែក​រំលែក​បទ​ពិសោធន៍​ការងារពា​ក់​ព័ន្ធ​កា​រគាំពារ​សង្គម​ដែល​ផ្តល់​នូវ​ធាតុ​ចូល​សំខាន់ៗ​ដល់​គណៈ​ប្រតិភូ​ឡាវយកទៅអនុវត្តអោយកាន់តែល្អបន្ថែមទៀតនាពេលអនាគត់៕