ឯកឧត្តម សេង សុមុនី៖ ក្រសួងធម្មការ និងសាសនា បាន​បន្ត​បំពេញ​ភារកិច្ច​លើក​កម្ពស់​ទំនៀម​ទំលាប់​ អភិរក្សប្រពៃណី និងគោរពប្រតិបត្តិព្រះពុទ្ធសាសនា

ថ្លែងក្នុងពិធីបិទវគ្គបណ្ដុះបណ្ដាលស្ដីពី តួនាទី ភារកិច្ចនិងក្រមសីលធម៌អាចារ្យខ្មែរជំនាន់ទី៥០ ឯកឧត្តម សេង សុមុនី រដ្ឋលេខាប្រចាំការតំណាងដ៏ខ្ពង់ខ្ពស់ ឯកឧត្តម ចាយ បូរិន រដ្ឋមន្រ្តី​ក្រសួង​ធម្មការ និង​សាសនា បានអះអាងថា ក្រសួងធម្មការ និងសាសនា បានបន្ត​បំពេញ​ភារកិច្ច​លើក​កម្ពស់​ទំនៀមទំលាប់ អភិរក្សប្រពៃណី និងគោរពប្រតិបត្តិព្រះពុទ្ធសាសនា។

ឯកឧត្តម សេង សុមុនី បានបន្ថែមថា ក្រោមការយកចិត្តទុក​ដាក់​ប្រកប​ដោយ​គតិ​បណ្ឌិត​ដ៏​ខ្ពង់​ខ្ពស់​របស់​សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី បច្ចុប្បន្ន​ប្រធាន​ព្រឹទ្ធសភា និងបន្តដឹកនាំប្រកបដោយគតិបណ្ឌិត និង​ចក្ខុ​វិស័យ​វែង​ឆ្ងាយ​របស់​សម្តេច​មហា​បវរ​ធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលបា​ន​ថ្លែង​ក្នុង​ពិធី​សំណេះ​សំណាល​ជាមួយអាចារ្យ អាចារិនីទូទាំងប្រទេសលើកទី៩ កាលពីថ្ងៃទី១៥ ខែសីហា ឆ្នាំ២០២៤ កន្លងទៅ សូមឱ្យក្រសួងធម្មការ និងសាសនា រៀបចំបង្កើត និងបន្តការ​បើក​វគ្គ​បណ្តុះ​បណ្តាល​តម្រង់​ទិស អាចារ្យខ្មែរ ឱ្យមានការឯកភាពគ្នាក្នុងការដឹកនាំពិធីកម្មនានា តាមទម្រង់ទំនៀមទម្លាប់ ប្រពៃណី រក្សាឱ្យបាននូវអត្តសញ្ញាណជាតិ អភិរក្សមរតកវប្បធម៌ខ្មែរ ដើម្បីបញ្ចៀស វិបត្តិអាចារ្យ ក្នុង​ព្រះរាជាណាចក្រកម្ពុជា។

ឯកឧត្តម រដ្ឋលេខាធិការប្រចាំការ បានក្រើនរំលឹកផងដែលថា ក្រសួងមានកាតព្វកិច្ច ណែនាំ​ដល់​គ្រប់​សាសនាទាំងអស់ ពិសេសព្រះពុទ្ធសាសនា ទំនៀមទំលាប់ខ្មែរ រក្សាឲ្យបាននៅ​ភាព​សុខដុម​នីយកម្ម​សាសនា។ ហើយវគ្គបណ្ដុះបណ្ដាលស្ដីពី តួនាទី ភារកិច្ច និងក្រមសីលធម៌អាចារ្យ គឺជា​វគ្គ​សិក្សា​តម្រង់ទិស វិន័យផ្ទៃក្នុងប្រកបដោយសេចក្តីថ្លៃថ្នូរ ពង្រឹងសាមគ្គីភាព រក្សាសីលធម៌ និង​សេចក្តី​ថ្លៃ​ថ្នូរ។

ឯកឧត្តម រដ្ឋលេខាធិការប្រចាំការ បានពាំនាំនូវប្រសាសន៍របស់ឯកឧត្តម ចាយ បូរិន រដ្ឋមន្រ្តី​ក្រសួង​​ធម្មការ និងសាសនា ដែលបានផ្តល់អនុសាសន៍ណែនាំ និងសំណូមពរ ដល់​សិក្ខា​កាម​ទាំង​អស់​រួម​មាន ព្រះសង្ឃ អាចារ្យ អាចារិនី ចាំបាច់យកចំណេះវិជ្ជាដែលបានបំពេញបន្ថែមនេះ យក​ទៅ​ដឹកនាំកម្មវិធីផ្សេងៗឲ្យបានត្រឹមត្រូវ និងចែករំលែកបទពិសោធន៍គ្នាទៅវិញទៅមក ទៅ​តាម​ពិធី​កម្មនានា ទាំងផ្នែកសាសនពិធី ក៏ដូចជាពិធីប្រពៃណី ទំនៀមទំលាប់ជាតិជាដើម។

នាឱកាសនេះ លោក កែវ ហេង ប្រធាននាយកដ្ឋានស្រាវជ្រាវ ផ្សព្វ​ផ្សាយ​ពុទ្ធ​សាសនា​ផ្សារ​ភ្ជាប់​សង្គម បានលើកឡើងថា វគ្គបណ្ដុះបណ្ដាលស្ដីពីតួនាទីភារកិច្ច និងក្រមសីលធម៌​អាចារ្យ​ខ្មែរ​ជំនាន់​ទី​៥០ ក្នុងពេលនេះ គឺសិក្សារយៈពេល៥ថ្ងៃ ដែលមានគ្រូឧទ្ទេសចំនួន១៩រូប សិក្សា​លើ​១៨​មុខ​វិជ្ជា ដោយចែកចេញជា៤ផ្នែកធំៗដូចជា៖ ការគ្រប់គ្រង, វិជ្ជាហោរាសាស្រ្ត, ពិធីបុណ្យសព និង​ទម្រង់អាពាហ៍ពិពាហ៍ខ្មែរ បានបញ្ចប់ទៅដោយរលូននឹងជោគជ័យដូចការរំពឹងទុក។

សូម​ជម្រាបជូនថា ពិធីបិទវគ្គបណ្ដុះបណ្ដាលស្ដីពី តួនាទី ភារកិច្ច និងក្រម​សីល​ធម៌​អាចារ្យ​ខ្មែរ​ជំនាន់​ទី​៥០ ដោយមានការនិមន្ត និងអញ្ជើញចូលរួមពីសំណាក់ឯកឧត្តម លោកជំទាវ​ថ្នាក់​ដឹក​នាំ​ក្រសួង​ធម្មការ និងសាសនា សិក្ខាកាមជាព្រះមន្រ្តីសង្ឃ អាចារ្យ អាចារិនី មកពីរាជធានី-ខេត្ត ចំនួន​២៣៣ អង្គ/នាក់ ក្នុងនោះព្រះសង្ឃ២៦អង្គ និងស្រ្តី៩នាក់ នារសៀលថ្ងៃទី១៨ ខែកក្កដា ឆ្នាំ​២០២៥ នៅទីស្តីការក្រសួង៕ អត្ថបទ រដ្ឋា