[UPDATE] អ្នកស្លាប់កើនដល់ជិត ៣០នាក់ ក្នុងហេតុការណ៍ធ្លាក់យន្តហោះរបស់កងទ័ពអាកាសបង់ក្លាដែស

ក្រុមមន្ត្រីបាននិយាយនៅថ្ងៃអង្គារ (២២ កក្កដា) នេះថា មនុស្សយ៉ាងហោចណាស់ ២៧នាក់ បានស្លាប់ បន្ទាប់ពីយន្តហោះហ្វឹកហ្វឺនរបស់កងទ័ពអាកាសបង់ក្លាដែស បានធ្លាក់បុកបរិវេណមហាវិទ្យាល័យ និងសាលារៀនក្នុងទីក្រុងដាកា ដោយមនុស្សប្រមាណជិត ៩០នាក់ រួមទាំងកុមារជាច្រើន កំពុងសម្រាកព្យាបាលរបួសក្នុងមន្ទីរពេទ្យ ខណៈប្រភពពីសារព័ត៌មាន AP បាននិយាយថាមានអ្នករបួសលើសពី ១៧០នាក់។

យន្តហោះ F-7 BGI បានធ្លាក់ភ្លាមៗ បន្ទាប់ពីហោះឡើងនៅម៉ោងក្នុងស្រុក ០១:០៦នាទីរសៀល កាលពីថ្ងៃចន្ទ ពីមូលដ្ឋានទ័ពអាកាស Kurmitola នៅរដ្ឋធានីដាកា ក្នុងបេសកកម្មហ្វឹកហាត់ជាប្រចាំ។ យោធានិយាយថា យន្តហោះនោះបានជួបប្រទះនឹងបញ្ហាម៉ាស៊ីនទើបបណ្ដាលឱ្យធ្លាក់។

លោក Sayedur Rahman ជំនួយការពិសេសរបស់ប្រធានទីប្រឹក្សាសុខាភិបាល បានបញ្ជាក់ប្រាប់អ្នកយកព័ត៌មានថា មនុស្ស ២៤នាក់បានស្លាប់និង ៨៨នាក់ ត្រូវបានបញ្ជូនទៅមន្ទីរពេទ្យដោយមានរបួសរលាកពីគ្រោះថ្នាក់នេះ។

រដ្ឋាភិបាលបានប្រកាសជាថ្ងៃកាន់ទុក្ខមួយថ្ងៃ ដោយបង្ហូតទង់ជាតិពាក់កណ្តាលដង និងការអធិស្ឋានពិសេសនៅគ្រប់ទីសក្ការៈបូជា។ យោធានិយាយថា អាកាសយានិកស្ថិតក្នុងចំណោមអ្នកស្លាប់ក្នុងឧបទ្ទវហេតុនេះ ដោយបន្ថែមថា គណៈកម្មាធិការមួយត្រូវបង្កើតឡើងដើម្បីស៊ើបអង្កេតមូលហេតុពិតប្រាកដ៕