កសិករខេត្តកំពង់ធំជិតពីររយគ្រួសារទទួលផលចំណេញច្រើនក្រោយចងក្រងជាសហគមន៍កសិកម្មទំនើប

គិតមកដល់ពេលនេះ កសិករសមាជិកនៃសហគមន៍កសិកម្មទំនើបស្ថិតនៅស្រុកបារាយណ៍ ខេត្ត​កំពង់ធំចំនួន ១៧៨ គ្រួសារ​បាន​ងាក​មក​ជ្រើសរើស​​ដាំ​ស្រូវ​សែន​ក្រអូប​ក្រោម​ការ​ណែនាំ​របស់​ក្រសួង​កសិកម្ម រុក្ខាប្រមាញ់ និង​នេសាទ ហើយក្នុងរដូវកាលនេះ​ពួកគាត់​ទទួល​ផល​ចំណេញ​ច្រើន​ជាង​អ្នក​ដាំ​ស្រូវ​អូអឹមជិត១លានរៀល ក្នុង១ហិកតា។

ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បាន​លើក​ឡើង​ក្នុង​ឱកាស​ចុះ​ពិនិត្យ​ការ​ច្រូត​ស្រូវ និងជួបសំណេះសំណាល​ជាមួយ​សហគមន៍​កសិកម្ម​ទំនើប​ដំណាំ​ស្រូវ​បារាយណ៍​ តាំងគោក ខេត្តកំពង់ធំ កាលពីរសៀលថ្ងៃទី២១ ខែកក្កដា ឆ្នាំ២០២៥នេះថា ផល​ចំណេញ​របស់​ប្រជាកសិករនេះ បានមកដោយសារតែស្រូវសែនក្រអូបកំពុងលក់ចេញក្នុងតម្លៃ ១ ២៧០រៀល ក្នុងមួយគីឡូក្រាម ខ្ពស់ជាងថ្លៃស្រូវអូអឹមក្នុងរង្វង់ ៤៥០ រៀល ទោះ​បី​ជា​ស្រូវ​អូអឹម​មាន​ទិន្ន​ផលខ្ពស់ជាងក៏ដោយ។ មួយផ្នែកទៀតបានមកពីការកាត់បន្ថយចំណាយលើធាតុចូល និង​ថ្លៃ​ការ​ប្រាក់ ជាពិសេសទទួលបានចំណេញពីថ្លៃជី រហូតដល់ទៅ ៣ម៉ឺនរៀលក្នុងមួយបាវ បើ​ប្រៀប​ធៀបទៅនឹងថ្លៃដែលកសិករទិញជីរៀងៗខ្លួន។ ឯកឧត្តម បានបន្ថែមថា នា​រដូវ​កាល​បន្ទាប់​ខាង​មុខ​នេះ​នឹង​មានសមាជិកចូលថ្មីបន្ថែមទៀត ដែលធ្វើឱ្យផ្ទៃដីផលិតកម្ម​របស់​សហគមន៍​ហក់​ឡើង​ពី ១ ០០០ហិកតា រហូតដល់ទៅជាង ៥ ០០០ហិកតា។

ឯកឧត្តមរដ្ឋមន្ត្រី បានសង្កត់ធ្ងន់ពីអត្ថប្រយោជន៍នៃការចងក្រងគ្នាជាសហគមន៍កសិកម្មទំនើប ការ​ជ្រើស​រើសពូជយុទ្ធសាស្ត្ររបស់កម្ពុជាមកដាំ និងការចុះកិច្ចសន្យាទិញលក់ទុកជាមុន ព្រម​ទាំង​បាន​ណែនាំ​ឱ្យ​សហគមន៍​ត្រៀម​ផែន​ការ​ឱ្យ​បាន​ច្បាស់​លាស់​សម្រាប់​ផលិតកម្ម​នៅ​រដូវ​កាល​បន្ទាប់​ ជាពិសេសការត្រៀមទុន ពូជ និងទីផ្សារ។

កសិករនៅក្នុងសហគមន៍កសិកម្មទំនើបដំណាំស្រូវបារាយណ៍ តាំងគោក ខេត្តកំពង់ធំ បាន​លើក​ឡើង​ដោយ​ទឹកមុខសប្បាយរីករាយថា គិតមកដល់ពេលនេះ សហគមន៍​បានដំណើរ​ការ​រយៈ​ពេល​ប្រមាណ ​៧ខែមកហើយ ដោយទទួលសមាជិកកើនឡើងជាបន្តបន្ទាប់ ជាមួយ​នឹង​ផ្ទៃ​ដាំ​ដុះ​ផង​ដែរ​។ ក្រុមកសិករ បានរៀបរាប់ស្រដៀងគ្នាថា កាលពីកន្លងមក មិនទាន់​ក្លាយ​ជា​សហគមន៍​កសិកម្ម​ទំនើប កសិករធ្វើស្រែតែងតែខាត ហើយមុនពេលធ្វើក៏តែងតែបារម្ភអំពីខ្វះទីផ្សារ ក៏ជា​បារម្ភ​អំពី​តម្លៃមិនច្បាស់លាស់ជាដើម។ ប៉ុន្តែ រហូតមកដល់ពេលនេះ បន្ទាប់ពីបាន​ចង​ក្រង​ជា​សហគមន៍​ទំនើប គឺល្អប្រសើរច្រើនជាងពេលមុនៗ ដោយពិតជាទទួលបានផលចំណេញ និង​មាន​ប្រសិទ្ធភាពសេដ្ឋកិច្ចពិតប្រាកដ។

សូមបញ្ជាក់បន្ថែមទៀតថា នៅក្នុង​ជំនួប​សំណេះ​សំណាល​ជា​មួយ​សហគមន៍​កសិកម្ម​ទំនើប​ដំ​ណាំ​ស្រូវ​បារាយណ៍ តាំងគោក ខេត្តកំពង់ធំនេះ ឯកឧត្តមរដ្ឋមន្រ្តី ឌិត ទីណា បានបញ្ជាក់ថា ក្រសួង​កសិកម្ម រុក្ខាប្រមាញ់ និងនេសាទ នឹងសហការជាមួយក្រសួងធនធានទឹក និងឧតុនិយម សិក្សា​រៀប​ចំ​ប្រព័ន្ធ​ស្រោច​ស្រព​គោល ដើម្បីធានាឱ្យបានថា ការធ្វើផលិតកម្មស្រូវនៅក្នុង​តំប​ន់​នេះ​មាន​ទឹក​គ្រប់​គ្រាន់ទៅតាមតម្រូវការជាក់ស្តែង៕ អត្ថបទ៖ ឈិត បូរ៉ាវី