អាមេរិកសាទរចំពោះបទឈប់បាញ់រវាងកម្ពុជា និងថៃហើយប្រកាសបន្តចូលរួមជាមួយម៉ាឡេស៊ីដើម្បីបញ្ចប់ជម្លោះ

ភ្នំពេញ៖ សហរដ្ឋអាមេរិក បង្ហាញការអបអរសាទរចំពោះបទឈប់បាញ់រវាងកម្ពុជា និងថៃ ហើយប្រកាសបន្តចូលរួមក្នុងដំណើរការនេះជាមួយប្រទេសម៉ាឡេស៊ី ដើម្បីបញ្ចប់ជម្លោះរវាងប្រទេសទាំងពីរទាំងស្រុង។ នេះបើតាមសេចក្តីថ្លែងការណ៍ផ្សព្វផ្សាយដោយស្ថានទូសហរដ្ឋអាមេរិកប្រចាំនៅកម្ពុជា នៅយប់ថ្ងៃទី២៨ ខែកក្កដានេះ។

សេចក្តីថ្លែងការណ៍ បានឱ្យដឹងថា សហរដ្ឋអាមេរិក សាទរចំពោះការប្រកាសពីបទឈប់បាញ់ រវាងប្រទេសកម្ពុជា និងថៃ ដែលបានប្រកាសនៅថ្ងៃនេះ នាទីក្រុងកូឡាឡាំពួរ។ លោកប្រធានាធិបតី Trump និងខ្ញុំ ប្តេជ្ញាបញ្ឈប់អំពើហិង្សាជាបន្ទាន់ ហើយរំពឹងថារដ្ឋាភិបាលនៃប្រទេសកម្ពុជា និងថៃ នឹងគោរពយ៉ាងពេញលេញនូវការប្តេជ្ញាចិត្តរបស់ពួកគេក្នុងការបញ្ចប់ជម្លោះនេះ។

អាមេរិក បានកោតសរសើរចំពោះនាយករដ្ឋមន្ត្រី អាន់វ៉ា អ៊ីប្រាហ៊ីម ចំពោះភាពជាអ្នកដឹកនាំរបស់លោក និងរដ្ឋាភិបាលម៉ាឡេស៊ី ដែលបានធ្វើជាម្ចាស់ផ្ទះនៃកិច្ចពិភាក្សាទាំងនេះ។

អាមេរិកបញ្ជាក់ថា៖យើងសូមអំពាវនាវដល់គ្រប់ភាគី ឱ្យអនុវត្តតាមការប្តេជ្ញាចិត្តរបស់ពួកគេ ហើយសហរដ្ឋអាមេរិក នឹងបន្តចូលរួមក្នុងដំណើរការនេះដែលរៀបចំដោយសហរដ្ឋអាមេរិក និងម៉ាឡេស៊ី ដើម្បីបញ្ចប់ជម្លោះ»៕