ក្រសួងអភិវឌ្ឍន៍ជនបទផ្តល់សម្ភារៈអនាម័យ និងបង្គន់អនាម័យ១៦បន្ទប់​នៅទីតាំង​ជម្លៀសជនភៀសសឹក​មកពីថ្មដា

ពោធិ៍សាត់៖ នៅថ្ងៃទី២៩ ខែកក្កដា ឆ្នាំ២០២៥ លោក ធីម សុធារ៉ា ប្រធានមន្ទីរអភិវឌ្ឍន៍​ជន​បទ​ខេត្តពោធិ៍សាត់ តំណាងឯកឧត្ដម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ បាននាំយក​សម្ភាៈ​អនាម័យ ដែលបានផ្តល់ជូនពីក្រសួងអភិវឌ្ឍន៍ជនបទ តាមរយៈកិច្ចសហការ​ជាមួយ​អង្គការ UNICEF ទៅប្រគលជូនរដ្ឋបាលស្រុកវាលវែង ដើម្បីធ្វើការបែង​ចែក​ជូន​បង​ប្អូន​ជន​ភៀស​សឹក និងបងៗកងទ័ពជួរមុខនៅថ្មដា ព្រំដែនកម្ពុជា-ថៃ ។ ជាមួយគ្នានោះ លោក ធីម សុធារ៉ា និង​ក្រុមការងារ រួមនិងអាជ្ញាធរស្រុកវាលវែង បាន​ចុះពិនិត្យ​ទីតាំង​សម្រាប់​សាងសង់​បង្គន់​អនាម័យ​បន្ថែម នៅទីតាំងសុវត្ថិភាពទាំង០២កន្លែងនៅឃុំប្រម៉ោយ ដែលបងប្អូនជនភៀសសឹកមកពីថ្មដា ព្រំដែន​កម្ពុជា-ថៃ កំពុងស្នាក់នៅបណ្តោះអាសន្នផងដែរ ។

លោក ធីម សុធារ៉ា ប្រធានមន្ទីរអភិវឌ្ឍន៍ជនបទខេត្តពោធិ៍សាត់ បានលើកឡើងថា​ដោយ​មាន​ក្តី​បារម្ភ និង​យកចិត្តទុកដាក់ អំពីបញ្ហាសុខភាពអនាម័យ របស់បងប្អូនជនភៀសសឹក ក៏ដូច​ជា​កង​ទ័ព​ជួរមុខ ឯកឧត្ដម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ បានចាត់ចែងឲ្យមន្ទីរ​អភិវឌ្ឍន៍ជន​បទ​ខេត្តនាំយកសម្ភារៈអនាម័យរួមមាន ៖ ធុងទឹកចំណុះ៦០លីត្រចំនួន១០០ , ប៊ីដុង​ទឹកបត់បានចំណុះ២០លីត្រចំនួន១០០០ , ធុងទឹកចំណុះ១៨លីត្រចំនួន ១០០០ ,សាប៊ូ​ម្សៅ​៧៥០កញ្ចប់ និងសាប៊ូដុំចំនួន១០០កេស រួមនិងណែនាំ​អោយ​សាង​សង់​បង្គន់​អនាម័យ​បន្ថែម​ចំនួន១៦បន្ទប់ ដើម្បីបំពេញតម្រូវការប្រើប្រាស់ជូនបងប្អូនជនភៀសសឹក ។

ក្នុងនាមអាជ្ញាធរស្រុកវាលវែង លោក ធាង ឡេង អភិបាលស្រុកបានថ្លែងអំណរគុណ យ៉ាង​ជ្រាល​ជ្រៅ​ចំពោះ​ឯកឧត្ដម ឆាយ ឫទ្ធិសែន ដែលបានចាត់តំណាងនាំយក សម្ភារៈអនាម័យ និង​ការ​សាង​សង់​បង្គន់អនាម័យបន្ថែមសម្រាប់ជនភៀសសឹក និងកងទ័ពជួរមុខក្នុងស្រុកវាលវែង។ ហើ​យ​លោកអភិបាលស្រុក ក៏សូមថ្លែងអំណរគុណដល់បងប្អូនប្រជាពលរដ្ឋ និងសប្បុរស​ជន​នានា​ដែល​ជា​សមរភូមិជួរក្រោយ ដែលបានចូលរួមជួយឧបត្ថម្ភជាស្បៀងអាហារ ថវិកា និងសម្ភារៈ​ផ្សេងៗ​ជា​បន្តបន្ទាប់ ដែលបានបង្ហាញឲ្យឃើញថា ឯកភាពជាតិខ្មែរ និងសាមគ្គីផ្ទៃក្នុងខ្មែរ មាន​ភាពរឹងមាំ។

សូមជម្រាបជូនដែរថា ឃុំថ្មដា ស្រុកវាលវែង ខេត្តពោធិ៍សាត់ មានព្រំប្រទល់ជាប់ជាមួយ ស្រុក​មឿង ខេត្តត្រាត ប្រទេសថៃ។ ហើយឃុំថ្មដា មានភូមិចំនួន៥ ក្នុងនោះភូមិផ្លូវការ​ចំនួន​៣​ភូមិ​រួមមាន៖ ភូមិឯកភាព ភូមិកណ្តាល និងភូមិសង្គមថ្មី និងភូមិឧបសម្ព័ន្ធចំនួន ២គឺ ភូមិអូរសួស្តី និង​ភូមិស្ទឹងមេទឹក ដោយមានប្រជាពលរដ្ឋរស់នៅសរុបចំនួន៣០២៨នាក់ ស្មើរនិង៧៨១គ្រួសារ ។ ជាមួយគ្នានោះប្រជាពលរដ្ឋដែលជាជនភៀសសឹកមកស្នាក់បណ្តោះអាសន្ននៅទីតាំងសុវត្ថិភាពទាំង ០២កន្លែងនៅទីរួមស្រុកវាលវែង មានចំនួន១៩៩០នាក់ ក្នុងនោះមនុស្សស្រី១០២០នាក់ និង​កុមារ​មាន​ចំនួន៦៧៦នាក់ ៕