ប្រជាពលរដ្ឋនៅស្រុកសណ្តាន់ ទទួលបានផ្លូវក្រាលកៅស៊ូ ជាសមិទ្ធផលប្រវត្តិសាស្រ្តក្នុងមូលដ្ឋានពួកគាត់

ភ្នំពេញ ៖ ប្រជាពលរដ្ឋនៅស្រុកសណ្តាន់ ខេត្តកំពង់ធំ បង្ហាញនូវការសប្បាយរីករាយជាអនេក ចំពោះការយកចិត្តទុកដាក់របស់រាជរដ្ឋាភិបាល លើការងារអភិវឌ្ឍន៍ផ្លូវនៅជនបទ ជាពិសេសក្នុងមូលដ្ឋានពួកគាត់ ដែលបានកំពុងប្រែក្លាយលើកកម្រិតគុណភាពផ្លូវក្រាលកៅស៊ូពីរជាន់ (DBST) ដែលជាសមិទ្ធផលប្រវត្តិសាស្រ្តថ្មីនៅក្នុងមូលដ្ឋានរបស់ពួកគាត់។

​ឯកឧត្តម ផូ ផារិទ្ធ រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ នៅថ្ងៃទី៦ ខែ សីហា ឆ្នាំ២០២៥ នេះថា បានដឹកនាំគណៈកម្មាធិការអន្តរក្រសួងរួមមាន ក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ ចុះត្រួតពិនិត្យ និងវាយតម្លៃ លើការងារលើកកម្រិតគុណភាពផ្លូវចំនួន១ ខ្សែ មាន២ កំណាត់ ប្រវែងសរុបជាង ៥ គីឡូម៉ែត្រ ទទឹង ៦ ម៉ែត្រ ស្ថិតនៅស្រុកសណ្តាន់ ខេត្តកំពង់ធំ ក្នុងនោះប្រជាពលរដ្ឋដែលរស់នៅក្នុងមូលដ្ឋាននោះ បានសម្តែងនូវការសប្បាយរីករាយ និង ថ្លែងនូវការដឹងគុណជានិច្ចចំពោះរាជរដ្ឋាភិបាល ដែលតែងតែគិតគូរ និងយកចិត្តទុកដាក់អភិវឌ្ឍន៍នៅតាមតំបន់ជនបទ ជាក់ស្តែងការ ទទួលបានផ្លូវក្រាលកៅស៊ូពីរជាន់ (DBST) នាពេលនេះ គឺជាសមិទ្ធផលប្រវត្តិសាស្រ្តថ្មីនៅក្នុងមូលដ្ឋានរបស់ពួគគាត់។

ឯកឧត្តមរដ្ឋលេខាធិការ លើកឡើងថា ជុំវិញការអភិវឌ្ឍន៍នៅតាមជនបទនេះ, ក្រសួងអភិវឌ្ឍន៍ជនបទ ដែលជាសេនាធិការ របស់រាជរដ្ឋាភិបាល បាននិងកំពុងផ្ដោតការយកចិត្តទុកដាក់យ៉ាងខ្លាំង នៅលើការងារស្ថាបនាហេដ្ឋារចនាសម្ព័ន្ធនានានៅតាមមូលដ្ឋាន ជាក់ស្តែងផ្លូវជនបទជាច្រើនដូចជា ផ្លូវដីស ផ្លូវល្បាយក្រួស ផ្លូវកៅស៊ូពីរជាន់ និងផ្លូវក្រាលបេតុង ដែលស្ថិតនៅក្រោមក្របខណ្ឌក្រសួង អភិវឌ្ឍន៍ជនបទ បានកំពុងផ្តល់ប្រយោជន៍ដល់ប្រជាជននៅតាមសហគមន៍ និងសាធារណជនទូទៅ មានផ្លូវល្អ និងប្រទាក់ក្រឡា បង្កើតជាបរិយាកាសអំណោយផល ដល់ការរស់នៅរបស់ប្រជាពលរដ្ឋនៅក្នុងសង្គម។

ជុំវិញផ្លូវខាងលើនេះ, ឯកឧត្តមរដ្ឋលេខាធិការ បានកោតសរសើរដល់នាយកដ្ឋានវិស្វកម្ម ក្រសួងការពារជាតិ ដែលបានខិតខំ ប្រែងនៅលើការងារស្ថាបនាផ្លូវ, ព្រោះផ្លូវមានសារៈសំខាន់ណាស់ មិនថាផ្លូវមួយខ្សែនេះ ឬបណ្តាញផ្លូវផ្សេងៗទៀតនោះឡើយ, ដូច្នេះ សូមឱ្យនាយកដ្ឋានវិស្វកម្ម ជំរុញការស្ថាបនាផ្លូវខ្សែនេះឱ្យបានចប់សព្វគ្រប់ទៅតាមផែនការ ឬបញ្ចប់មុនផែនការ ជាផ្លូវប្រកបដោយ គុណភាព ដើម្បីប្រើប្រាស់យូរងង្វែង ជាពិសេសផ្តល់ជូនប្រជាពលរដ្ឋពលរដ្ឋដែលរស់ក្នុងមូលដ្ឋានផ្ទាល់។

សូមបញ្ជាក់ថា ជុំវិញការងារលើកកម្រិតគុណភាពផ្លូវខាងលើនេះ គឺមានប្រវែងសរុបជាង ៥ គីឡូម៉ែត្រ ទទឹង ៦ ម៉ែត្រ (កំណាត់ទី១ ក្រាលកៅស៊ូពីរជាន់ (DBST) ប្រវែង ៤ ៨០០ ម៉ែត្រ និងកំណាត់ទី២ ក្រាលបេតុងប្រវែង ៤៧២ ម៉ែត្រ, ចិញ្ចើមផ្លូវសងខាងក្រាលដី ល្បាយក្រួស, សាងសង់លូមូលមុខមួយចំនួន ១ កន្លែង និងសំណង់រំដោះទឹករាងអក្សរអ៊ុយប្រវែង ៣១០ ម៉ែត្រ ស្ថិតនៅភូមិរវៀង ឃុំងន ទៅភូមិព្រៃគគីរ ឃុំក្លែងស្រុកសណ្តាន់ ខេត្តកំពង់ធំ ដែលផ្លូវខាងលើនេះស្ថាបនាដោយនាយកដ្ឋានវិស្វកម្ម ក្រសួងការពារជាតិ ស្ថិតក្រោមក្របខណ្ឌក្រសួងអភិវឌ្ឍន៍ជនបទ៕

អត្ថបទ៖ សុន រ៉ាឌី