មជ្ឈមណ្ឌលបច្ចេកវិទ្យាសហគមន៍ដើរតួនាទីយ៉ាងសំខាន់ក្នុងការពង្រឹងការចាប់យកឌីជីថល​នៅក្នុងសហគមន៍ និងជំរុញការធ្វើបរិវត្តកម្មឌីជីថល

នាព្រឹកថ្ងៃទី១៩ ខែកក្កដា ឆ្នាំ២០២៥ ក្រុមការងារ​ទទួល​បន្ទុក​គម្រោង​មជ្ឈ​មណ្ឌល​បច្ចេក​វិទ្យាស​ហគមន៍​ (ម.ប.ស.) បានចុះទៅកាន់វិទ្យាល័យអគ្គមហាសេនាបតីតេជោ ហ៊ុន សែន អង្គ​ព្រះ​ស្ដេច ​ស្រុកសំរោង ខេត្តតាកែវ ដើម្បីសម្ភាសន៍ និងផ្ដល់ការលើកទឹកចិត្ត រួមទាំងប្រាក់ឧបត្ថម្ត ដល់​សិស្ស​ឈ្មោះ មួង សំណាង ដែលមានអាយុ ១៥ឆ្នាំ ស្ថិតនៅភូមិឈើទាល ឃុំ​បឹង​ត្រាញ់​ខា​ង​ជើង​ ស្រុកសំរោង ខេត្តតាកែវ។

កុមារា មួង សំណាង មានបងប្អូនបង្កើតចំនួន ៣នាក់ ស្រី ២នាក់ ជាកូន​ច្បង​ដែល​មាន​ឱពុក​ម្តាយ​ជា​កសិករ។ សព្វថ្ងៃ សំណាង រៀននៅថ្នាក់ទី៨C នៃវិទ្យាល័យអគ្គមហាសេនាបតីតេជោ ហ៊ុន សែន អង្គព្រះស្តេច ស្រុកសំរោង ខេត្តតាកែវ។ តាំងពីកំណើតមក សំណាង ពិការដៃទាំងពីរ ប៉ុន្តែ​គាត់មានភាពឧស្សាហ៍ព្យាយាមក្នុងការរៀនសូត្រ។ ទោះបីថ្នាក់ទី៨ មិនមាន​មេរៀន​បច្ចេក​វិទ្យា​ឌីជីថល សំណាង បានខំព្យាយាមតស៊ូចូលរៀនថ្នាក់បច្ចេកវិទ្យាព័ត៌មាននៅក្នុង ម.ប.ស ក្រៅ​ម៉ោង​សិក្សា ហើយគាត់គឺជាសិស្សដែលមានការអត់ធ្មត់ ទោះបីពុំមានដៃទាំងពីរ ក៏គាត់​អាច​សរសេរ​អក្សរបាន និងចុចលើក្តារចុចរបស់កុំព្យូទ័របានយ៉ាងល្អ។

សូមជម្រាបជូនថា គម្រោង ម.ប.ស. នៅតាមវិទ្យាល័យសាធារណៈ គឺចក្ខុវិស័យវែងឆ្ងាយរបស់ ក.ប.ទ. លើការអភិវឌ្ឍមូលធនមនុស្សឌីជីថល តាម​រយៈ​ការ​រៀប​ចំ​ហេដ្ឋា​រចនា​សម្ព័ន្ធ​បម្រើ​ដល់​ការ​បណ្តុះប​ណ្តាលធនធានមនុស្សឌីជីថលនៅថ្នាក់មូលដ្ឋាន ទាំងក្នុងសាលារៀន និង​សហគមន៍​ទូទៅ ​ដើម្បីរៀបចំប្រព័ន្ធអេកូឡូស៊ីឌីជីថលមួយដែលភាពរឹងមាំ និងមានការរីកចម្រើន។

ដោយ​មាន​ការគាំទ្រនិងការសហការពីក្រសួងអប់រំ យុវជន និងកីឡា គម្រោង ម.ប.ស. ត្រូវ​បាន​ដាក់​ឱ្យ​អនុវត្តសាកល្បងនៅខេត្តតាកែវ ដោយមានមុខងារស្នូលចំនួន ៤ គឺ ១) បន្ទប់កុំព្យូទ័រ ២) បន្ទប់​បណ្តុះបណ្តាល ៣) ប៉ុស្តិ៍ប្រៃសណីយ៍ និង ៤) សាលសាធារណៈ៕