អភិបាលខេត្តកំពង់ស្ពឺ លើកទឹកចិត្តយុវជនកុំបោះបង់ការរៀនសូត្រ ដើម្បីមាន​សមត្ថភាព​ចូល​រួម​អភិវឌ្ឍន៍​ជាតិ

កំពង់ស្ពឺ៖ ឯកឧត្តម ជាម ច័ន្ទសោភ័ណ អភិបាលខេត្តកំពង់ស្ពឺ បានលើកទឹកចិត្តដល់និស្សិត ក៏​ដូច​យុវជនទាំងអស់ឱ្យបន្តការខិតខំរៀនសូត្រ ដើម្បីលើកកម្ពស់សមត្ថភាព ចំណេះ​ជំនាញ​រួម​ចំណែក​អភិវឌ្ឍសង្គមជាតិឱ្យកាន់តែរីកចម្រើន នៅក្នុងសម័យសកលភាវូបនីយកម្ម និងបច្ចេក​វិទ្យា​វិទ្យាសាស្ត្រ ។

ក្នុងជំនួបសំណេះសំណាលជាមួយគណ:គ្រប់គ្រង បុគ្គលិក សាស្ត្រាចារ្យនិងនិស្សិត នៃសាកល​វិទ្យាល័យ​អង្គរ​ខេមរា ខេត្តកំពង់ស្ពឺ កាលពីរសៀលថ្ងៃទី១០ ខែសីហា ឆ្នាំ២០២៥ ឯកឧត្តម ជាម ច័ន្ទសោភ័ណ មានប្រសាសន៍ថា រាជរដ្ឋាភិបាល មានបំណងប្រាថ្នាចម្បងតែមួយគត់ គឺ​ការ​ផ្តល់​ឱ្យ​ប្រជា​ពលរដ្ឋ​នូវ​ជីវភាពធូរធាចម្រុងចម្រើន និងការរស់នៅប្រកប​ដោយ​ភាព​សុខសាន្ត​ក្រោម​ម្លប់​នៃ​សន្តិភាព ព្រមជាមួយនឹងសិទ្ធិសេរីភាព និងឱកាស​គ្រប់​បែប​យ៉ាង​ក្នុង​ការ​កសាង​អភិវឌ្ឍ​ខ្លួន​ឱ្យ​ទទួល​បាន​ជោគជ័យ ។

ឯកឧត្តមបានបន្តថា ជាការពិតណាស់ ការប្រែក្លាយគំនិត ឱ្យចេញជា​លទ្ធផល​ជាក់​ស្តែង​ប្រកប​ដោយ​និរន្តរភាព នៃការរីកចម្រើន គឺទាមទារនូវចក្ខុវិស័យវែងឆ្ងាយ និងច្បាស់លាស់ ក៏ដូចជា​ការ​ប្តេជ្ញា​ចិត្ត​ខ្ពស់ ពីគ្រប់ភាគីពាក់ព័ន្ធ ក្នុងការជម្នះនូវរាល់គ្រប់ឧបសគ្គ ។ ក្នុងន័យនេះ សូមពលរដ្ឋ​គ្រប់​មជ្ឈ​ដ្ឋាន ចូលរួមថែរក្សា និងប្រឹងប្រែងចាប់យកឱកាសអំណោយផលពីកត្តាសុខសន្តិភាព ស្ថិរភាព និងកំណើនឱ្យបានជាប្រយោជន៍សម្រាប់ខ្លួន ក្រុមគ្រួសារ និងសង្គមជាតិ ។

ក្នុង​ឱកាសនោះ អភិបាលខេត្តកំពង់ស្ពឺ បន្ថែមថា សម្តេចធិបតី ហ៊ុន ម៉ាណែត នាយករដ្ឋ​មន្ត្រី​នៃ​កម្ពុជា ​បានផ្តល់ឱកាសឱ្យវិស័យឯកជន ចូលរួមវិនិយោគលើវិស័យអប់រំ ដោយចាប់​ផ្តើម​ពី​ថ្នាក់​បឋម ​រហូតដល់ឧត្តមសិក្សា ដែលការណ៍នេះ ក៏ដូចជាការបើក​ឱកាស​សម្រាប់​សិស្ស​និស្សិត​យើង​ផងដែរ។

ទន្ទឹមនេះ ឯកឧត្តម ជាម ច័ន្ទសោភ័ណ ក៏បានថ្លែងនូវការកោតសរសើរផងដែរ ទៅដល់និស្សិត យុវជន យុវនារីនៃខេត្តកំពង់ស្ពឺ ដែលស្រវាស្រទេញចំពោះការសិក្សា ចង់ចេះ ចង់ដឹង និង​ដើរ​ឱ្យ​ទាន់​សម័យ​កាលសកលភាវូបនីយកម្ម និងបច្ចេកវិទ្យាវិទ្យាសាស្ត្រឋ ។ ជាមួយនោះដែរ សាស្ត្រា​ចារ្យ​ត្រូវ​ប្រកាន់ភ្ជាប់ នូវគោលការណ៍បណ្តុះបណ្តាល និងស្រាវ​ជ្រាវ​តាម​បែប​វិទ្យាសាស្រ្ត​នេះ​ជា​និច្ច​ ដោយសារគោលការណ៍សិក្សាស្រាវជ្រាវ តាមបែបវិទ្យាសាស្រ្តនេះ និងជួយ​ឱ្យ​និស្សិត​មាន​ចំណេះ​ជំ​នាញពិតប្រាកដ ដើម្បីប្រកួតប្រជែងគុណភាពធនធានមនុស្ស ជាមួយ​បណ្តា​ប្រទេស​អភិវឌ្ឍន៍​នានា៕ អត្ថបទ បាន សុខរិទ្ធិ